aMt 5:6; Lu 1:53
bLu 1:79
cYona 1:15; Lu 8:24

Psalms 107

Mboe 107

Tapakur Merere pa muŋaiŋana kini matakiŋa

Leleyom ambai pa Yooba mi kapakuri. Pa ni ambaiŋana kat.
Ko iurur leleene pa wal kini mi imuŋaiŋai zin ma alok.

Zin wal ta Yooba itatke zin la kan koi bizin naman na, irao tiso sua ta kembei.
Paso ni itatke zin pa pataŋana kizin, mi ikam zin ma timbot ambai.
Muŋgu kan koi bizin tikam zin ma tila timbot leŋaleŋa ila karkari mazwan.
Pakan timbot lele ta zoŋ izze pa i, mi pakan timbot lele ta zoŋ izulla pa i. Timbot irao tai pakaana ta boozomen.
Mi Yooba iyogeege zin, mi ikam zin ma timiili ma timar kar kizin mini.

Tomtom pakan tisaŋsaŋ pa lele bilimŋana ta magargaara men.
Mi tirru zaala ki kar sa be tito mi tila timbot pa. Tamen tindeeŋe som.
Zin petel zin, mi miri zin
ma mburan imap.
Tana timbot ŋoobo kat. Mi titaŋroro Yooba,
to ni iuulu zin pa pataŋana kizin.
Ipatooŋo zin pa zaala ambaiŋana,
mi zin tito ma tila mi tindeeŋe kar be timbot pa.
Tana zin irao lelen ambai pa Yooba mi tipakurkuri.
Pa ni iurur leleene pa wal kini mi imuŋaiŋai zin.
Mi ikamam uraata bibip ta ipa ndel kat, bekena iuulu zin tomtom.
Wal ta miri zin na, ni ipalumluumu ŋguren.
Mi zin wal ta petel zin na, ni ikamam kan koroŋ ambaimbaiŋan ma tirao kat. a 

10 Mi tomtom pakan na, timbotmbot lela zugut biibi leleene, mi pataŋana ikamam zin mabe timeete i.
Timbotmbot lela ruumu sanaana leleene, mi re ma sen ikanan zin ma tisaana kat.
11 Pa tizorzooro sua ki Anutu kor kana kat.
Mi ŋgar ta ni leleene iur pa na, tirepilpiili mi tito som.
12 Tana ni iur uraata sananŋana kat ise kizin bekena ikoto zin.
Mi zin tikunkun ma titoptop su toono, mi len tomtom sa be iuulu zin som.
13 Tana timbot ŋoobo kat. Mi titaŋroro Yooba,
to ni iuulu zin pa pataŋana kizin.
14 Itatke zin pa zugut biibi tana leleene, mi ikam zin ma tiyooto ma tipet mat.
Mi iyembut re mi sen pizin. b 
15 Tana zin irao lelen ambai pa Yooba mi tipakurkuri. Pa ni iurur leleene pa wal kini mi imuŋaiŋai zin.
Mi ikamam uraata bibip ta ipa ndel kat, bekena iuulu zin tomtom.
16 Kataama mbolŋana ki ruumu sanaana na, ni ipetepaala.
Mi ain mbolŋan ta ipombolmbol kataama na, ni ibogboogo ma ipolpol lup.

17 Mi tomtom pakan na, zin talliŋan mi tinoknok zooroŋana.
Zin tikamam ŋoobo mbulu, tana mete biibi ikam zin ma tirre yoyouŋana pa.
18 Zin lelen pa kini sa mini som. Sombe tire kini sa, na tikamam be tilulu.
Tana timbot naala kezeene kek.
19 Zin ra, timbot ŋoobo kat. Mi titaŋroro Yooba,
to ni iuulu zin pa pataŋana kizin.
20 Iur sua mi sua kini tana iurpe zin ma nin ambai mini.
Muŋgu timbot naala kezeene. Mi ni itatke zin pa meeteŋana.
21 Tana zin irao lelen ambai pa Yooba mi tipakurkuri. Pa ni iurur leleene pa wal kini mi imuŋaiŋai zin.
Mi ikamam uraata bibip ta ipa ndel kat, bekena iuulu zin tomtom.
22 Tana zin irao lelen ambai pa uraata bibip ta ni ikam pizin na, mi tikam patoronŋana pini.
Mi kalŋan isala mi tipakuri pa mboe, mi tisoyaara uraata kini tana.

