bRo 4:17
cLu 1:55
dŊgo 7:5
eŊgo 7:8; Ro 4:11
gRo 4:19

Genesis 17

Merere iur reeteŋana ma iwe kilalan pa sua mbukŋana

Indeeŋe Abaram ndaama kini irao 99 na, Merere ipet kini mini mi iso pini ta kembei: “Nio Anutu mburoŋ keskeezeŋoŋ. Tana pa pai ku ma ndabok men pa nio motoŋ. Naso ituru taparlup ti ma tewe tamen, mi aŋkam popoŋana ku ma tipet ma tiwe boozo.”

Tona Abaram iŋgun kumbuunu pini mi uteene isu toono. To Anutu iso pini mini ma iso: “Nio aŋbuk sua pu ta kembei: Nio ko aŋkamu ma we zin karkari boozomen taman. Tana koozi mi ila, nako zom Abaram mini som. Ko aŋpaata zom be Abaraam.
(17:5) Pisis Abaram ka uunu ta kembei: ‘tamaana zaanaŋana.’ Mi pisis ‘Abaraam’ na, ka uunu ta kembei: ‘wal uunu boozomen taman.’
,
b 

Mi nio ko aŋkam popoŋana ku ma tipet ma timasak, ma tiwe wal un boozo. Mi kizin pakan ko tiwe king.

Sua ta koozi aŋbuk ima ku na, kaimer ko aŋpombol mini pa lutum bizin, tumbum bizin, mi iseeŋge iseeŋge ma ila. Tana sua tiŋgi ko imbol ma imbotmbot ma alok. Sua ta kembei: Nu niomŋan popoŋana ku tabe tipet pa kaimer i, na nio ko aŋwe Anutu tiom. c 

Mi toono ta boozomen ki Kanaan ta koozi nu we leembe pa i, ko aŋkam ma iwe leyom. Nu mi zin popoŋana ku tabe tipet pa kaimer i. Toono tiŋgi ko iwe leyom be kombotmbot pa ma alok. Tana nio ko aŋwe Anutu kizin popoŋana ku, mi zin timbesmbeeze pio.” d 

To Anutu iseeŋge sua kini mini, mi iso pa Abaraam ta kembei: “Nu niomŋan popoŋana ku kozo motoyom iŋgalŋgal sua tio mbukŋana taiŋgi mi kototo, mi iseeŋge iseeŋge ma ila. Tana nu mi popoŋana ku ta boozomen tabe tipet pa kaimer i, bela tireete yom ma kamap. e 

11 Mbulu tabe kakam pa kuliyom, ina iwe kilalan pa sua mbukŋana kiti. Sua tana ko imbotmbot ma alok. Lutuyom bizin, sombe tisu ma kan aigule iwe lamata mi tel, tona kereete zin. Mi zin mbesooŋo tiom ta nan bizin tipeebe zin isu ruumu tiom, ziŋan zin mbesooŋo tiom ta kiŋgiimi zin ila kar molo na, zin tomini kereete zin.

14 Mi sombe tomtom sa, ni tireeti som, nako irao imbot la mazwoyom som. Keseri ma ila ne. Pa ina ni izooro la sua tio mbukŋana taiŋgi.”

Anutu iso Sarai be ipeebe pikin tomooto

15 Mi Anutu iso mini pa Abaraam ta kembei: “Kozo paata kusim zaana be Sarai mini pepe. Paati be Sara.
(17:15) Pisis Sara ka uunu ta kembei: ‘moori zaanaŋana.’
16 Pa nio ko aŋpomboli bekena ni irao ipeebe lem pikin tomooto. Mi ni ko iwe wal boozomen tumbun moori. Mi popoŋana kini pakan ko tiwe king.”

17 Abaraam ileŋ sua tana, tamen iurla som. Ni iŋgun kumbuunu mi ituundu mi iseeŋge. Pa ikam ŋgar pa ta kembei: “A, iŋgi sa aŋwe kolman kek na. Tomtom ta sombe ndaama kini irao tomto lamata, ko irao be ipeebe? Mi Sara tomini, ni ndaama kini irao tomto paŋ kwoono laamuru. Ko irao be ipeebe?” g 

18 Tana Abaraam iso pa Anutu: “Ina ambai. Mi lutuŋ Ismael imbotmbot i. Nio leleŋ be kampe i mi motom pini.”

19 Tamen Anutu iso: “Soom. Kusim Sara, ta ko ipeebe lem pikin tomooto. Mi pikin tana, kozo paata zaana be Isak.
(17:19) Pisis Isak ka uunu ta kembei: ‘iseeŋge.’
Sua ta aŋbuk ima ku, nako iur ŋonoono se kini mi popoŋana kini tabe tipet pa kaimer i, mi iseeŋge iseeŋge ma ila.
20 Mi nu wi yo be motoŋ pa Ismael, tana nio ko aŋkam ta kembena. Nio ko aŋpomboli mi aŋkam popoŋana kini ma tipet ma tiwe boozo kat. Uunu laamuru mi ru ko tiyooto pini. Mi nio ko aŋkam zin ma tiwe wal boozo kat. 21 Tamen ndaama tiŋgi imap, tonabe Sarai ipeebe Isak. Mi sua ta aŋbuk ima ku, nako iur ŋonoono se kini mi popoŋana kini.” 22 Anutu iso sua pa Abaraam makiŋ, to izemi mi ila lene.

23 Indeeŋe kat aigule tana na, Abaraam ito Anutu kalŋaana mi ireete tomooto kini ta boozomen. Ireete lutuunu Ismael, mi zin mbesooŋo ta ni iŋgiimi zin na, mi zin mbesooŋo ta nan bizin tipeebe zin su ruumu kini na. 24 Tana indeeŋe Abaraam ndaama kini irao tomto paŋ kwoono lamoromata mi paŋ (99), mi lutuunu Ismael ndaama kini irao laamuru mi tel na, tireete ziru. Mi aigule tamen ta tana na, tireete zin mbesooŋo kini tomini. Zin ta Abaraam iŋgiimi zin na, mi zin ta nan bizin tipeebe zin su ruumu kini na.

Copyright information for `MNA