aŊgo 1:20

Psalms 109

Mboe 109

Tomtom ta isuŋ Anutu be ipimiili mbulu sananŋana ki ka koi bizin

Mboe ki Dabit

O Anutu, nio aŋpakurkuru. Mi nu mbomboorem sorok pepe.
Maŋga mi kam mbulu sa tabe iswe kembei nio leŋ uunu sa isaana som!
Pa wal sananŋan mi wal pakamkaamŋan tiwe koŋ koi
mi tiŋgalŋgal sorok sua pakaamŋana pio.
Zin tiurur koi pio mi tiwirri sorok sua sananŋana kat pio.
Mi timaŋgaŋga pio mi tipasansaana sorok nio zoŋ.
Muŋgu nio aŋurur leleŋ pizin. Tamen iŋgi tisu mi tipokot mbulu tio tana pa mbulu sananŋana mi tiŋgalŋgal sua pio.
Mi nio tomtom ki suŋŋana.
Nio aŋkamam mbulu ambaiŋana men pizin mi aŋurur leleŋ pizin. Tamen zin tipokot pa mbulu sananŋana,
mi tiurur koi pio sorok.
Mi timbuuru koŋ mi tisuŋ sosor pio ta kembei:

“Kozo tuur tomtom sananŋana tasa be imender su zilŋaana uunu,
mi iŋgal sua pini ta kembei: ‘To tana, nio aŋre i ikam ŋoobo mbulu.’
Beso ni imender be titiiri sua kini, nako tindeeŋe le uunu mi tiur kadoono sananŋana pini.
Mi suŋŋana kini tomini ko irao pa Anutu mataana som.

Niam leleyam be to tana swoono imap karau men.
Kozo tomtom toro ikam muriini mi ikeli pa uraata. a 
Lutuunu bizin ko tiwe moondo,
mi kusiini iwe nora.
10 Mi ko tipasaana lutuunu bizin ruumu kizin.
Tana zin ko tizem lele kizin mi tiwe wal sorrokŋan,
mi tiliuliu len sorok ma tinono ruumu be tiru kan kini, mi tizuŋzuŋ zin tomtom pa len pat.
11 Sombe mbun kini imbot ki tomtom sa, na tomtom tana ko imar mi iyo koroŋ kini ta boozomen men ma imap iwe lene.
Mi wal pakan ki lele toro ko timar mi tisei len koroŋ kini, mi timbot se uraata kini tieene.
12 Tomtom sa ikampe i pepe.
Mi tomtom sa imuŋai zin moondo kini pepe.
13 Popoŋana kini ta boozomen ko timbiriizi ma timap lup.
Tana wal tabe tipet pa kaimer i, ko tiute zin risa som. Pa zan imap kat.
14 Sanaana ta tumbuunu bizin tikamam, nako tiso Yooba pa, bekena mataana iŋgalŋgal mi iur ka kadoono ise ki to tana.
Mi naana sanaana kini tomini, Yooba imus ma ila ne pepe.
15 Tana sanaana ki to tana ziŋan wal kini na, Yooba ko mataana iŋgalŋgal totomen,
mi imus zan ma tila len. Naso tomtom matan mbeleele kat zin.

16 Pa to tana, ni mataana iŋgalŋgal mbulu ki kampeŋana mi muŋaiŋana som.
Zin sorrokŋan, mi zin wal ta timbot ŋoobo, mi zin ta lelen ipata kat na, ni iseseeze matan mi ipunun zin ma timetmeete.
17 Mi mbulu ki tusuŋ sosor na, ni leleene pa ilip.
Tamen sua kini sananŋana tana ko imiili mini pa itunu.
Mbulu ki tusuŋ Anutu be ikampe zin tomtom na, ni leleene pa som.
Tana kampeŋana ki Anutu imbotmbot molo pini tomini.
18 Mbulu kini ta iwirri sua sananŋana na, ni izemzem som. Ina iwe kembei mburu ta ni izebzeebi pa totomen.
Tamen sua kini tana kola imiili mini ma ipasaana itunu.
Ko isula kat leleene kembei ta yok, mi izil pa mazaana mi tiroono kembei ta ŋgere.
19 Mi izukkaali ma sik kembei ta kawaala mat kana,
mi ikipiiri i ma tuŋ kembei ta pus.
Mi ko imbotmbot ta kembei ma alok!”

20 O Yooba, sua sananŋan boozomen ta koŋ koi bizin tiŋgalŋgal pio na,
leleŋ be nu pimiili pizin. Naso pokot mbulu kizin.
21 Yooba, Merere tio, nu zom biibi pa mbulu ku ambaiŋana.
Pa nu toto sua ku mbukŋana mi urur lelem pa wal ku.
Tana uulu yo, mi tatke yo pa pataŋana tio taiŋgi.
22 Pa iŋgi aŋbot ŋoobo kat, mi leŋ zaala sa som.
Tana keteŋ kutkut.
23 Nio kembei koroŋ kunuunu ta so zoŋ isula na, imbiriizi raama.
Nio kembei siizi ta miiri iwilaali ma ila lene.
24 Nio aŋgalsek ituŋ pa kini kanŋana ma molo, tana kumbuŋ mburaana mini som,
mi aŋkoŋkoŋ ma tiroŋ men.
25 Mi sombe koŋ koi bizin tire yo, na tirepilpiili yo mi aŋwe ŋeu pizin.
Mi uten suk pio ma tiso: “Aa buri, yamaana kek?”

26 Yooba Anutu tio, uulu yo.
Pa nu toto sua ku mbukŋana mi urur lelem pa wal ku. Tana kamke yo lak!
27 Kam uraata biibi pa nomom woono, mi swe mburom pa koŋ koi bizin ma tire kat.
Naso tikilaala kembei nu ta ulaaŋa tio.

28 Ŋonoono, zin tiwirri sua sananŋana pio. Tamen nu ko kampe yo.
Mi sombe lelen be timaŋga pio, na timaŋga lak! Pa nu ko koto zin mi pimiili zin ma tila raama kan miaŋ.
Naso kam mbesooŋo ku ma leleene ambai mi menmeeni.
29 Tana zin wal ta tiŋgalŋgal sua pio na, pakankaana zin mi kam zin ma tiru zalan. Naso kan miaŋ ma tisaana kat, mi timbotmbot men ta kembei.
Kan miaŋ tana ko iwe kembei mburu pizin be tizebzeebe zin pa totomen.

30 Sombe Yooba ikam ta kembei, nako leleŋ ambai kat pini, mi kalŋoŋ isala ma aŋpakuri.
Mi sombe niamŋan zin iwal biibi amlup yam pa suŋŋana, nako aŋmaŋga ma aŋwit zaana ma isala ta kor a.
31 Pa zin wal ta timbot ŋoobo mi tiru zalan na, ni imbotmbot zilŋan uunu be iuulu zin.
Mi zin wal ta tomtom tiŋgalŋgal sorok sua pizin ma tisombe tipun zin ma timetmeete na, ni ikamkewe zin.
Copyright information for `MNA