aPil 4:8
bMbo 119:160; Pil 2:15
cMbo 19:10; Tut 3:14; 16:16
eYo 14:21-23; Mt 7:7-11; Yems 1:5
fTut 3:16
gMbo 104:24
hYo 1:1; 17:5
iMbo 90:2
jYo 1:1-4; Kol 1:15-20
kMbo 119:1-2
lTut 3:16; 1 Yo 5:11

Proverbs 8

Ŋgar ambaiŋana izzo pa itunu mi uraata ta ni ikamam na

Ŋgar ambaiŋana, ina kembei moori ambaiŋana ta imbotmbot, mi ipaŋarairai kalŋaana ma iboboobo iti tomtom be tala kini, bekena ipaute iti pa ŋgar iŋgoi ta ambai ma ilip.
Ni ikewe piti som. Imbotmbot sala lele mbukuunu ta igarau zaala biibi na,
mi isu ma imendernder la zaala boogoŋan tomini.
Mi ilala pa zaala kwoono,
mi ipaŋarairai kalŋaana ma izzo ta kembei:

“O niom iwal biibi ki toono, nio iŋgi aŋboboobo yom be kamar ma keleŋ sua tio ti.
Niom wal ta leyom ŋgar biibi som na, kamar tio. Naso aŋuulu yom be kakam kat ŋgar.
Niom wal kankaanaŋoyom ta kozorzooro na, kamar tio bekena aŋuulu yom ma kikilaala ŋgar iŋgoi ta ambai ma ilip na.
Keleŋ sua tio ti. Pa nio leŋ ŋgar ambaimbaiŋan boozomen be aŋso yom pa.
Sua ta iwedet pa kwoŋ na, indeŋdeeŋe men. a 
Sua sananŋana sa irao ipet pa kwoŋ na som. Som kat.
Sua tio, ina ŋonoono men.
Sua boozomen ta iwedet pa kwoŋ na, sa ipaŋoobo som.
Indeŋdeeŋe men. b 
Zin wal ta ŋgar kizin ipet kek na, tikilaala kembei sua tio ta boozomen izal men.
Zin wal ta len ŋgar na, tiute: Sua tio, ina ambai men.
10 Kakam ŋgar pa pat silba pepe. Kakan la sua tio pazalŋana. Pa ina ilip pa pat silba.
Mi ŋgar ambaiŋana tabe aŋso yom pa i, ta kembena. Ilip pa gol ta ambaimbaiŋan kat. Tana kakam ma iwe leyom. c 
11 Pa ŋgar ambaiŋana, ina ilip pa pat milmilŋan ta kan kadon bibip i.
Koroŋ boozomen ta leleyom pa i, sa irao iuulu yom kembei ŋgar ambaiŋana na som.”

12 Ŋgar ambaiŋana izzo ta kembei: “Nio aŋbotmbot raama ŋgar ta iurur ŋonoono.
Pa aŋkam kat ŋgar kek. Tana aŋrao be aŋpaute yom pa so mbulu tabe kakam i.
13 Tomtom ta so imototo Yooba mi ileŋleŋ la kalŋaana, nako iurur koi pa mbulu sananŋana.
Mi nio ta kembena. Mbulu ki pakurŋana mi repiiliŋana, ramaki mbulu sananŋan mi sua pakamkaamŋan ta boozomen na, leleŋ pa ri sa som kat.
14 Nio aŋrao be aŋso yom pa ŋgar ambaiŋana, mi aŋuulu uraata tiom ma iur ŋonoono.
Pa leŋ ŋgar ambaiŋana mi mburoŋ biibi. d 
15 Nio aŋuluulu zin king mi wal peeze kan be tikam kat peeze,
mibe tiur tutu ndeeŋeŋan men pizin tomtom.
16 Nio aŋuluulu zin bibip be timboro kat zin tomtom,
mibe tiurpe pataŋana kizin ma indeeŋe men.

17 Zin wal ta so tiurur lelen pio, na nio aŋurur leleŋ pizin.
Mi zin wal ta so tikam kinkiini be tiru yo, nako tindeeŋe yo. e 
18 Sombe nio aŋbotmbot raama tomtom sa, na ni ko ikam le koroŋ ndabokbokŋan boozomen mi zaana iwe biibi.
Ni ko iute zaala ndeeŋeŋana tabe irao kat pa le koroŋ.
Mi koroŋ kini ko imbotmbot ambai ma molo. f 
19 Ŋonoono ambaimbaiŋan ta aŋpiyotyooto na, ilip pa gol ma silba ta iŋgeeze kat na.
20 Mi zaala ta aŋtoto, ina ndeeŋeŋana.
Zin wal ta so titoto zaala tio, nako tirao be tiurpe pataŋana kizin tomtom ma indeeŋe men.
21 Zin wal ta so tiurur lelen pio, na aŋkamam len koroŋ boozomen.
Tabe ruumu leleene kizin tau titiurkewe koroŋ kizin ambaimbaiŋan ilelala pa i na, bokbok.

Ta muŋgu mi imar na, ŋgar ambaiŋana imbotmbot

22 Indeeŋe ta matapopo ten na, Yooba iur yo ma aŋpet muŋgu,
mana imaŋga pa uraata kini be iur koroŋ ta boozomen. g 
23 Muŋgu kat, indeeŋe toono ipet zen na, ni iur yo ma aŋpet. h 
24 Mazwaana ta ni ipiyooto yo na, tai imbotmbot som.
Mi yok lepenlepen ta yok irereere pa i ta kembena. Timbotmbot som.
Mi abal ma dogo ta boozomen tomini, tipet zen. i 
26 Indeeŋe ta Yooba iur toono, su, mi ululu zen na, nio aŋbotmbot raami.
Mazwaana tana, ni iur saamba, mi iut ma imbot ndel pa yok ta imbot meleebe na.
28 Mi iur gubur tiene ma isala kor,
mi iyaraama yok ta imbot meleebe na, mi iur mbut pa. Kokena izooro tutu kini mi ilol toono.
Mi ŋgar kini iur pa lele tabe toono imbot pa i, mana iur toono ma ipet, mi ipombol uunu ma imbol.
30 Indeeŋe tana, nio aŋbotmbot zilŋaana uunu, mi aŋkamam peeze pa uraata ta boozomen tana. Pa nio nomoŋ mosŋoŋ.
Aigule ta boozomen, nio aŋbotmbot su kereene uunu na, menmeen yo mi aŋzeŋzeeŋge.
31 Pa leleŋ ambai kat pa toono ramaki ka koroŋ ta boozomen,
mi menmeen yo pizin tomtom tomini. j 

32 Tana lutuŋŋan, kuur talŋoyom pio.
Pa zin wal ta so matan iŋgalŋgal zaala tio mi titoto, nako lelen ambai kat mi kampeŋana ki Anutu imbotmbot se kizin.
33 Sua ta aŋkam piom na, keleŋtut pepe.
Keleŋ la mi koto. Naso kakam leyom ŋgar ambaiŋana.
34 Zin wal tau timbotmbot ruumu tio kwoono pa aigule ta boozomen mi tinamnaama bekena aŋso zin pa ŋgar ambaiŋana, mi tileŋleŋ la sua tio na,
zin ko lelen ambai kat mi kampeŋana ki Anutu imbotmbot se kizin. k 
35 Pa tomtom ta so indeeŋe yo, nako ikam mbotŋana ambaiŋana,
mi Yooba leleene pini. l 
36 Tamen tomtom ta so iru yo ma som, ina ni imbel itunu.
Mi wal boozomen ta lelen pio som mi tiurur koi pio, na zin lelen be timeete.
Copyright information for `MNA