aŊgo 19:26; Tur 9:20
bMbo 135:15+; 1Kor 12:2; Tur 9:20
cMbo 37:3, 62:8

Psalms 115

Mboe 115

Yooba, ni Anutu ŋonoono

O Yooba, niam leleyam be tomtom tipakur zoyam pepe.
Bela tipakur nu zom. Pa nu itum tamen ta zom biibi.
Mi nu toto sua ku mbukŋana, mi urur lelem pa wal ku mi muŋaiŋai zin. Tana swe mburom mi uulu yam.
Kokena zin karkari tirepilpiilu mi tizzo piam ta kembei:
“Anutu tiom mburaana iŋgoi?”
Anutu tiam, ni imbotmbot saamba.
Mi mbulu pareiŋana ta so ni leleene pa be ikam, na ikam men.

Tamen wal pakan na, tiurpewe merere kizin pa silba mi gol.
Merere kizin tana na, tomtom naman murin men. a 
Zin kwon mi matan.
Mi tirao be tiso sua som, tire lele som.
Zin talŋan mi kuzun.
Mi tirao be tileŋ sua som, mi tiyoozo koroŋ sa som.
Zin kumbun mi naman.
Mi tirao be tipa som, mi tiyamaana koroŋ sa som.
Mi miiri sa ipet pa kwon som. Pa ina zin matan yaryaaraŋan som. b 
Tana zin wal ta so tiurpe merere pakaamŋan ta kembei,
mi zin ta tipase pa merere pakaamŋan,
nako len mburan sa som, mi tiwe koroŋ sorok kembei ta merere kizin.

Niom iwal biibi ki Israel, kapase pa Yooba.
Pa ni ta ulaaŋa tiom, mi iwe siŋgiao piom mi iporoukalkaala yom. c 
10 Mi niom patoronŋana koyom ta popoŋana ki Aron na tomini, kapase pa Yooba!
Pa ni ta ulaaŋa tiom, mi iwe siŋgiao piom mi iporoukalkaala yom.
11 Tana niom wal ta komototo Yooba mi keleŋleŋ la kalŋaana na, niom ta boozomen kapase pini.
Pa ni ta ulaaŋa tiom, mi iwe siŋgiao piom mi iporoukalkaala yom.

12 Yooba, ni mataana iŋgalŋgal yam. Mi ni ko ikampe yam.
Ko ikampe zin iwal biibi ki Israel,
mi ikampe zin patoronŋana kan ta popoŋana ki Aron na tomini.
13 Tana zin wal ta timototo i mi tileŋleŋ la kalŋaana na, ni ko ikampe zin ta boozomen.
Zin sorrokŋan, mi zin ta zanŋan na tomini.

14 Yooba ko ipombol yom ramaki lutuyom bizin ma kamasak ma kewe boozo.
15 Yooba ta iur saamba mi toono.
Itunu ko ikampe yom.

16 Yooba iur saamba be iwe itunu muriini.
Mi toono na, ni iur piti tomtom be tombot pa.
17 Zin wal ta timetmeete ma tisula len Andewa na, tizzo sua mini som.
Tana tirao be tipakur Yooba mini som.
18 Tamen iti ta tombot matanda yaryaara i, nako lelende ambai pa Yooba mi tapakurkuri pa kampeŋana kini ta buri,
buri, mi iseeŋge iseeŋge ma ila.
Haleluya!
Copyright information for `MNA