aNam 24:17
bMika 5:2; Yo 7:42
cMbo 72:10+; Yesa 60:6
dKam 4:22; Hos 11:1
fUn 35:19; Yer 31:15
gKam 4:19
hLu 2:39; Yo 1:46

Matthew 2

Zin ŋgarŋan ki zoŋ uunu timar tire Yesu

Indeeŋe king Erot ikamam peeze pizin Israel na, Maria ipeebe Yesu su kar Betelem ta ki Yudea na. Kaimer mana wal pakan ta tikamam ŋgar pizin pitik na, tiwwa ma timar tipet Yerusalem. Kar kizin imbot lele molo ta zoŋ uunu a. Timar to tiwi ma tiso: “King kizin Yuda ta buri naana ipeebi i, ni imbot swoi? Pa niam amre ka pitik taa zoŋ uunu a, ta iŋgi amar be amlek kumbuyam pini mi ampakuri.” a 

King Erot ileŋ sua ti ma ziŋan iwal biibi ki Yerusalem timorsop pa mi tikam ŋgar boozo. Tana zin bibip kizin patoronŋana kan mi zin ŋgarŋan ki tutu na, Erot iyo zin ta boozomen ma tilup zin, to iwi zin. Iso: “Lak, Mesia ko naana ipeebi su so kar i?” Mi zin tiso: “Ko isu kar Betelem ta imbot lele pakaana ki Yudea ti. Pa muŋgu Anutu kwoono ta, iso ta kembei:

Kar Betelem ta imbot toono ki Yudea na, nu kar sorokŋom som.
Zom ko ilip pa kar bibip ta boozomen ki Yudea.
Paso, nu ko piyooto tomtom biibi tasa.
Mi ni ta ko ikam peeze pizin wal tio Israel mi imboro zin.” b 
Tana Erot iboobo zin wal zoŋ uunu kan ki keŋana ma tila kini, mi ziŋan tilup zin, mi iwi zin pa mazwaana iŋgoi kat ta tire pitik tana ipet. To iŋgo zin ma tila pa kar Betelem, mi iso pizin ta kembei. Iso: “Kala kuru pikin tina ma sombe kendeeŋi, tona kimiili ma kamar mi kosotaara yo. Naso nio tomini aŋla ma aŋre i, mi aŋlek kumbuŋ pini.”

Erot isotaara zin zoŋ uunu kan makiŋ, to tizemi mi tila. Mi pitik ta tire i su zoŋ uunu na, iyaara ma imuuŋgu pizin, mi iso zin pa zaala. Zin tire ma menmeen zin biibi kat, mi tito i ma tila. Pitik ila ma imbot sala ruumu ta pikin imbotmbot pa na, 11 to zin tilela na tindeeŋe pikin ziru naana Maria, mi tilek kumbun pini mi tipakuri. To tikaaga pelpeele kizin mi tiweene koroŋ ndabokbokŋan pakan ta kadon bibip i, mi tipakuri pa. Tikam pat gol, mi koroŋ ambaimbaiŋan mi kuzinŋan ma tikam pini. c 

12 Mi Anutu ipet kizin pa miuŋana mi isope zin be timiili ma tila ki king Erot mini pepe. Tana tito zaala toro mi timiili ma tila pa lele kizin.

Yosep bizin tiko ma tisula pa Aikuptu

13 Zin zoŋ uunu kan timaŋga ma tila mi molo som na, Anutu iŋgo aŋela kini ta ma ila ipet ki Yosep pa miuŋana, mi iso pini ta kembei. Iso: “Iŋgi Erot leleene iurur be iru pikin be ipuni ma imeete. Tana maŋga, kam pikin ziru naana, mi koko ma kusula pa Aikuptu. Kala kombotmbot tina ma irao aŋso piom mini, to kimiili ma kese.”

14 Tana Yosep imaŋga pa mbeŋ, to ikam pikin ziru naana, mi tiko ma tisula Aikuptu. 15 Mi timbotmbot tana ma irao Erot imeete.

Tabe sua ki Anutu kwoono ta iur ŋonoono. Sua ta kembei:

Lutuŋ imbotmbot su Aikuptu, mi aŋboobi ma imiili ma ise. d 

Erot ipun zin pikin ki kar Betelem

16 Yosep ikam pikin ziru naana ma tisula Aikuptu, mi Erot inaama zin zoŋ uunu kan ma som, to ikilaala kembei zin tipakaami. Tabe ikam ma keteene ibeleu kat. To mataana ila pa sua ta zin zoŋ uunu kan tiso pa mazwaana ta pitik ipet pizin pa na. Tana iŋgo zin malmal kan ma tila kar Betelem mi kar pakan ta timbot kolouŋana na. Tila tipet na, tipun pikin tomooto ta boozomen ta kan ndaama ruruŋa mi isu. 17 Tabe sua ki Anutu kwoono Yeremia iur ŋonoono. Sua ta kembei:

18 Tiŋiizi biibi ko isu kar Rama
(2:18) Kar Rama igarau kar Betelem.
ma isaana kat.
Rael ko itaŋ ma iyeryer pa lutuunu bizin.
Pa tipun zin ma timetmeete lup.
Tana tikam be tipotor leleene, tamen tirao som. f 

Yosep bizin tizem Aikuptu mi timiili

19 Yosep bizin timbotmbot Aikuptu ma kaimer Erot imeete. To Anutu aŋela kini ta ila ipet ki Yosep pa miuŋana isu Aikuptu, 20 mi iso pini. Iso: “Maŋga ma kam pikin ziru naana mi kimiili ma kala pa Israel. Pa wal ta timbuuru pa pikin taiŋgi, ta timetmeete kek.” g 

21 Tana Yosep imaŋga na, ikam pikin ziru naana, mi timiili ma tila pa Israel mini. 22 Tamen Yosep ileŋ kembei Erot lutuunu Arkelaus ikam tamaana muriini ma iwe king pa Yudea, tana imoto kana, mi leleene be ila pa Yudea mini som. Mi Anutu ipet kini pa miuŋana, mi iso pini be tisula pa lele pakaana ki Galilea. 23 Tana tila mi titu su kar Nasaret. Tabe sua ki Anutu kwoono bizin iur ŋonoono. Sua ta kembei:

Ni ko tipaati be tomtom ki Nasaret. h 
Copyright information for `MNA