23 Tomtom pakan na, tise wooŋgo mi tikwai
ma tila lele molo be tikam mburooŋo.
24 Zin tire kat Yooba mburaana,
mi uraata bibip ta ni ikamam su tai lwoono na.
25 Pa ni iur sua, to miiri biibi ipol,
mi ipei duubu ma ise.
26 Mi duubu iwit wooŋgo kizin ma isala ta kor a.
Beso izem na, sam ma ila ne. Som, mi ise mini.
Tana motoŋana biibi ikam zin ma mburan imap kat.
27 Mi matan mburri, mi tila ma timelmel su kembei tomtom ta iwin ma ikankaana.
Zin tiute kat peeze kamŋana. Tamen tirao som.
28 Tana timbot ŋoobo kat. Mi titaŋroro Yooba,
to ni iuulu zin pa pataŋana kizin.
29 Ikam ma miiri imap,
mi duubu keten su, mi taun. c 
30 Zin tire taun isu, to lelen ambai mi menmeen zin biibi.
Mi Yooba ikam zin ma sor lela lele ta tisombe tila pa i.
31 Tana zin irao lelen ambai pa Yooba mi tipakurkuri. Pa ni iurur leleene pa wal kini mi imuŋaiŋai zin.
Mi ikamam uraata bibip ta ipa ndel kat, bekena iuulu zin tomtom.
32 Tana sombe Anutu wal kini tilup zin pa suŋŋana, na wal tana bela tiwit Yooba uruunu ma isala ta kor a.
Mi tipakuri lela lupŋana kizin wal peeze kan tomini.

33 Yooba, ni irao ikam ma lele ta yok bibip tireere pa i iwe lele magargaaraŋana ta ka yok somŋana i.
Mi lele ta yok bukbuk ma tizze pa i na, ni irao ipumun mi lele tana kerekere.
34 Mi toono mbuyeeneŋana na, ni irao be ipasaana ma iwe toono sananŋana ta kosa sa irao be indom pa mini som.
Mbulu ta kembei, ni ikamam pa lele ta ka tomtom bizin tinoknok mbulu sananŋana.
35 Ni irao be ikam ma yok biibi ireere pa lele magargaaraŋana ta ka yok somŋana i.
Mi ni irao be ikam ma yok bukbuk ma tise pa lele kerekereŋana.
36 Mi zin wal ta petel zin na, ni ko ikam zin ma tila timbot pa lele ambaiŋana tana,
mi titu ma iwe len kar.
37 Mi zin ko tipaaza kan kini ma baen,
mi tikam mai ambaiŋana.
38 Mi ni ko ipombol zin ma timasak ma tiwe boozo kat,
mi mataana pa mbili kizin tomini ma timasak ma tiwe boozo.
39 Muŋgu mburan izzu mi tire yoyouŋana. Pa kan koi bizin tikototo zin mi tiseseeze matan.
Tana timbot ŋoobo mi lelen ipata kat. Mi iŋgi timbot ambai mini.

40 Pa Yooba ikototo zin wal zanŋan mi ipasomsom zin.
Mi ikamam ma tizirri zin mi tila tiliuliu len sorok pa lele bilimŋana.
41 Tamen zin wal ta timbot ŋoobo mi tibaada pataŋana biibi na, ni ipakurkur zin,
mi mataana pizin ma timasak ma tiwe wal boozo.
42 Mbulu kini tana, zin wal ndeeŋeŋan tire ma lelen ambai kat.
Mi wal sananŋan ta boozomen na, len sua sa mini som. Sua kizin imap.
43 Tomtom ta so le ŋgar, inako ikamam ŋgar pa mbulu ti,
mi mataana ilala pa mbulu ki Yooba ta iurur leleene pa wal kini mi imuŋaiŋai zin.
Copyright information for `MNA