aKol 2:17; Ibr 8:5, 7:19; 9:9+
cMbo 40:6+, 50:9
dHos 6:6; Mt 9:13, 12:7
eYo 17:19; Ro 6:10; Ibr 9:28; 1Pe 2:24
fMk 16:19; Kol 3:1; Ibr 1:3, 8:1
gMbo 110:1; Ibr 1:3
hYer 31:33+; Ibr 8:10+
iYer 31:34
jMt 27:51; Yo 10:9, 14:6; Ep 2:18, 3:12
kIbr 4:14
lŊgo 22:16; Ep 5:26; Ibr 9:14
m1Kor 1:9; 1Tes 5:24; Ibr 3:6
nIbr 3:13
oŊgo 2:42; Ro 13:11; Pil 4:5; Kol 3:16
pIbr 6:4+; 2Pe 2:20+; 1Yo 5:16
q2Tes 1:7+; Ibr 12:29; Tur 20:15
rMt 26:28; Ep 4:30; Ibr 2:2+, 12:25
sLo 32:35; Ro 12:19
tMbo 50:4, 135:14
uLu 12:5; 2Kor 5:11
vPil 1:29+
w1Kor 4:9; Pil 4:14; 1Tes 2:14
xMt 6:20; Ŋgo 5:41; Ibr 13:3; 1Pe 1:4+
yMt 5:12
zLu 21:19; Ibr 6:12, 12:1; Tur 13:10
aaHab 2:3+; Ro 1:17; 2Pe 3:9
ab1Tes 5:9; 2Pe 2:20+

Hebrews 10

Meeteŋana ki Krisi ta patoronŋana ŋonoono

Tutu ta zin Yuda titoto pa patoronŋana na, koroŋ ŋonoono som. Ina iwe kembei koroŋ ŋonoono kunuunu men. Pa ipatooŋo iti pa koroŋ ambaiŋana ta ipet pa kaimer na. Kere. Ndaama ndaama ta tikamam mbulu raraate men, mi tipunun zin mbili pa patoronŋana. Paso, zin wal ta tiso tila ki Anutu mi tisuŋ pini na, patoronŋana ta kembei irao iurpe zin ma tiŋgeeze kat pa Anutu mataana na som. Som ma som kat. Mibe ipus kat zin ma sanaana kizin imap kat, so tiyamaana zitun kembei sanaana kizin ipakaala zin pa Anutu mini som, mi mbili punŋana imap. a 

Mi iŋgi som. Pa tinoknok mbili punŋana. Tabe ikam ma ndaama ta boozomen matan lala pa sanaana kizin. Pa makau mi mekmek siŋin irao ireege sanaana na som. Som ma som kat.

Tana indeeŋe Krisi be isu toono na, iso pa Anutu ma iso:

Patoronŋana ta tikamam pa mbili mi koroŋ pakan na, nu lelem pa som.
Mi nu paraŋraŋ ituŋ kuliŋ kek be iwe muriŋ mi aŋbot pa.
(10:5) Iŋgi iso pa mazwaana ta Maria ipeebe Yesu isu toono.
,
c 
Mbulu ta tineneene zin mbili sala artaal ma tiwe gubuunu men, mi tipunun zin mbili bekena tireege sanaana, ina nu lelem pa som.
Tana nio aŋre ma som mi aŋso:
“O Anutu, nio aŋmbotmbot i.
Koŋ sua ta tibeede se ro pataaŋa kek.
Nio aŋmar be aŋto lelem.”

Tana kere. Muŋgu Krisi iso ta kembei: “Patoronŋana ta tikamam pa mbili mi koroŋ pakan, mi mbulu ta tineneene zin mbili sala artaal ma tiwe gubuunu men, ina nu lelem pa som.” Ŋonoono, mbulu tana, tutu iso ta tikamam. Tamen ni iso Anutu leleene pa mbulu tana som. d 

To isu mini mi iso: “O Anutu, nio aŋmbotmbot i. Nio aŋmar be aŋto lelem.” Sua tiŋgi iswe ta kembei: Zaala muŋguŋana ki patoronŋana na, ni iyembut, mi ipekel pa itunu uraata kini. 10 Pa Yesu Krisi ito Anutu leleene, mi izem itunu ma imeete pa tamen ŋonoono bekena ireege sanaana kiti. Mi uraata kini tana, ta ikam ti ma tewe potomŋanda. e 

