aMbo 37:21,26; Lu 6:34+
bLu 19:8; Ŋgo 9:36; 2Kor 9:9

Psalms 112

Mboe 112

Mbulu kizin wal ta titoto zaala ki Anutu

Haleluya!
Tomtom ta so imototo Yooba mi ileŋleŋ la kalŋaana,
mi leleene pa tutu kini ilip, nako leleene ambai kat.
Pa kampeŋana ki Anutu ko imbotmbot se kini.
Mi popoŋana kini ko tiwe wal zanŋan mi ndeeŋeŋan.
Tana zin wal ta timbotmbot toono ti, nako matan ikot se kizin, mi kampeŋana ki Anutu imbotmbot se kizin.
Tomtom ta kembena, ziŋan zin wal ta timbotmbot ruumu kini na, ko tirao kat pa koroŋ ta boozomen.
Mi ni ko ikiskis mbulu ndeeŋeŋana ma imbol pini, mi iseeŋge iseeŋge ma ila.
Tomtom ndeeŋeŋana, sombe imbotmbot la zugut biibi leleene, na mat ko iyaara pini.
Mi ni leleene izanzaana pa zin mbesooŋo kini, mi imuŋaiŋai zin mi ikampewe zin.

Tomtom ta so imuŋaiŋai zin tomtom, mi irairai koroŋ kini pizin,
mi ikamam katkat mbulu pizin, nako imbot ambai. a 
Tomtom ndeeŋeŋana ta kembei na, toomboŋana sa ko irao be itoki na som.
Mi tomtom ko tikamam ŋgar pini mi matan iŋgalŋgal mbulu kini, mi iseeŋge iseeŋge ma ila.
Sombe ni ileŋ uruunu sananŋana sa, na irao imoto na som.
Pa ipase pa Yooba, mi urlaŋana kini imbol kat.
Tana kopoono rru som, mi imototo som.
Izza men mi iurur mataana pa Anutu be ikoto ka koi bizin.
Mi zin wal ta timbot ŋoobo ma tiru zalan na, ni irairai koroŋ boozo pizin.
Mi ni ko ikiskis mbulu ndeeŋeŋana ma imbol pini, mi iseeŋge iseeŋge ma ila.
Tana tomtom ko matan ikot se kini mi tipakurkuri. b 

10 Mi zin wal sananŋan, sombe tire mbulu ta iwedet pini, nako keten malmal,
mi matan mburmbur pini, mi tiŋa zurun.
Tamen ŋgar ta lelen iur pa be tikam, nako iur ŋonoono som.
Tana zin ko tikam ma som, mi tisaana ma tila len.
Copyright information for `MNA