a1Sam 16:1; Yo 7:42
bŊgo 13:52; Rom 15:13
cYesa 9:6; Mt 1:16,21; Ŋgo 2:36; Yo 3:17; 1Yo 4:14
eYesa 57:19; Lu 19:38; Yo 14:27; Ro 5:1; Ep 2:14
fLu 2:51
gUn 17:10; Mt 1:21,25
hWkp 12:2+
iKam 13:2,12
jWkp 12:8
kYesa 40:1
lUn 46:30; Pil 1:23
mYesa 40:5, 52:10; Lu 3:6
nYesa 42:6, 49:6; Ŋgo 13:47, 26:23
oYesa 8:14; Mt 21:42+; Yo 19:25; Ro 9:32+; 1Kor 1:23; 2Kor 2:16; 1Pe 2:7+
p1Tim 5:5
qYesa 52:9; Lu 1:68
rMt 2:23
sLu 1:80, 2:52
tKam 23:14+
uMt 7:28
vYo 2:16
wMk 9:32; Lu 9:45, 18:34
xKam 20:12; Lu 2:19
yLu 2:40

Luke 2

Pepe ki Yesu

[Mt 1:18-25]

Indeeŋe mazwaana tana na, Kaisa Augustus iur sua be wal boozomen ta timbot la Rom kopo mbarmaana na, timap ma tila be tikam zan se ro. Iŋgi zan urŋana mataana kana ta ipet indeeŋe Kirinius ikamam peeze pa lele pakaana ki Siria na. Tana iwal timap ma tilala pa kar kizin kizin be tiur zan.

Mi Yosep tomini, ni izem kar Nasaret ta imbot Galilea na, mi isala pa kar ki Dabit, zaana Betelem, ta imbot Yudea na. Paso, ni uunu ipet la ki Dabit. a 

Tana ni ziru Maria ta tiroogi pini be iwooli na, tila be tiur zan. Indeeŋe ziru timbotmbot Betelem na, Maria kopoono iwe roŋroŋ kana be ikam tomtom. Mi ipeebe pikin tomooto muŋgamuŋga, to izuki pa kawaala, mi ipegeeni sula koror ta imbot la mbili murin na. Tana timbotmbot raama zin mbili. Paso, len murin toro sa be timbot pa i som.

Aŋela tipet kizin mboroŋan kizin sipsip

Kar zilŋaana na, mboroŋan pakan timborro sipsip kizin pa mbeŋ. Molo som na, aŋela ki Merere ipet kizin. To azuŋka ki Merere iyaara su ma iliu zin. Tabe motoŋana biibi ikam zin ma tisaana kat. 10 Tamen aŋela iso pizin. Iso: “Komoto pepe. Keleŋ. Nio aŋmar be aŋso yom pa uruunu ambaiŋana tabe ikam yom ta munŋaana men ma menmeen yom biibi. b 

11 Mbeŋ ta koozi, Ulaaŋa tiom, ni tipeebi isu kar ki Dabit kek. Ni Mesia, mi ni Merere tiom. c 

12 Mi koroŋ tiŋgi ko iwe kilalan piom: Kala, to ko kere pikin ta tizuki pa kawaala, mi ikenne sula koror ta imbot la mbili murin na.”

13 Molo som na, iwal munŋaana men ki kar saamba timeke ma tisu, mi tigaaba aŋela tana ma tipakur Anutu pa mboe ta kembei. Tiso:

14 “Tapakur Anutu ta imbot kor a. Pa ni zaana biibi.
Wal ta so ni leleene pizin, nako lelen ndabok.
Pa iŋgi sua luumuŋana
(2:14) Sua luumuŋana ti na, ka uunu ta kembei: Zaala tabe itiŋan Anutu taparlup ti ma tewe tamen na Yesu tau.
isu toono kek.” e 
15 Tona zin aŋela tizem zin, mi timiili ma tisala saamba mini. Mi zin mboroŋan tiparso pizin ma tiso: “Ou, tamaŋga ta buri mi tala Betelem be tere koroŋ ta Merere iso piti pa na.”

