aŊgo 15:20; Ro 14:3,10,14
b1Kor 13:8+,12; Ga 6:3; 1Tim 6:4
c1Yo 4:7+
dKam 34:14+; 1Kor 10:19+; Ga 4:8; Ep 4:5+; 1Tim 2:5
eYo 1:3+; Ŋgo 17:28; Ro 11:36; Pil 2:11
fRo 14:14,23; 1Kor 10:28+
gMk 7:19; Ro 14:14,17; Ibr 13:9
hRo 14:13+; Ga 5:13; 1Pe 2:16
iRo 14:15+
jRo 14:19+

1 Corinthians 8

Sua pa buzur ta tipatoron zin merere pakaamŋan pa i

Ayo, iŋgi be aŋso pa buzur ta tipatoron zin merere pakaamŋan pa i.

Niom pakan kozzo ta kembei: “Buzur tana ka ŋgar, niam ta boozomen ambot mat pa kek.” Ina ambai. Mi kere yom. Kokena ŋgar tiom ikam yom ma kapakur yom mi koso kilip pa waeyom bizin pakan. Mi mbulu ki lelende par piti, ina ikam ti ma taparpombolmbol ti. a 

Sombe tomtom sa indemeere kembei ni irao kat pa ŋgar, ina iswe kembei ni ikam kat ŋgar zen. b 

Mi sombe tomtom sa iurur kat leleene pa Anutu mi zin tomtom, ina iswe kembei ni ikam kat ŋgar. c 

Aŋmiili mini pa buzur ta tipatoron zin merere pakaamŋan pa i. Niom kiwi ta kembei: “Ko wal urlaŋan irao tikan, som som?”

Mi pekelŋana tio ta kembei: Iti tuute: Merere pakaamŋan, ina koroŋ ŋonoono som. Pa Anutu tamen ta imbotmbot i. Toro sa som. d 

Ŋonoono, tomtom tiurla ki koroŋ boozo ta timbot saamba ma toono na, mi tiwatwaata zin be ‘anutu’ som ‘merere’ kizin. Tamen iti na, tuurla ki Anutu tamen. Ni Tamanda ta iur koroŋ ta boozomen, mi iti tombot be tembeeze pini. Mi iti tuurla ki Merere tamen, Yesu Krisi. Ni ta iwe zaala pa koroŋ ta boozomen ma tipet, mi iwe zaala piti ma tewe Anutu lene. e 

Tamen wal pakan ta urlaŋana kizin imbol zen na, timbot mat pa koroŋ taiŋgi som. Wal ta kembei, ta muŋgu mi imar na, timbesmbeeze pizin merere pakaamŋan. Tana koozi, sombe tikan kini, som buzur sa ta tipakur merere pakaamŋana pa na, to ŋgar kizin ilala pa merere pakaamŋana tana. Tabe ikam ma tiyamaana zitun kembei tikam ŋoobo mbulu ma tisaana pa Anutu mataana. f 

Ŋonoono, kini ma buzur, sombe takan, som takan som, ina koroŋ sorok. Irao ikam ti ma tewe ambaiŋanda, som sananŋanda pa Anutu mataana na som. g 

Tamen niom wal ta leyom ŋgar pa koroŋ taiŋgi mi kuute kembei kini ma buzur tana ka ŋgalseki sa som na, kere yom. Kokena kayaaru zin wal ta urlaŋana kizin imbol zen na, ma titop. h 

10 Nu tomtom ta ndemeere kembei mbot mat pa ŋgar ki Krisi na, sombe kanan kini lela urum ki merere pakaamŋana sa, mi sombe tomtom sa ta urlaŋana kini imbol zen na, imar mi ire u, nako pomboli be ito u ma ikan kini tana tomini. 11 Tana re u. Kokena ŋgar ku tana ipasaana urlaŋana ki toŋmatiziŋ ku ta Krisi imeete pini na, ma ila lene. i 

12 Pa niom sombe kakam ta kembei, na kakam sanaana pa Krisi. Paso, kakam sanaana pa zin toŋmatiziŋ ku ta urlaŋana kizin imbol zen na, mi kakam zin ma tiyamaana zitun kembei tikam ŋoobo mbulu. 13 Tana sombe kini sa, som buzur sa irao ikam toŋmatiziŋ tio ma itop pa urlaŋana kini, na nio ko irao aŋkan mini koroŋ tana na som. Kokena aŋkami ma itop pa urlaŋana kini. j 

Copyright information for `MNA