aSnd 11:24, 22:9; Ro 12:8; Ga 6:7+
bSnd 28:27; Pil 4:19
cMbo 112:9
dYesa 55:10; Hos 10:12; Mt 6:1+
e2Kor 8:2
f2Kor 1:11, 4:15, 8:14

2 Corinthians 9

Paulus ipombol zin Akaia kan pa pat yoŋana

Mi niom wal pakan ta kombot lele pakaana biibi ki Akaia na, irao aŋbeede sua molo piom som. Pa nio aŋute: Niom motoyom siŋsiŋ pa uraata tiŋgi. Leleyom ilip be kembeeze pa Anutu wal kini potomŋan ta timbot ŋoobo na mi ku'uulu zin. Tanata aŋwidit uruyom pizin Masedonia kan, mi aŋzzo pizin ta kembei: Indeeŋe ndaama ta ila kek mi imar na, niom kakamam uraata be kaparaŋraŋ seŋgeeri tiom tabe ila i. Mi mbulu tiom ta motoyom siŋsiŋ pa uraata ti, ina ipei ŋgar pa wal boozomen. Tana iŋgi aŋso aŋgo toŋmatiziŋ kiti tel tana ma timuuŋgu ma tima, bekena tiso yom ma kaparaŋraŋ koroŋ pataaŋa. Pa muŋgu amwit uruyom, mi amso niom ko kakam ta kembei. Kokena kakam som, to sua tiam tana iwe koroŋ sorok. Tana kere: Kokena wal pakan ki Masedonia tigaaba yo ma niamŋan ama, mi tire yom kaparaŋraŋ koroŋ som, to kanda miaŋ biibi. Pa muŋgu amwit uruyom mi amso amdemeere kat yom. Uunu tina ta aŋkam ŋgar, mi aŋso pizin toŋmatiziŋ tana ma timuuŋgu ma tima, bekena tiparaŋraŋ koroŋ biibi tabe keseŋgeere i. Koroŋ tana, niom kumbuk sua pa kek be kakam. Mi leleŋ be kakam koroŋ biibi tana raama leleyom. Kokena kulul nomoyom kembei ta wal matan konŋan i. Pa ina mbulu ambaiŋana som.

Mi motoyom iŋgal sua ta ti: Tomtom ta so izarra namaana, nako itunu ikam kampeŋana biibi. Mi tomtom ta so ilulul namaana, inako ire kampeŋana som. a 

Tana koroŋ piizi sa ta tomtom tataŋa lelen iur pa be tikam, na tikam. Kokena kakam som, to timaŋmaŋ yom, mi tinok tinok mana kakam. Pa mbulu ta kembei na, Anutu leleene pa som. Ni leleene pizin wal ta tikamam koroŋ pizin tomtom raama lelen ambai. Mi Anutu, ni irao ikampe yom biibi pa koroŋ ta boozomen. Naso karao kat pa koroŋ ta munŋaana men pa mazwaana ta boozomen, mi leyom koroŋ irao be kakam uraata ambaimbaiŋan matakiŋa ta boozomen. b 

Kembei sua ki Merere ta tibeede pataaŋa kek na iso:

Tomtom ambaiŋana, ni irairai koroŋ kini, mi ikamam pizin wal tau timbot ŋoobo na.
Tomtom ta kembei, Anutu ko mataana iŋgalŋgal mbulu kini ndeeŋeŋana ma alok. c 

10 Anutu ta ikamam kini iweniwen pizin wal tau tiwaswaaza kini, mi ikamam kanda kini i, na ni itunu ko ikam koroŋ tiom tana ma ipet ma iwe biibi, mi ikam ma mbulu tiom ndeeŋeŋana tana ipiyooto ŋonoono ambaimbaiŋan boozo. d 

11 Ni ko ikam yom ma karao kat pa koroŋ ta munŋaana men. Naso karao be kakam ulaaŋa biibi pizin tomtom pa mazwaana ta boozomen. Mi zin ko lelen ambai pa Anutu mi tipakuri pa ulaaŋa biibi tabe keseŋgeere mi amkam ma ila pizin i. e 

12 Uraata ti, niom koso kakam be kembeeze pa Anutu mi ku'uulu wal kini potomŋan ta timbot ŋoobo su Yudea na. Mi ko ikam ma wal boozomen lelen ambai pa Anutu mi tipakuri tomini. f 

13 Mi niom sombe kembeeze pa Anutu pa zaala ti, mi keseŋgeere ulaaŋa biibi ila pizin Yerusalem kan mi zin wal pakan, inako keswe kembei kuurla uruunu ambaiŋana ki Krisi mi koto kat. Tana tomtom ko tire mi tipakur Anutu piom. 14 Pa zin ko tire kampeŋana biibi kat ki Anutu ta imbotmbot salakaala yom. Tana ko lelen piom ilip, mi matan iŋgalŋgal yom pa suŋŋana.

15 Iti lelende ambai pa Anutu mi tapakuri! Pa ni ikampe iti mi ipomoozo iti pa koroŋ ndabokŋana kat. Sombe toso pa, nako toso so sua i?

Copyright information for `MNA