11 Zin patoronŋana kan ta boozomen tinoknok mbulu tamen pa patoronŋana ikot aigule ta boozomen. Tamen patoronŋana kizin irao ireege sanaana ma ila ne na som. 12 Mi Krisi, ni ikam patoronŋana tamen ŋonoono bekena ireege sanaana kizin tomtom, to isala pa saamba mi mbuleene su ta Anutu namaana woono a. Paso uraata ki patoronŋana ta ni iposop ma imap kek. Mi patoronŋana kini tana mburaana ko imbol, mi imbotmbot ta kembei ma alok. f 

13 Tana iŋgi ni imbotmbot saamba mi izza be Anutu ikoto ka koi bizin ma mburan imap kat mi kumbuunu ise ŋguren. g 

14 Pa patoronŋana kini tamen ŋonoono tana, ina iurpe zin tomtom pataaŋa ma tiŋgeeze kat pa Anutu mataana be timbotmbot ta kembei ma alok. Mi ina zin wal tau ni ikamam uraata pizin be itooro zin ma tiwe potomŋan kat.

15 Bubuŋana Potomŋana tomini ipombol ti be tuurla sua tiŋgi. Pa mataana mi isombe:

16 Zaala popoŋana tabe aŋur pizin Israel i, ko ta kembei:
Kaimer, nio ko aŋkam tutu tio ma imbol la lelen,
mi aŋbeede la ŋgar kizin tomini. h 
17 To iseeŋge sua kini ma iso:

Mi sanaana mi zooroŋana kizin na, nio ko aŋreege,
mi motoŋ la pa mini som.” i 
18 Tana kere. Sombe Anutu ireege sanaana kek, na iti irao be takam mini patoronŋana sa pa sanaana reegeŋana na som.

Tala kolouŋana pa Anutu raama lelende, mi tuurla kat kini

19 Tana niom toŋmatiziŋ tio, iti lelende iwe ru mini pepe, mi tomoto mini pepe. Koozi iti tarao be telela kat ki Anutu. Paso, Yesu izem itunu ma imeete, mi siŋiini iurpe lende zaala popoŋana mi mburaanaŋana kek. Zaala tana, ta ikamam mbotŋana mata yaryaaraŋana piti. Mi zaala tana ilela pa beeze ŋonoono ta imbot saamba a, mi izem kawaala biibi ta muŋgu ipakaala iti pa Anutu na, mi ilela kat ki Anutu ta lele potomŋana ŋonoono a. j 

21 Mi iti lende patoronŋana ka tomtom zaanaŋana ta imborro Anutu wal kini mi koroŋ kini ta boozomen. k 

22 Tana matanda lala pa sanaana kiti mini pepe. Pa Yesu siŋiini ipus ti ma lelende iŋgeeze, mi takam yok ŋgalaŋŋana kek. Tana iti talala kolouŋana pa Anutu raama lelende, mi tuurla kat kini. l 

23 Mi koroŋ ambaiŋana ta Anutu imbuk sua pa be ikam piti i, na lelende iwe ru pa pepe. Pa Anutu, ni itoto sua kini. Tana tezem sua mbukŋana tana pepe. Tikiskis ma imbol la lelende, mi tezzwe pizin tomtom. m 

24 Mi matanda iŋgalŋgal be taparpombolmbol ti pa mbulu ki lelende par piti ramaki mbulu mi uraata ambaimbaiŋan ta boozomen. n 

25 Mi mbulu ki tuluplup ti pa suŋŋana na, tezem pepe. Pa kere. Iŋgi nol biibi imar igarau kek. Tana matanda iŋgal be tuluplup ti mi taparpombolmbol ti. Iŋgi aŋso paso, tomtom tiom pakan timama pa lupŋana pe som. o 

Tikiskis urlaŋana kiti mi temendernder mbolŋana. Pa sombe tipizil ndemende pa Krisi, inako lende zaala toro sa mini som

