Exodus 25

Mose imbotmbot sala abal Sinai uteene, mi Yooba isope i pa beeze potomŋana tabe zin Israel tipo i. Beeze tana be iwe Anutu muriini, mi iwe kilalan pizin Israel kembei Anutu igabgaaba zin ma ziŋan tiwwa.

Yooba iur sua pizin be tiyogeege pat milmilŋan, sipsip rumunrumun ta tiurpe ma iwe kawaala na, mbili kulin matakiŋa, ke mbolmbolŋan, ŋgere kuzinŋan, mi pat ndabokbokŋan matakiŋa, bekena tipo beeze tana pa mi tiurpe ka aigau. Beeze tana, Yooba itunu ikam ŋgar pa. To iso Mose pa, be ni kadoono ila to iso zin Israel pa, mi tikam ka mburu be tipo (Re Ibr 8:5).

Beeze ka kin ta kembei: Molo kini irao re lamata mi tel (15 mita), mi babaŋana kini irao re tel (5 mita), mi kor kana irao re tel (5 mita). Mi tidaada kawaala biibi ma isekaala ruumu pakaana musaana tabe iwe potomŋana ŋonoono kat i (Re Mt 27:51, Mk 15:38, Ibr 9:3). Pakaana musaana tina na, koror ta imbotmbot lela. Koror tana, tiurpe pa ke mi tipakap gol ila leleene mi mat kana tomini. To tiur pat babaŋan ru ta Yooba ipun tutu kini ise na isula. Mi tisap ke ma kembei ta aŋela ru, to tipamender zin sala koror tana ndemeene. Koror tana, tipaata tisombe Sua Mbukŋana Ka Koror. Ina tire kembei Yooba muriini peeze kana, mi iwe kilalan pizin kembei Yooba itunu imbotmbot raama zin (Re Tur 11:19).

Beeze tana, tikoto pa kawaala bibip paŋ. Kawaala ta leleene kana na, ka mos ambaiŋana kat. Tiurpe pa teret ta totoŋana, siŋsiŋŋana, mi keskeezeŋana na. Mi aŋela kunun imbot la. Mi kawaala ta iwe ru pa na, tiurpe pa mekmek rumuunu. Mi iwe tel pa na, tiurpe pa mbili kulin ta titooro raama koroŋ pakan ma iwe siŋsiŋŋana. Mi kawaala ta iwe paŋ pa na, tiurpe pa laboi kuliini.

Indeeŋe aigule tamen ŋonoono ikot ndaama ta boozomen na, biibi kizin patoronŋana kan itutamen ilela beeze leleene ta musaana na, mi itiyaryaara siŋ ki mbili isala koror tana, bekena Yooba ireege sanaana ta boozomen kizin Israel ma imap, mibe ziŋan tiparlup zin mini (Re Ibr 9:7,24-26, 10:1-4). Tana tiwatwaata koror tana kwoono be Sanaana Reegeŋana Muriini. Mi patoronŋana ka tomtom toro sa, som tomtom sorok sa irao ilela ruumu leleene musaana ta potomŋana ŋonoono kat na som. (Re Ibr 10:19-21).

Beeze leleene biibi, ina potomŋana tomini. Tamen potomŋana ŋonoono kat kembei leleene ta musaana na som. Tana zin patoronŋana kan ta boozomen tirao be tilela mi tikam uraata pa. Mi leleene biibi tana, koroŋ tel timbotmbot pa.

Ta, ina mbalia ta tiurpe pa ke mi tapakap pa gol na. Mbalia tana, tiŋgasŋgas narabu potomŋana izze be Yooba ire. Narabu tana, zin patoronŋana kan men ta tirao be tikan. Mi zin iwal biibi na som (Re Mk 2:26).

Mi koroŋ toro ta iwe ru pa, ina be iur mat pa ruumu. Tiurpe pa gol. Koroŋ tana kiini tamen. Mi isala kor, to ibogboogo ma iwe lamata mi ru. Mi ka lam lamata mi ru ta timbotmbot se.

Mi iwe tel pa na, you muriini ta tiurpe pa gol be tiruk ŋgere kuziiniŋana isala. Zin patoronŋana kan tirukruk ŋgere pa mankwoono mi rou, ikot aigule ta boozomen (Re Lu 1:8-10).

Tana koroŋ tel tana, ta timbotmbot lela ruumu leleene biibi ta imbot pet mat na (Re Ibr 9:2-5). Koroŋ tel tana tipaute iti kembei Merere, ni potomŋana mi ndabokŋana kat. Mi ni ta kini mata yaryaaraŋana, mi mataana piti pa kanda kini ma koroŋ. Mi ni azuŋka katuunu ta iurur mat piti.

Beeze kereene na, timbiiri biibi kat imbotmbot. Timbiiri tana, yok isula ma imbotmbot. Yok tana be tiŋgurŋguuru naman ma kumbun pa. Mi patoronŋana muriini imbot maare ri pa timbiiri biibi tana. Pa bela Anutu ireege sanaana kizin, mi ipus zin ma tiŋgeeze kat, tona tirao be tipet kereene uunu.

Mat kana na, tidaada kawaala biibi ta mbolŋana na, ma ipapiliu beeze tana bekena iwe siiri pa Merere muriini. Muriini tana, ka kin ta kembei: Molo kini na, re tomoota mi lamata (44 mita). Mi babaŋana kini na, re laamuru mi tel (22 mita). Mi kawaala ta tidaada na, ina re ta mi suruunu, ta isu mi isala.

Zin patoronŋana kan na, Yooba isope Mose pa mburu kizin, uraata kizin, mi mbulu tabe timaŋga pa uraata kizin i. Mi zin men ta zan be tilela beeze potomŋana ki Merere. Mi zin iwal biibi na som.

To Yooba iur sua pa Mose ta kembei: Zin tomooto ta ndaama kizin irao tomoota na, bela timap tiŋgiimi zitun la ki Yooba. Tiŋgimgiimi zitun pa pat sekel pakaana. Sombe tiŋgiimi zitun, to tiur ka pat ila kizin patoronŋana kan, mi zin tiur lae be imboro uraata pakan.

Tana Mose ziru Yooba timbotmbot sala abal Sinai uteene, mi Yooba itunu iso i pa koroŋ ta boozomen tana. To ipun tutu laamuru ise pat babaŋan ru, mi iur la ki Mose.

...
Copyright information for `MNA