aTut 15:20; 17:21,25; 29:3
bTut 11:4
cMbo 34:9-10; 37:19,25
dTut 12:24,27; 13:4; 19:15
eTut 6:8-11
fMbo 37:9, 22, 28,38
gTut 9:8-9
hMbo 23:4; Lu 8:17, 1 Ti 5:24-25
iMbo 37:30
jTut 17:9; 1 Kor 13:4-7; 1 Pe 4:8; Yems 5:20
kTut 19:29
lTut 13:1,18
mMt 12:36,37; Yems 1:19, 3:2-10
nMbo 128:2
oTut 15:21
pMbo 37:4; Mt 5:6; 1 Yo 5:14-15
qMbo 37:35-36; Mt 7:24-27; 2 Tim 2:19
rTut 3:16+; Mbo 55:23
sMbo 112:10; Tut 11:7
tMbo 37:28+; 112:6; 125;1; Tut 2:22; 14:11
uMbo 37:30; 52:3-5

Proverbs 10

Sua tutŋana ki King Salumo

Iŋgi sua tutŋana mi sua tooroŋan pakan ki King Salumo.

Naŋgaŋ sa, sombe le ŋgar ambaiŋana, nako ikam ma tamaana leleene ambai.
Mi zin naŋgaŋ kankaanaŋan ta tizorzooro, nako tikam ma nan bizin lelen ipata. a 
Iti irao takam lende koroŋ boozomen pa zaala sananŋana. Tamen koroŋ tana ko irao iuulu kat iti na som.
Mi mbulu ndeeŋeŋana na, itatkewe iti pa meeteŋana. b 
Wal ndeeŋeŋan na, Yooba irao izem zin ma tikan peteele na som.
Mi koroŋ ta wal sananŋan lelen pa i na, ni ipiŋgisŋgis pizin. c 
Sombe namanda ikamam kat uraata som, nako tombot ŋoobo.
Mi sombe namanda ikamam kat uraata, nako lende koroŋ boozo. d 
Sombe mazwaana ki mai ipet, mi lutundu bizin tikam uraata ma tiyo kanda kini, ina iswe kembei zin len ŋgar ambaiŋana.
Mi sombe tikenne mi timbombooren, ina tipamiaŋ ti. e 

Wal ndeeŋeŋan na, kampeŋana matakiŋa imbotmbot se kizin.
Mi wal sananŋan na, tizzwe malmal tabe tikam i som. Titurkewe.
Sombe wal ndeeŋeŋan timeete, na tomtom matan lala pa mbulu kizin ambaiŋana mi tipakurkur Anutu pa.
Mi wal sananŋan na, zan ko isaana ma isaana kat. f 
Wal ta len ŋgar ambaiŋana na, sombe tutut zin, nako tileŋ la kalŋanda.
Mi wal kankaanaŋan ta tizorzooro mi kwon perper sorok na, zin ko tisaana ma tila len. g 
Tomtom ta so ipa pai kini ma ambai men, na kosasa ko irao be ipasaana kati na som.
Tamen zin wal ta tipaŋobŋoobo pa zaala ambaiŋana na, kaimer mbulu kizin ta tikamam ki keŋana na, ko imbot kat mat mi tomtom tiute. h 
10 Zin wal ta matan iparkinmeete pizin na, kaimer ko tikam mbulu sa mi tikam pataŋana piti.
Mi wal kankaanaŋan ta tizorzooro mi kwon perper sorok na, zin ko tisaana ma tila len.
11 Sua kizin wal ndeeŋeŋan, ina kembei yok lepeene. Pa iuluulu zin tomtom be timbot ambai.
Mi zin wal sananŋan na, tizzwe malmal tabe tikam i som. Titurkewe. i 

