aEp 3:1; Pil 1:27; 1Tes 2:12
bGa 5:22+; Kol 3:12+; 1Tes 5:14
cKol 3:14+
dRo 11:36, 12:5; 1Kor 8:6, 1 Kor 12:4,11+; Ga 3:27+
eRo 12:3,6; 1Kor 12:11
fMbo 68:18; Kol 2:15
gYo 3:13
hŊgo 1:9; Ep 1:21+; Ibr 4:14
iRo 12:6+; 1Kor 12:27+
jKol 1:24; 2Tim 3:17
k2Kor 3:18; Kol 1:28, 2:2
l1Kor 14:20; Ibr 13:9; Yems 1:6
mEp 1:22; Kol 1:18; 2Pe 3:18; 1Yo 3:18
nKol 2:19
oRo 1:21; Ep 2:12; 1Pe 1:14, 4:3
pRo 1:24; Kol 3:5; 1Tes 4:5
qEp 4:17; Kol 3:9; Ibr 12:1; 1Pe 2:1
rYo 3:3; Ro 12:2; Kol 3:10
sRo 6:4; 2Kor 5:17; Ep 2:10; Kol 3:10
tSek 8:16; Ro 12:5; Kol 3:8+
uMbo 4:4; Mt 5:22+; Yems 1:19+
wŊgo 20:34; 1Tes 4:11+; 2Tes 3:8+
xMt 12:36; Ep 5:4; Kol 3:8
yRo 8:23; 2Kor 1:22, 5:5; Ep 1:13+; 1Tes 5:19; Tur 7:3
zMt 6:14; Kol 3:13

Ephesians 4

Koroŋ pakan ta ilup Krisi wal kini

Tana nio ta aŋbotmbot lela ruumu sanaana ti pa Merere zaana na, aŋso aŋpombol yom be kapa pai tiom ma ambai men. Kakam ta kembei, to indeeŋe. Pa Anutu iboobo yom ma kewe lene kek. a 

Tana kokoto kat ituyom, mi kakam mbulu luumuŋana men pa waeyom bizin ta ki Krisi i. Mi sombe tikam ŋoobo yom, som tikam pataŋana piom, na keteyom malmal pizin pepe. Kabaada men, mi ku'urur leleyom pizin. b 

Pa Bubuŋana, ni ilup ti ma tewe wal tamen kek. Tana kakam kinkiini be kopombolmbol lupŋana ki Krisi ma imbot ambai. c 

Kere. Krisi, lupŋana kini tamen ta imbotmbot. Ina iti tomtom ta tuurla kini na. Mi Bubuŋana ta kembena. Tamen ta imbotmbot. Mi indeeŋe Anutu iboobo iti ma tewe lene na, iboobo iti be tuur matanda pa koroŋ tamen. Ina mbotŋana ki kar saamba. Mi Merere tamen imbotmbot, urlaŋana tamen imbotmbot, mi takam yok be tewe Merere tamen lene. Mi Tamanda Anutu tamen ta imbotmbot. Ni koroŋ imap katuunu. Mi izeebe koroŋ ta boozomen, mi koroŋ ta boozomen tiwe zaala pini be ikamam uraata kini. d 

Anutu iur uraata matakiŋa ma irao iti

Krisi, ni ikampe iti tomtom tataŋa, mi ikam lende uraata matakiŋa ma ikot ti be topombol lupŋana kini. Ito itunu leleene tau. e 

Ka sua imbot pataaŋa kek ta kembei. Iso:

Ni iporou ma ilip, ta ikam ka koi bizin ma tisala, mi ipamaala zin ila iwal biibi matan.
Mi ipomoozo zin tomtom, mi ikam len koroŋ ambaimbaiŋan. f 
Sua ta iso ni isala kor na, ina ka uunu parei? Ka uunu ta kembei: Ni isala men som. Muŋgu ikoto itunu, mi isu toono, mi imeete ma isula kat ta toono. g 

10 Tana ni ta isu, mi ni tana ta imiili ma isala pa saamba, mi izem ma isala ta kor a. Naso izeebe koroŋ ta munŋaana men, mi koroŋ ta boozomen timap timbot la ni kopo mbarmaana. h 

11 Mi ni ipomoozo lupŋana kini pa koroŋ ambaimbaiŋan matakiŋa. Pa iur tomtom pakan ma tiwe ŋgoŋana kini, mi pakan tiwe kwoono bizin, mi pakan tizzoyaryaara uruunu ambaiŋana pizin wal tau tiurla som na. Mi pakan na, len uraata be timboro zin tomtom mi tipaute zin pa sua ki Anutu. i 

12 Ni iur zin wal ta kembei, bekena tiurpe Anutu wal kini ta boozomen. Naso tirao be tikam uraata ambaimbaiŋan, mi timbeeze pini, mi tipombol lupŋana ki Krisi. j 