16 Tana loŋa men mi tila. Mi tindeeŋe Maria ziru Yosep, mi pikin ta ikenne sula koror. 17 Tila ma tire i, tona tipit mbol pa sua ta aŋela iso pa pikin tana. 18 Mi zin tomtom ta tileŋ sua kizin mboroŋan na, timap timurur pa. 19 Tamen Maria ikam ŋgar pa mbulu ta boozomen tana ma iur se ndomoono. f 

20 Kaimer na, zin mboroŋan timiili ma tila, mi tipakurkur Anutu mi tiwidit uruunu pa uraata boozomen ta tileŋ mi tire na. Paso, ila itoptop kat la aŋela kalŋaana tau.

Maria ziru Yosep tikam Yesu ma ila Urum Merere be tireeti

21 Aigule lamata mi tel ilae, to reeteŋana ka nol ipet. Mi tipaata zaana be Yesu. Pisis tana, Maria kopoono zen mi aŋela iso la kini. g 

22 Timbotmbot ma irao nol tabe tiurpe zitun ma tiŋgeeze mini pa Anutu mataana kembei ta tutu ki Mose iso na, to tikam pikin tina, mi tisala pa Yerusalem be tiuri ma iwe Merere lene. h 

23 Pa ka sua tibeede ila Merere tutu kini pataaŋa kek ta kembei:

Pikin tomooto boozomen ta muŋgamuŋga na, bela kakam zin ma tiwe Merere lene. i 

24 Tana ziru tila tiur pikin ma iwe Merere lene, mi tipatoron Merere pa mbalmbal munmun ru, bekena Maria iŋgeeze mini pa Anutu mataana. Tito tutu ta Merere iso na. j 

Mboe mi sua ki Simeon

25 Tomtom ta, zaana Simeon, ni imbotmbot Yerusalem. Ni tomtom ndeeŋeŋana mi imoto Anutu mi ileŋleŋ la kalŋaana. Mi iurur mataana pa mazwaana tabe Anutu ikam zin Israel ma timbot ambai mini. Mi Bubuŋana Potomŋana imbotmbot raami. k 

26 Mi Bubuŋana Potomŋana iso i kek ta kembei: Ni ko imbotmbot mi ire Mesia ki Merere, mana imeete. 27 Yesu naana ma tamaana tikami ma tilela Urum Merere be tikam pini kembei ta tutu iso na. Mi indeeŋe tana, Bubuŋana ipaŋgutŋguutu Simeon ma imbotmbot lela Urum Merere leleene kek. 28 Tana ni ire pikin, to ikami mi imbaraari. Mi ipakur Anutu ma iso:

29 “O Merere, sua ta nu mbuk pa mbesooŋo ku, ta iŋgi iur ŋonoono kek.
Tana sombe aŋmeete, na aŋmeete lak. Nio ko aŋma raama leleŋ ambai. l 
30 Pa Ulaaŋa ta ŋgo i ma imar be ikamke zin tomtom i,
ta swe i pizin tomtom ma tire i kek.
Mi ituŋ aŋre kati tomini. m 
32 Ni ta ko iur mat pizin wal ta Yuda somŋan i.
Mi ikam zin wal ku Israel ma zan iwe biibi.” n 
33 Yesu tamaana ziru naana tileŋ sua ta Simeon iso pa lutun na, tikam ŋgar boozo pa. 34 Tona Simeon ipombol ziru tomini, mi iso pa Yesu naana Maria ta kembei: “Leŋ. Pikin taiŋgi ko iwe uunu pizin Israel boozomen ma titoptop. Mi boozomen na, ni ko iwe zaala pizin be Anutu iwit zin. Pa ni ta ko iswe kat Anutu mbulu kini pizin tomtom, mi ikam ma ŋgar ta imbot la lelen na ipet mat. Tamen tomtom ko tikam sua boozo pini. Mi nu tomini ko yamaana kembei buza mataanaŋana iŋgal lelem.” o 

