aMt 23:5+; Ep 4:22,25; Kol 3:8+; Ibr 12:1; Yems 1:21
bMbo 34:8; Ibr 6:5
cMbo 118:22; Mt 21:42
dKam 19:6; Ro 12:1, 15:16; 1Kor 3:16; Ep 2:21+; Ibr 13:15+; Tur 1:6
eYesa 28:16; Ro 9:33; Ep 2:20
fMbo 118:22; Mt 21:42
gYesa 8:14+; Lu 2:34, Lu 20:18; Ro 9:22,33; Yud 4
hKam 19:5+; Kol 1:13; Tur 5:10
iRo 9:25+
jMbo 39:12; Ro 8:13; Ga 5:16+; Pil 3:20; Ibr 11:13+; Yems 4:1
kMt 5:16; Ro 12:17; 2Kor 8:21; Pil 2:15; Tit 2:8; 1Pe 3:16
lMt 22:21; Tit 3:1
mTit 2:8; 1Pe 2:12, 3:16
nRo 6:18; 1Kor 7:22; Ga 5:13; 2Pe 2:19
oSnd 24:21; Mt 22:21; Ro 12:10; Ibr 13:1; 1Pe 1:22
p1Tim 6:1+; Tit 2:9+
q1Pe 3:14,17, 4:14+
rYesa 53:9; Mt 16:24; Yo 13:15; Ŋgo 14:22; 2Kor 5:21;
sMt 27:39; Ro 12:19; 1Kor 13:5; 1Pe 3:9
tYesa 53:5; Ro 6:10+; Ibr 9:28
uYesa 53:6; Mt 9:36; Yo 10:14; Ibr 13:20

1 Peter 2

Takam kinkiini pa kini ambaiŋana ta ki Bubuŋana i

Tana kezem mbulu sananŋan ta boozomen ma timboren lup, mi kamap pa mbulu pakaamŋan ta boozomen. Mi mbulu ambaiŋana ta so kakam, na kakam kat raama leleyom. Kakam pakaamŋana pa bekena tomtom tire mi tiwit uruyom pa na pepe. Mi motoyom mburmbur mini pepe, mi kipiri sua sananŋana sa pizin tomtom mini pepe. a 

Ku'urur leleyom pa kini ŋonoono ta ki Bubuŋana i, kembei ta pikin siŋsiŋŋan lelen ilip pa tui ki nan bizin. Naso urlaŋana tiom izze, mi ila ila ma kewe kolman pa, mi kere ulaaŋa ki Anutu iur ŋonoono piom. Pa niom kotoombo Merere kampeŋana kini mi kayamaana ka mbuyeene kek. b 

Wal ki Krisi tiwe kembei Urum Merere be Bubuŋana imbot lela

Tana kamarmar kolouŋana pa Krisi bekena ipombol yom. Pa ni kembei pat mbolŋana ta mata yaryaaraŋana i. Ŋonoono, tomtom tititi. Mi Anutu, ni ire i kembei ni zaanaŋana, mi leleene pini ilip. Mi ni ta ipeikati pa uraata kini. c 

Niom tomini kewe kembei pat mata yaryaaraŋan ta Anutu iwwo urum kini pa be Bubuŋana imbot lela. Naso kewe potomŋoyom, mi kewe kembei patoronŋana ka tomtom bizin. Mi Yesu Krisi ko iwe zaala piom be kakam patoronŋana ta Anutu leleene pa i. Patoronŋana tana na, mbulu ta Bubuŋana ipiyotyooto i. d 

Ka sua ta tibeede pataaŋa kek:

Re. Nio aŋur pat zaanaŋana ta isu abal Sion.
Pat tana, nio ituŋ aŋpeikati be iwe pat mataana kana mi ruumu mbuleene ise.
Mi zin tomtom ta so tipase pini mi tiurla kini, na tasa ko ka miaŋ na som.
Zin ta boozomen ko nin se. Pa zin kola tire urlaŋana kizin ka ŋonoono. e 
Niom wal ta kuurla na, kere pat tana kembei koroŋ biibi mi koroŋ ŋonoono. Mi zin wal tau lelen be tiurla kini som na, sua lwoono ru indeeŋe kat zin:

Pat tau zin ruumu poŋana kan matan repiili mi tipiri lae lene na,
pat tamen tana ko iwe pat mataana kana be ruumu mbuleene ise. f 
Pat tana, tomtom pakan ko titutkat kumbun la, mi tisursur ma tila.
Mi pakan na, pat tana ko ikam zin ma titoptop.