13 Mi ko ila ila ma irao iti ta boozomen ŋgar kiti iwe tamen, mi tuurla raraate, mi tuute Anutu Lutuunu raraate. Pa urlaŋana kiti ko izze ma tewe kolman pa, mi ila ila ma mbulu kiti raraate pa mbulu ki Yesu Krisi. k 

14 Tana iti takam mbulu kembei ta zin naŋgaŋ munmun mini pepe. Kokena takan la sorok sua ma ŋgar kizin wal pakamkaamŋan ta tipandelndel zin tomtom mi tikurru lelen pa mbulu kizin bozboozo. To tewe kembei wooŋgo ta miiri ma duubu tipambiŋbiŋ mataana ma ila kena, ila kena. l 

15 Tana takam kembena pepe. Bela toto sua ŋonoono men, mi tuur kat lelende pizin tomtom. Naso mbulu ta boozomen ki Krisi itum la lelende, mi tewe kembei ta ni. m 

16 Pa iti tomtom ta tewe kembei Krisi namaana ma kumbuunu ma koroŋŋana ta boozomen. Mi ni ta iwe uteene piti, mi ikamam peeze piti, mi ikis ti ma tombot la murindi murindi. Mi sombe mbukunbukun ta boozomen tiparkis zin, mi itundu takamam uraata kiti kiti, mi tuur lelende par piti, inako lupŋana ki Krisi ipet ma iwe biibi mi imbol. n 

Zaala popoŋana ki Krisi

17 Tana nio aŋso sua mbolŋana piom pa Merere zaana ta kembei: Kapa pai tiom kembei zin wal ta matan munŋan mi tiute Anutu som na pepe. Pa ŋgar kizin na, ŋono somŋana. Mi mbotŋana ta ki Anutu i na, zin tiute risa som. Pa zitun tizeeze talŋan, o 

19 tanata tiyamaana sanaana kizin mini som, mi tikankaana. Mi tirao be tiyaraama zitun som, mi nin zze pa mbulu soroksorok ta boozomen. p 

20 Kere. Indeeŋe tipaute yom pa Krisi na, tiso yom pa ka mbulu ta kembei? Som. 21 Niom keleŋ Krisi kalŋaana kek. Mi sua ŋonoono ta Yesu iswe piti na, tipaute yom pa kek. 22 Mi tiso piom ta kembei: Mbulu tiom muŋguŋana ramaki leleyom muŋguŋana ta ipakamkaam yom, mi ikamam ma niyom izze pa mbulu bozboozo, mi ipasansaana yom na, kikinke ma tila len kembei ta mburu sananŋana. q 

23 Bela Anutu itooro leleyom mi ŋgar tiom ma iwe popoŋana kat. r 

24 Naso Anutu ikam yom ma kewe kembei tomtom popoŋana, mi kakam mbulu ta ndeeŋeŋana mi potomŋana men kembei ni itunu. s 

25 Tana, niom ta boozomen kezem mbulu ki pakaamŋana ma imborene, mi kaparzzo sua ŋonoono men piom. Pa iti ta boozomen taparlup ti ma tewe wal tamen kek. t 

26 Mi sombe keteyom malmal, na kikiskis pepe. Kokena kakam sanaana. Tana loŋa mi kuurpe leleyom, mana zoŋ isula. u 

27 Kokena keteyom malmal ma kombotmbot, to iwe zaala pa Tomtom Sanaana. v 

28 Mi zin wal ta so tikemem, na timap pa kuumbu kamŋana, mi timaŋga ma naman ikam uraata. Naso zitun len koroŋ, mi tirao be tikam pizin wal ta timbot ŋoobo na tomini. w 

29 Mi sua sananŋana sa ipet pa kwoyom pepe. Koso sua ambaiŋana men ta irao iuulu zin tomtom, mi ipei ŋgar kizin, mi ikam ma lelen ambai. x 

30 Mi kapasaana Anutu Bubuŋana Potomŋana leleene pepe. Pa ni ta iwe kilalan piom kembei niom wal ki Anutu. Mi sombe izeebe yom, na niom kuute: Sombe ka nol ipet, tona Krisi ko imar mi iyo yom ma kala kombot su kar kini. y 

31 Tana mbulu ki lelende iŋgis, mi ketende malmal, mi ketende ibeleu, mi kalŋanda izalla, mi taŋgalŋgal sorok sua, ramaki mbulu matakiŋa ki tuur koi na, kiziiri ma ila ne. 32 Mi kaparkampewe yom, mi leleyom zanzaana par piom, mi kaparurpewe leleyom, mi motoyom mbiriizikaala sanaana ki waeyom bizin, kembei Anutu ireege sanaana tiom paso, Yesu Krisi ta ndomoono piom. z 

Copyright information for `MNA