Merere kwoono Ana izzo Yesu ka sua

36 Mi Anutu kwoono moori ta, ni imbotmbot urum lene tomini. Ni zaana Ana, mi tamaana Panuel. Uunu ipet la ki Aser. Ni ra, iwe kolmannan kek. Muŋgu ziru waene timbot irao ndaama lamata mi ru men, to waene imeete. 37 Tabe ni iwe nora ma imbotmbot mi iŋgi ndaama kini irao tomto paŋ kwoono paŋ (84). Mi ni imbesmbeeze pa Anutu lela urum lene ikot mbeŋ ma aigule. Izemzem som. Mi iŋgalseksek itunu pa kini kanŋana pa aigule pakan mi izuŋzuŋ men. p 

38 Indeeŋe kat ta Yosep bizin timbotmbot urum lene na, Ana imare kizin, to ipakur Anutu mi izzo pikin tana ka sua ila kizin iwal ta tiurur matan pa Anutu be ikamke Yerusalem na. q 

39 Yosep ziru Maria tikam uraata boozomen ta tutu ki Merere iso na makiŋ to, timiili ma tila pa kar kizin Nasaret ta imbot Galilea na. r 

40 Mi pikin itum ma iwe kaibiŋana mi ikam ŋgar ambaiŋana ki Anutu ma imbol pini. Mi kampeŋana ki Anutu imbotmbot se kini. s 

Yesu naŋgaŋŋana mi ila Urum Merere

41 Ndaama ta boozomen Yesu naana ma tamaana tilala Yerusalem pa lupŋana biibi ki Pasoba. t 

42 Indeeŋe Yesu ndaama kini iwe laamuru mi ru na, ni ziŋan tito mbulu tana mi tisala pa Yerusalem. 43 Lupŋana imap, tona Yosep ziru Maria timaŋga be timiili pa kar kizin. Mi Yesu, ni imborene su Yerusalem. Mi tamaana ma naana tiute som. Tindemeere ma tiso ko ni ziŋan wal pakan timuuŋgu ma tila kek. Tiwwa ma tila mi rou na, tikir mataana. Tabe tila ki toŋmatiziŋ kizin ma tiwi zin pini. 45 Tamen tindeeŋi som. Tana timiili ma tila mini pa Yerusalem be tiru i. 46 Tiru i ma aigule iwe tel pa i, to tindeeŋi lela Urum Merere leleene. Ni ziŋan zin wal ta tikamam sua pizin tomtom i timbutultul, mi ileŋleŋ zin mi ikamam wiŋana pizin. 47 Mi zin wal ta tileŋ i na, kwon itaanda pa ŋgar kini mi pekelŋana kini. u 

48 Beso tamaana ma naana tire i na, timurur. Mi naana ila ma iso pini. Iso: “Wai lutuŋ, parei ta kam mbulu ta kembei pa niamru tomom? Kopoyam rru pu ma ambel ruŋom kek.”

49 To ni iso: “Wa, kuru yo paso? Niom kuute som? Nio bela aŋbot lela Tamaŋ urum kini mi aŋgaabi pa uraata kini.” v 

50 Tamen ziru tikam ŋgar pa sua kini tina som. w 

51 To ziŋan timaŋga, mi timiili ma tila pa Nasaret. Mi ni ileŋleŋ la kalŋan men. Mi mbulu ta boozomen tana na, naana ikam ŋgar pa ma iur se ndomoono. x 

52 Mi Yesu itumtum, mi ŋgar kini izze pa koroŋ ki Anutu. Tana Anutu leleene ndabok pini. Mi zin tomtom ta kembena. Lelen ndabok pini. y 

Copyright information for `MNA