12 Mbulu ki tuurur koi, ina ikamam ma ŋoŋi imbotmbot la mazwanda.
Mi sombe tuurur lelende pizin tomtom, nako matanda mbiriizikaala sanaana kizin, mi takam ŋgar pa mini som. j 
13 Zin wal tau tikilaala ŋgar iŋgoi ta ambai ma ilip na, kwon ipiyotyooto ŋgar ambaiŋana men.
Mi zin wal ta len ŋgar somŋan na, teene ko ikan zin! k 
14 Zin wal ta len ŋgar ambaiŋana na, gorgori tirru ŋgar pakan be isala ki.
Mi wal kankaanaŋan ta tizorzooro na, molo som to sua sananŋana ta iwedet pa kwon na, ko ipasaana zin.
15 Zin wal ta len koroŋ boozo na, tipase pa pat ma koroŋ kizin be iporoukaala zin pa pataŋana.
Mi zin wal sorrokŋan ta len koroŋ som mi timbot ŋoobo na, pataŋana kizin tana ko ipun zin ma tisaana kat.
16 Kadoono ta wal ndeeŋeŋan tikamam pa uraata kizin, ina iuluulu zin be tikam mbotŋana ambaiŋana.
Mi kadoono ta wal sananŋan tikamam pa uraata kizin, ina tiwirri sorok pa koroŋ sananŋan men.
17 Tomtom ta so ileŋleŋ la sua pazalŋana, na imbotmbot la zaala ki mbotŋana ambaiŋana kek.
Mi zin wal tau tileŋtut sua pazalŋana, nako tiyaaru zin tomtom pakan ma tipaŋoobo pa zaala ambaiŋana. l 
18 Tomtom ta so iurur koi pu mi ikiskis la leleene, nako kwoono ipakamkaam.
Mi tomtom ta so ileŋ sua ŋgalŋana sa mi ila ma izzo pizin wal pakan, na ni tomtom kankaanaŋana.

19 Sombe nu kwom suaŋom, na re u. Pa nu kola kam sanaana. Irao kam som na som.
Mi tomtom ta so imborro kat kwoono, na ni tomtom ŋgarŋana. m 
20 Sua ta iwedet pa wal ndeeŋeŋan kwon, ina kembei pat silba ta tomtom lelen pa ilip.
Tamen ŋgar ta imbotmbot la wal sananŋan lelen, ina ŋono somŋana.
21 Sua ta iwedet pa wal ndeeŋeŋan kwon, ina iuluulu tomtom boozomen be timbot ambai.
Mi wal kankaanaŋan ta tizorzooro na, tikam kat ŋgar som. Tana kaimer ko timetmeete ma tila len.
22 Kampeŋana ki Yooba, ta ikamam lende koroŋ boozomen.
Mi koroŋ ta so ni ikam piti, nako ka pataŋana sa som. n 
23 Wal kankaanaŋan ta tizorzooro na, sombe lelen iurur pa mbulu sananŋana sa, to ikam zin ma lelen ambai mi menmeen zin.
Mi tomtom ta so ŋgar kini ipet kek, na ŋgar ambaiŋana ta ikami ma leleene ambai. o 
24 Koroŋ ta wal sananŋan timototo, ta ko ipet pizin.
Mi koroŋ ta wal ndeeŋeŋan lelen pa na, Yooba ko ikam pizin. p 
25 Pataŋana biibi ko ipambiriizi zin wal sananŋan.
Tamen wal ndeeŋeŋan ko timendernder mbolŋana ma alok. q 
26 Zin wal ta so tiŋgo tomtom maolŋana ma ila be ikam uraata, nako lelen ambai som.
Ko kembei koroŋ ta ikam ma zoŋon imenel, mi you ka koi ila matan.
27 Sombe tomototo Yooba mi teleŋleŋ la kalŋaana, nako iseeŋge swondo ma molo.
Tamen ni iyembutmbut wal sananŋan swon bekena timeete ma tila len karau men. r 
28 Koroŋ ambaimbaiŋan ta wal ndeeŋeŋan tiurur matan pa na, zin kola tire mi menmeen zin pa.
Mi wal sananŋan na som. Koroŋ ta tiurur matan pa na, zin ko tirao be tire na som. s 
29 Yooba, ni iwe kembei siiri mbolŋana pizin wal ndeeŋeŋan be tike lela.
Tamen ipasansaana zin wal sananŋan.
30 Wal ndeeŋeŋan, zin kembei ke mbolŋana ta irao be imuzu na som.
Mi wal sananŋan na, zin ko tirao be timbot pa toono ta Yooba ikam pa wal kini na som. Ni ko iziiri zin ma tila len. t 
31 Wal ndeeŋeŋan na, kwon ipiyotyooto ŋgar ambaiŋana men.
Mi zin wal ta kwon ipiyotyooto sua sananŋana na, Yooba ko ipasaana zin ma tila len bekena ipumun kwon. u 
32 Wal ndeeŋeŋan matan iŋgalŋgal be tiso sua ambaiŋana men.
Mi wal sananŋan na, sua soroksorok men ta iwedet pa kwon.
Copyright information for `MNA