aIbr 2:18, 4:15
bKam 34:28
cLo 8:3; Yesa 55:1-2
dMbo 91:11+
eLo 6:16
fLo 6:13; Mt 16:23
gIbr 1:14
hLu 3:19+
iYo 2:12
jYesa 8:23
kYesa 9:1, 42:7; Lu 1:79
lMt 3:2
mMt 13:47
nMt 19:27
oMt 9:35; Mk 1:39; Ŋgo 10:38

Matthew 4

Sadan itoombo Yesu

[Mk 1:12-13; Lu 4:1-13]

To Bubuŋana ipaŋgutŋguutu Yesu ma ila pa lele bilimŋana be Tomtom Sanaana itoombi. a 

Yesu ikan kini som ma irao aigule tomtooru, mi peteli ma isaana kat. b 

To Watiiŋi ipet kini mi iso: “Lak, nu sombe Anutu Lutuunu, na kena ur sua pizin pat ti bekena tiwe kom kini ma kan.” Tamen Yesu ipekel kwoono ma iso: “Sua ki Anutu imbot pataaŋa kek ta kembei:

Kini men ko irao ikis tomtom sa ma imbot ndabok na som.
Sua boozomen ta ipet pa Anutu kwoono ta ikam tomtom ma imbot ambai.” c 

To Tomtom Sanaana ikami ma tila pa kar potomŋana Yerusalem, mi tisala Urum Merere uteene. To iso lae pa Yesu ma iso: “Sombe nu Anutu Lutuunu, na mbot ti mi lu uma sula. Pa sua imbot pataaŋa kek ta kembei:

Ni ko iur sua pizin aŋela kini be timboro u mi matan pu.
Mi zin ko tisiibu,
kokena punu se pat.” d 

Mi Yesu ipekel kwoono ma iso: “Tamen sua lwoono toro iso ta kembei:

Nu irao toombo sorok Merere Anutu ku mburaana pepe.” e 
Tona Tomtom Sanaana ikami mini ma tisala pa abal biibi uteene, mi iso i pa lele mi toono ta boozomen, ramaki koroŋ ndabokbokŋan mi zanŋan matakiŋa ta munŋaana men. To iso pini. Iso: “Lak, nu sombe lek kumbum pio mi pakur yo, inako aŋkam koroŋ ta boozomen taiŋgi ma imap iwe lem.” 10 Tamen Yesu iseri ma iso: “Sadan, la lem! Pa sua ki Anutu imbot pataaŋa kek ta kembei:

Lek kumbum pa Merere Anutu ku,
mi mbeeze pa ni itutamen.” f 
11 Tana Tomtom Sanaana izemi mi ila, mi aŋela pakan timar tipet ki Yesu mi tiuuli. g 

Yesu imaŋga pa uraata kini isu Galilea

[Mk 1:14-15; Lu 4:14-15]

12 Indeeŋe ta Yesu ileŋ Yoan uruunu kembei tiuri lela ruumu sanaana na, imiili ma ila pa lele pakaana ki Galilea. h 

13 Mi ila ma itu su kar Nasaret mini som. Ila itu su kar Kapenaum ta imbot tai Galilea ka peende na. Kar tana imbot se toono pakaana ki Israel un bizin ru, Zebulon mi Naptali. i 

14 Tabe sua ta muŋgu Anutu kwoono Yesaya iso na, iur ŋonoono. Sua ta kembei:

15 Niom wal ta kombot pa toono pakaana ki Zebulon mi Naptali,
mi kagarau zaala biibi ta isula pa tai na,
mi niom wal ta kombot la yok Yordan pakaana ta zoŋ izze pa i, keleŋ sua ti. j 
Niom Galilea koyom ta kombot raama zin wal ta Yuda somŋan i, iŋgi sua tiŋgi ima piom tau.

Zin wal tau timbotmbot la zugut lene, ta tire azuŋka biibi.
Mi zin wal tau timbotmbot la zaala ki meeteŋana mi zugut izukkaala zin,
ta zoŋ mataana pok ma ise mi iur mat pizin. k 

17 Indeeŋe mazwaana tana na, Yesu imaŋga pa uraata kini be isoyaara sua ki Anutu pizin tomtom. Ni ikamam sua pizin ta kembei. Iso: “Kotooro leleyom! Pa nol tabe peeze ki kar saamba ipet mat, ta igarau kek.” l 

Yesu iboobo naŋgaŋ paŋ

[Mk 1:16-20; Lu 5:1-11]

18 Aigule ta na, Yesu ipiyalyaala pa tai Galilea ka peende ma ila, mi ire toŋmatiziŋ ru, Simon (ni tipaata zaana toro be Petrus) mi tiziini Andreas. Ziru tiwaswaaza ma timbotmbot. Pa ziru na, tomtom ki tikamam ye. 19 To iso pizin ma iso: “Ai, niomru tina, kamar koto yo. Nio ko aŋpaute yom be kakam zin tomtom.” m 

20 To loŋa men mi tizem pu kizin ma imbot, mi tito i ma ziŋan tila. n 

21 Tiwwa ma tilae ri, to Yesu mataana ila na, ire Zebedi lutuunu bizin ru, Yems ziru Yoan. Ziŋan taman timbotmbot sala wooŋgo mi tiurpewe pu kizin. Mi Yesu iso la pizin, 22 to loŋa men mi tizem taman raama wooŋgo kizin ma imbot, mi timar ma tito Yesu ma ziŋan tila.

Yesu isoyaara sua pizin tomtom mi iziiri mete pizin

[Lu 6:17-19]

23 Tona Yesu imaŋga mi iwwa pa lele ta boozomen ki Galilea, mi ikamam sua lela lupŋana murin kizin. Mi izzoyaryaara uruunu ambaiŋana pa peeze ki kar saamba, mi izzo zin tomtom pa, mi izirziiri mete matakiŋa ta boozomen pizin tomini. o 

24 Tabe uruunu irak ma irao lele ta boozomen, mi ila ipet lele pakaana ki Siria tomini. Mi tiyo zin meteŋan kizin ta munŋaana men ma timar kini, mi ni iurpe zin ma nin ambai. Zin ta yoyouŋana biibi ikam zin, mi zin ta bubuŋana sananŋan tizeebe zin ma tigadgaada, zin ta tikadat ma titoptop, zin narapeŋan, mi zin kaamaŋan. 25 Tabe iwal biibi ki Galilea mi iwal biibi ki lele pakaana ki Dekapolis, mi zin Yerusalem kan, mi zin Yudea kan, mi kar pakan ta timbot yok Yordan pakaana ta zoŋ izze pa i, timokor la kini mi tito i.

Copyright information for `MNA