26 Tana kere yom. Pa sombe ŋgar kiti ipet pa sua ŋonoono ma takan la kek, to tusu mini, mi tonoknok sanaana kamŋana, inako lende patoronŋana toro sa be ireege sanaana kiti som. p 

27 Pa wal ta kembei na, zan imap kek. Tikam ko tikam so? Som. Tanata motoŋana biibi ikam zin ma timbotmbot, mi tizza men kadoono tabe Biibi iur pizin i. Mi ina you biibi tabe ikan zin wal ta tizorzooro Anutu na. q 

28 Kakam ŋgar pa tutu ki Mose. Tutu tana mbolŋana kat. Sombe tomtom sa izooro, mi sombe wal ru, som tel sa tire kati mi tiswe i, na bela tipuni ma imeete. Irao timuŋai i na som. 29 Kere. Sombe mbulu ta kembei iwedet pizin tomtom ta tizooro Mose tutu kini, inako parei pa tomtom ta so mata pasom Anutu itunu Lutuunu? Ni kola ikam kadoono ta sananŋana kat. Pa Krisi siŋiini potomŋana ta ireere bekena ipombol sua mbukŋana ki Anutu, mi ikam tomtom tana ma iwe Anutu lene na, ni irepiili kembei koroŋ sorok. Mi Bubuŋana tau ipiyotyooto kampeŋana ki Anutu piti na, tomtom tana kwoono ipasomi. r 

30 Mi iti tuute: Anutu sua kini iso ta kembei:

Nio ituŋ ko aŋpokot mbulu kizin tomtom, mi aŋur kadoono pizin. s 

Mi sua lwoono toro iso ta kembei. Iso:

Merere ko itiiri wal kini pa mbulu kizin, mi iur kadoono pizin. t 

31 Tana iti tomoto Anutu mata yaryaaraŋana. Pa ni namaana alalalŋana. Irao toko pini na som. u 

32 Motoyom ila pa ta muŋgu na. Indeeŋe ta mata popoten mi Anutu ipei ŋgar tiom ma kombot mat pa uruunu ambaiŋana na, pataŋana biibi ikam yom pa Krisi zaana. Tamen kezem urlaŋana tiom som, mi kemender mbolŋana. v 

33 Mazwaana pakan tipamender yom ila iwal biibi matan, mi kwon pasom yom mi tiseeze motoyom. Mi mazwaana pakan tikam mbulu ta kembei pa waeyom bizin pakan. Tabe leleyom isaana pizin, mi kagaaba zin ma niomŋan kabaada pataŋana kizin tana. w 

34 Mi indeeŋe tau tikis waeyom bizin pakan ma tiur zin lela ruumu sanaana na, leleyom isaana pizin mi ku'uulu zin. Mi indeeŋe tau tomtom timar, mi tiyo len koroŋ tiom ma tila na, leleyom ambai men. Paso, niom kuute ta kembei: Leyom koroŋ ambaiŋana toro ta ilip kat pa koroŋ ta tikam ma tila na. Koroŋ ambaiŋana tana, koroŋ ŋonoono. Mi ko imbotmbot ma alok. x 

35 Tana mbulu tiom ta komoto som mi kemender mbolŋana na, kezem pepe. Pa kaimer ko ka kadoono ambaiŋana ta biibi kat. y 

36 Tana kemender mbolŋana. Naso koto Anutu leleene, mi sua kini mbukŋana iur ŋonoono piom. z 

37 Pa Anutu sua kini iso ta kembei. Isombe:

Molo som to ni tabe imar i, ko imar ipet.
Ni ko inaunau som.
38 Mi tomtom ta so iwe ndeeŋeŋana pa nio motoŋ na, urlaŋana kini ko ikam peeze pini.
Tamen sombe tomtom sa imoto kana, mi izem urlaŋana kini, nako leleŋ ambai pini som. aa 
39 Mi iti kembei zin wal ta timototo kan, mi tizem urlaŋana kizin na som. Pa wal ta kembei ko tila len. Iti na, tikiskis urlaŋana kiti bekena tombot matanda yaryaara ma alok. ab 

Copyright information for `MNA