Titoptop paso, tizorzooro Anutu sua kini. Mbulu tana, Anutu iur pizin pataaŋa kek. g 

Anutu wal kini tiwe kembei patoronŋana ka tomtom bizin ta timbesmbeeze pa king biibi

Mi niom na, Anutu ipeikat yom, mi ikam yom ma kewe wal tamen kek. Niom kembei patoronŋana ka tomtom bizin ta timbesmbeeze pa king biibi. Mi niom wal potomŋoyom, mi Anutu itunu wal kini. Ni iboobo yom ma kezem zugut ka mbulu, mi kelela mat kini ndabokŋana leleene kek, bekena kosoyaara mbulu kini ndabokbokŋan ta ni ikamam piom na. h 

10 Muŋgu niom kewe Anutu wal kini som. Mi koozi, ni ilup yom ma kewe wal kini potomŋan. Muŋgu, kakam muŋaiŋana kini som. Mi koozi na, kakam muŋaiŋana kini kek. i 

Tapa pai kiti ma ambai men pizin wal tau tiurla som na matan

11 O niom wal tio, toono ti, iŋgi kar tiom ŋonoono som. Iŋgi kewe leembe pa men. Tana aŋso aŋpombol yom be kamap kat pa mbulu sananŋan boozomen ta niyom izze pa i. Pa mbulu mi ŋgar ta kembei, ta ipasansaana kunuyom mata yaryaaraŋana. j 

12 Motoyom iŋgal be kapa pai tiom ma ambai men pizin wal tau tiute Anutu som na matan. Ŋonoono, zin tiŋgalŋgal sua piom ma tizzo niom kakamam mbulu sananŋana. Tamen sombe tire mbulu ambaimbaiŋan ta kakamam, inako ikam ma titooro lelen. To Anutu isombe imar be iur kadoono pizin tomtom, na zin tomini ko tipakur zaana. k 

Tombot la zin bibip kopon mbarman

[Ro 13:1-7; Ep 5:22-6:9; Kol 3:18-4:1]

13 Wal boozomen ta tiur zin be tikam peeze piti na, niom kozo kombot la kopon mbarman mi kototo tutu kizin. Pa niom kewe Merere lene kek. Tana Kaisa ki Rom na, kombot la kopo mbarmaana. l 

14 Mi zin wal ta ni iur zin be timboro lele pakan, mibe tiur kadoono pizin wal sananŋan, mi tipakur zin wal ambaimbaiŋan na, zin tomini, kozooro zin pepe. Kombot la kopon mbarman. 15 Pa Anutu, ni leleene be kakam mbulu ambaiŋana men. Naso kupumun zin wal ta tiŋgalŋgal sorok sua piom i kwon, ma sua kizin kankaanaŋana tana imap. m 

16 Ŋonoono, Krisi ikam yom ma kewe mbesooŋo mini som. Mi kere: Kokena koso ta kembei: “O, iŋgi aŋboro ituŋ. Tana sombe leleŋ be aŋkam mbulu sananŋana sa, na irao aŋkam.” Kakam ŋgar kembena pepe. Bela kakam mbulu tiom kembei Anutu mbesooŋo kini. n 

17 Tana leyom ŋger pa tomtom ta boozomen, kuur leleyom pizin toŋmatiziŋ tiom ta ki Krisi i, komoto Anutu mi keleŋ la kalŋaana, mi leyom ŋger pa Kaisa ki Rom. o 

Sua ta ila pizin mbesooŋo

[Ep 5:22-6:9; Kol 3:18-4:1]

18 Niom mbesooŋo na, kokototo ituyom, kombot la bibip tiom kopon mbarman, mi leyom ŋger pizin. Sombe zin ambaimbaiŋan mi tizzo sua luumuŋana piom, som zin sananŋan mi tikeke piom, na toŋgo. Kombot la kopon mbarman, kembeeze pizin, mi leyom ŋger pizin. p 

19 Pa tomtom sa, sombe ikamam ŋgar pa Anutu, mi iwe le uunu be tomtom tiseeze sorok mataana mi tikam yoyouŋana pini, mi sombe ni ibaada pataŋana tana ma imap, inako Anutu leleene ambai pini mi ipakuri. 20 Mi sombe kakamam mbulu sananŋana, mi tibalis yom mi kabaada pataŋana pa, ko tomtom sa iwit uruyom pa uunu tana? Som. Tamen sombe kakam mbulu ambaiŋana mi kabaada pataŋana pa, na Anutu ko leleene ambai piom mi ipakur yom. q 

Toto Yesu kumbu tuunu

21 Pa Anutu, ni iboobo yom be kakam mbulu ta kembena. Naso koto Krisi kumbu tuunu. Kere. Krisi, ni ikam sanaana sa som, mi pakaamŋana sa ipet pa kwoono som. Tamen ibaada pataŋana biibi kat bekena iuulu yom. Mbulu kini tana iwe kin piom pa mbulu tabe koto. r 

23 Indeeŋe ta tipiri sua sananŋana pini, na ni ipekel som. Mi tibalisi ma ire yoyouŋana, tamen ikam sua pamotoŋana sa pizin som. Pataŋana kini tana, ni izem la Anutu namaana. Pa ni ta itirtiiri zin tomtom mi iurur kadoono ndeeŋeŋana pizin ikot mbulu kizin kizin. s 

24 Tana Krisi ibaada sanaana kiti, mi kuliini ire yoyouŋana sala ke pambaaraŋana, bekena tamap pa sanaana kamŋana mi takam mbulu ndeeŋeŋana men. Zaaba ta tikam pini na, kwon murinmurin ta iurpe yom. t 

25 Muŋgu niom kembei sipsip ta tisaŋsaŋ pa zaala. Mi koozi na, kotooro yom, mi kimiili ma kamar ki Krisi kek. Mi ni ta imborro yom mi mataana piom kembei ta mboroŋan kizin sipsip. u 

Copyright information for `MNA