aEp 1:3; 1Pe 1:3
bRo 15:5; 2Kor 7:6
cMbo 94:19; 2Kor 4:10; Kol 1:24
d2Kor 4:15; 2Tim 2:10
eRo 8:17
fŊgo 19:23+; 1Kor 15:32
gYo 5:21; Ro 8:36
hRo 15:30+; 2Kor 4:15; Pil 1:19
i1Kor 1:17, 2:4,13; 2Kor 2:17; 1Tes 2:10
j2Kor 5:12; Pil 2:16; 1Tes 2:19
kŊgo 19:21; 1Kor 16:5+
lŊgo 18:5
mRo 15:8+; Tur 3:14
nRo 8:16+; 2Kor 5:5; Ep 1:13+; 2Tim 2:19; 1Yo 2:20,27; Tur 7:3+
o1Pe 5:3

2 Corinthians 1

Nio Paulus. Anutu itunu leleene mi iur yo ma aŋwe ŋgoŋana ki Yesu Krisi. Niamru toŋmatiziŋ kiti Timoti, ta ambeede ro ti ima piom wal ki kar Korin ta kombot la lupŋana ki Anutu na. Mi ima pa Anutu wal kini potomŋan boozomen ta timbot irao lele pakaana biibi ki Akaia na tomini.

Tamanda Anutu mi Merere Yesu Krisi ko tikampe yom, mi timboro yom ma kombot ambai. Ŋonoono.

Anutu iuluulu iti pa pataŋana kiti. Naso tarao be tu'uulu waende bizin pa pataŋana kizin

Anutu ta Merere kiti Yesu Krisi Tamaana na, iti lelende ambai pini mi tapakuri. Pa ni muŋaiŋana katuunu mi ulaaŋa kiti ŋonoono. a 

Pataŋana pareiŋana ta so ipet piti na, ni iuluulu iti, mi ipotor lelende, mi ipombolmbol iti. Naso iti tarao be tu'uulu wal pakan ta pataŋana indeeŋe zin na, mi topotor lelen, mi topombol zin. Paso, ni ipombol iti mi ipotor lelende kek. Tana iti tarao be tu'uulu wal pakan ta pataŋana indeeŋe zin na. b 

Pa Krisi ibaada pataŋana, tana iti ta tesekap la kini i, bela tabaada pataŋana tomini. Mi so pataŋana biibi, nako takam pombolŋana biibi ila ki Krisi. c 

Niam sombe ambaada pataŋana, inabe iuulu yom mi ipombol yom. Mi sombe Anutu iuulu yam pa pataŋana tiam mi ipombol yam, inako ipombol yom tomini be kemender mbolŋana mi kabaada pataŋana kembei ta niam i. d 

Tana niam amurla kat ta kembei: Niom ko kemender mbolŋana. Pa niam amute: Niom sombe kabaada pataŋana kembei ta niam, nako kakam pombolŋana kembei ta niam i. e 

Paulus isotaara zin pa pataŋana biibi ta indeeŋi isu lele pakaana ki Asia na

O niom toŋmatiziŋ tiam, niam leleyam be kuute pataŋana ta indeeŋe yam isu lele pakaana ki Asia na. Pataŋana tana biibi ma ilip kat pa mburoyam. Irao be ambaada na som. Tabe ikam ma amso ta kembei: “Iŋgi be ametmeete i.” f 

Ŋonoono kat. Mazwaana tana amyamaana kembei leyam zaala sa som, mi amso ko ametmeete. Tamen mbulu tana ipet piam bekena ampase pa Anutu tau ipei zin meeteŋan ma timaŋga mini na. Kokena ampase pa ituyam mburoyam. g 

10 Tana pataŋana biibi ta ise tiam na, ikam yam ma ambot la naala kezeene. Tamen Anutu ikamke yam. Mi ni kola ikamkewe yam. Pa niam amurla ta kembei: Kaimer sombe pataŋana sa ipet piam, mi niom ku'uulu yam mi motoyom iŋgalŋgal yam pa suŋŋana, na ni ko ikamke yam mini. Naso niomŋan wal boozomen kere, mi leleyom ambai pini, mi kapakuri. Pa suŋŋana tiom ta iur ŋonoono, mi iwe zaala pa kampeŋana kini ma ise tiam. h 

