a1Kor 1:17
bGa 6:14; Pil 3:8
cŊgo 18:9; 2Kor 10:1,10, 11:30
d2Pe 1:16
e1Kor 4:20; 2Kor 4:7, 6:7; 1Tes 1:5
fRo 16:25+; 1Kor 1:28; Ep 3:5,9; Kol 1:26; Pil 3:15; Ibr 5:14
gLu 23:34; Yo 16:3; Ŋgo 13:27; 2Kor 3:14
hYesa 64:4; Yer 3:16
iMt 13:11; Yo 16:13; 1Yo 2:27
jRo 11:33+
kRo 8:9
m1Kor 1:17, 2:4; 2Pe 1:16
nYo 6:44, 14:17; Ro 8:5+; 1Kor 1:18,23
o1Tes 5:21; 1Yo 2:20, 5:20
pRo 11:34

1 Corinthians 2

Niom toŋmatiziŋ tio, motoyom iŋgal. Indeeŋe ta nio aŋma mi aŋsoyaara sua ki Anutu piom na, aŋkam sua mbuyeeneŋana kembei ta wal kwon suaŋan tikamam na som. Mi aŋzzo pa ŋgar bibip ta ki toono i na som. Aŋzzo katkat sua pa Anutu ŋgar kini biibi ta muŋgu ike mi iŋgi ipet mat kek. a 

Paso, indeeŋe ta aŋma ma aŋbotmbot la mazwoyom na, ŋgar tio imbol be aŋzzo men pa Yesu Krisi, mi meeteŋana kini sala ke pambaaraŋana. b 

Mazwaana tana, motoŋana biibi ikam yo ma mburoŋ imap, mi aŋyamaana ituŋ kembei aŋrao som kat. c 

Tana indeeŋe ta aŋsoyaara uruunu ambaiŋana piom na, aŋzzo sua mbuyeeneŋana kembei ta zin ŋgarŋan ki toono tikamam bekena tiyaryaaru zin tomtom na som. Mi Anutu Bubuŋana ta ikamam uraata mburaanaŋana piom, mi ipombolmbol sua tio. d 

Tana urlaŋana tiom imendernder se tomtom ŋgar kizin som. Imendernder se Anutu itunu mburaana. e 

Bela Anutu Bubuŋana ikam peeze piti, to takam kat ŋgar

Mi zin wal ta tikam ŋgar ki Anutu ma imbol pizin na, amzzo zin pa ŋgar kini biibi ta muŋgu ike mi iŋgi ipet mat kek. Ŋgar tana, indeeŋe toono ipet zen na, Anutu leleene iur pa, bekena ikam ti ma tombot raami lela azuŋka kini leleene. Mi ŋgar tana ipa ndel kat pa ŋgar ta tomtom tipakurkur pa mazwaana taiŋgi, mi ŋgar kizin bibip ki toono tabe tila len i. f 

Zin bibip tana, kizin tasa ikilaala Anutu ŋgar kini som. Mi be tikilaala, so tipun Merere kiti ta azuŋka katuunu i sala ke pambaaraŋana som. g 

Ŋgar ta amzzo pa i na, tibeede ka sua muŋgu kek ta kembei:

Koroŋ ta Anutu iparaŋraŋ pizin wal tau tiur lelen pini na, muŋgu tomtom tire som, tileŋ som, mi tikam ŋgar pa som. h 

10 Mi niam na, Anutu ikam Bubuŋana piam, mi Bubuŋana tana iswe koroŋ tana piam kek. Pa Bubuŋana, ni irre koroŋ ta boozomen. Anutu ŋgar kini turkeŋana kat tomini, Bubuŋana iute. i 

11 Kere. Asiŋ iute tomtom toro leleene ma imap? Som. Ni itutamen ta iute kat leleene. Mi ina raraate pa Anutu. Bubuŋana men, ta iute Anutu leleene ma imap. j 

12 Niam taiŋgi amkam ŋgar ki toono som. Amkam ŋgar ki Bubuŋana ta imar pa Anutu na. Mi Bubuŋana tana, ta ipaute yam pa koroŋ ambaimbaiŋan ta Anutu ipomoozo iti pa kek na. k 

13 Mi iŋgi amzzo pa koroŋ ta tana. Tana sua ta amzzo i, imar pa tomtom ŋgar kizin som. Ina, Bubuŋana Potomŋana ta ipaute yam pa. Mi gorgori ta amwesweeze sua ta imar pa Bubuŋana na, amtoto peeze ki Bubuŋana.
(2:13) Zaala toro ta tarao be totooro sua suruunu ti na, ta kembei: “Mi zin wal tau tikam ŋgar ta ki Bubuŋana i na, amwesweeze sua ŋonoono ta imar pa Bubuŋana na pizin.”
,
m 

14 Tomtom ta sombe ŋgar ki toono ikamam peeze pini na, ni irao be ikam ŋgar pa koroŋ ta ki Anutu Bubuŋana i na som. Ni ire koroŋ tana kembei koroŋ kankaanaŋana. Pa bela Bubuŋana ipei ŋgar piti, to takam kat ŋgar pa koroŋ ta ki Bubuŋana i. Uunu tina ta tomtom toono kan, ŋgar kizin irao ipet pa koroŋ ta ki Bubuŋana i na som. n 

15 Mi tomtom ta sombe Bubuŋana ikamam peeze pini, na ni irao be ikilaala koroŋ ta boozomen. Iŋgoi ta ambaiŋana, mi iŋgoi ta sananŋana. Tomtom ta kembena na, wal ta tikamam ŋgar ki toono na, irao tiyo kwon pini na som. o 

16 Pa zin wal ta tikamam ŋgar ki toono na,

Kizin asiŋ ta iute kat ŋgar ki Merere, som irao be ipaute i pa koroŋ pakan? Som.

Mi niam na, ŋgar ki Krisi ta ikamam peeze piam. p 

Copyright information for `MNA