aŊgo 17:1
b2Tes 2:13
c2Kor 7:4,14; 1Tes 2:19
dPil 1:28
eRo 12:19; Tur 18:6+
fMt 25:31; 1Tes 3:13, 4:16
gMt 25:41; Ro 2:8; Pil 3:19; 2Pe 3:7; Tur 20:15
hŊgo 1:11; Kol 3:4; 1Tes 3:13
iYo 17:10; Pil 1:27+, Pil 2:13; Kol 1:9; 1Tes 1:2+

2 Thessalonians 1

Nio Paulus. Niamŋan Silas mi Timoti ambeede ro ti ima piom wal ki kar Tesalonika ta kesekap la ki Tamanda Anutu mi Merere Yesu Krisi, mi kombotmbot lela lupŋana ki Krisi na. a 

Tamanda Anutu mi Merere Yesu Krisi ko tikampe yom, mi timboro yom ma kombot ambai. Ŋonoono.

Pataŋana ikamam zin Tesalonika. Tamen timender mbolŋana

Niom toŋmatiziŋ tiam, mazwaana ta boozomen na, niam irao leleyam ambai pa Anutu mi ampakurkuri piom. Mi sombe amkam ta kembei, ina indeeŋe. Pa urlaŋana tiom ta izze ma izze. Mi mbulu ki lelende par piti ta kembena. Izze ma iŋgi be niom ta boozomen kombol pa. b 

Uunu tina ta amwidit uruyom lela lupŋana ta boozomen ki Anutu, mi amzzotartaara zin piom ta kembei: Pataŋana boozomen ikamam yom, mi tomtom tiseseeze motoyom. Tamen kemendernder mbolŋana, mi kikiskis urlaŋana tiom. c 

Anutu kola iur kadoono pizin tomtom ta tizorzooro uruunu ambaiŋana

Ŋonoono, iŋgi niom kerre pataŋana pa peeze ki Anutu. Tamen mbulu tiom ta kemendernder mbolŋana, ina iswe ta kembei: Kaimer sombe Anutu itiiri zin tomtom mi iur kadoono pizin, na ni ko ikam mbulu ndeeŋeŋana piom mi ire yom kembei karao be kelela kar kini. d 

Pa mbulu kini, ina indeŋdeeŋe men. Tana zin wal ta tikamam pataŋana piom na, ni kola ikam pataŋana pizin tomini, bekena ipokot mbulu kizin. e 

Mi niom ta kerre pataŋana i, na ni kola itatke pataŋana tana piom, mi ikam yom ma kombot ambai. Mi ko ikam ta kembei piam tomini. Merere Yesu ziŋan zin aŋela mbolŋan, sombe tizem saamba mi tisu ma tipet mat raama you bilbilŋana, to mbulu tana ipet. f 

To zin wal tau tiute Anutu som, mi tizorzooro uruunu ambaiŋana ki Merere Yesu na, Anutu kola ipokot mbulu kizin, mi iur kadoono pizin ta kembei: Zin ko tirao be tila ki Merere, mi timbot su kereene uunu, mi tire azuŋka kini mburaanaŋana na som. Ko timbot ndel ma tisaana kat, mi timbotmbot ta kembei ma alok. g 

10 Merere isombe imiili ma imar be ikam zaana biibi, to mbulu tana ipet. To wal kini potomŋan ta tiurla kini na, ko tiwe kwoono, mi tipakuri mi tiwit uruunu pa uraata biibi mi ndabokŋana ta ni ikam pizin na. Mi niom tomini ko kagaaba zin. Paso, indeeŋe ta amkam sua ki Merere piom na, kuurla. h 

Paulus bizin tisuŋ pizin Tesalonika kan

11 Niam amkam ŋgar pa koroŋ boozomen tana, tabe gorgori amzuŋzuŋ Anutu kiti be ikam ma bobi kini iur ŋonoono piom. Naso ire yom kembei karao be kakam mbotŋana ta ni iboobo yom pai. Mi amzuŋzuŋi be ipombol yom pa itunu mburaana. Naso karao be kakam uraata ambaimbaiŋan boozomen ta leleyom pa be kakami, mi urlaŋana tiom ko ipiyotyooto ka mbulu. To kakam Merere kiti Yesu zaana ma iwe biibi, mi ni ko ipakur yom wal ta kesekap la kinii tomini, mi ikam yom ma kombot lela azuŋka kini leleene. Tana Anutu kiti ziru Merere Yesu Krisi ko tikampe yom ta kembei. Ŋonoono. i 

Copyright information for `MNA