Paulus isotaara zin Korin pa uunu tau itooro ŋgar kini mi ila kizin som

12 Koroŋ biibi ta niyam ise pa i, ina ta kembei: Amyamaana la leleyam kembei mbulu ta amkamam isu toono ti na, amtoto ŋgar ki toono som. Som kat. Niam ampase pa kampeŋana ki Anutu, mi amtoto mbulu kini. Tana ampakaam som, mi amzzo sua ŋonoono men raama leleyam ŋgeezeŋana. Mi niom na, amkam kat mbulu ta kembei piom. i 

13 Mi sua boozomen ta ambeede piom na, ka ŋgar imbot mat. Irao be kapaata men mi kakam ŋgar pa. Ŋonoono, mazwaana ti amso ko niom kakam kat ŋgar piam zen. Tamen amurur motoyam pa mazwaana tabe ŋgar tiom ipet mi kikilaala kat yam. Beso aigule biibi ki Merere kiti Yesu ipet, tona niom niyom ise piam, kembei ta niam niyam ise piom. j 

15 Muŋgu nio aŋurla kembei niom kakam kat ŋgar piam. Tana indeeŋe mazwaana tana na, aŋkam ŋgar be aŋma aŋre yom muŋgu, mana aŋla pa lele pakaana ki Masedonia. Mi so aŋzem Masedonia, tona aŋmiili ma aŋma aŋre yom mini, mi niom ku'uulu yo pa pai tio ma aŋla pa Yudea. Naso kembei aŋuulu yom pa ru. k 

17 Ŋonoono, ŋgar tio tana aŋto som. Mi niom tina kere yo be parei? Nio aŋurpe kat ŋgar tio som, tana aŋtortooro sorok sua tio? Som aŋkam ŋgar ki toono mi aŋtoto ituŋ leleŋ men, tana aŋso sorok: “E, nio ko aŋma,” mana aŋsu mini mi aŋso: “Som, nio ko aŋma som.” 18 Ŋonoono kat ta Anutu, ni ta itoto sua kini na. Niam amtortooro sorok sua tiam som. Irao amso piom: “E, niam ko aŋma,” mana amsu mini mi amso: “Som, niam ko ama som,” na som. 19 Pa Anutu Lutuunu Yesu Krisi ta nio niamŋan Silas mi Timoti amsoyaara uruunu la mazwoyom na, ni itortooro ŋgar kini som. Sombe ni iso: “E, nio ko aŋkam,” na irao isu mini mi ipeleele itunu na som. Som kat. Ni zaala ta Anutu iso: “E” piti. l 

20 Pa ni ta iwe zaala pa Anutu sua kini mbukŋan ta boozomen ma tiur ŋonoono piti. Tana Yesu, ni kembei ta “E” ki Anutu. Uunu tina ta gorgori sombe tapakur Anutu, na toso “Ŋonoono” pa Yesu Krisi zaana. m 

21 Anutu itunu ta ipombolmbol yam mi niom tomini be tesekap la ki Krisi ma tuŋ. Mi iroogo iti, mi ikam ti ma tewe lene, mi ikam Bubuŋana piti kek. Bubuŋana tana, ina iwe kilalan piti kembei iti ki Anutu. Tana iti tuute: Koroŋ ta ni imbuk sua pa be ikam piti, na ni kola ikam. n 

23 Keleŋ. Iŋgi aŋso sua ŋonoono ila Anutu mataana. Mi ni iute leleŋ ma imap. Uunu ta aŋma som, ina ta kembei: Leleŋ be aŋgal motoyom som. Tanata aŋmuŋai yom mi aŋma som. 24 Mi iŋgi amkamam be amwe biibi piom mi amboro urlaŋana tiom na som. Pa niam amute: Niom kemender mbolŋana pa urlaŋana tiom kek. Mi iŋgi amso itiŋan takam uraata. Naso amuulu yom ma menmeen yom biibi. o 

Copyright information for `MNA