aRo 3:4
bMbo 22:25, 66:13
cMbo 72:14

Psalms 116

Mboe 116

Suŋŋana ki tomtom ta Anutu itatke i pa pataŋana kini

Nio leleŋ pa Yooba ilip paso, ni ileŋ tiŋiizi tio.
Nio aŋtaŋroro i, mi ni iŋgun talŋaana pio mi iuulu yo.
Tana mazwaana ta so aŋbotmbot su toono,
nako aŋzzoyaryaara uraata biibi ta ni ikam pio na.
Kilis ki meeteŋana, rimen mi ikam yo.
Wooro ki Andewa ta ikaukau yo, mi iyakat yo be aŋsula zin meeteŋan murin.
Tabe ikam ma leleŋ ipata, mi aŋmoto koŋ ma aŋsaana kat.
To aŋtaŋroro Yooba.
Aŋso ta kembei: “O Yooba, uulu yo lak!”

Yooba, ni ndeeŋeŋana. Mi imuŋaiŋai iti ta mbesooŋo kini na, mi ikampewe kat iti.
Pa Anutu kiti, ni leleene izanzaana piti.
Tana zin wal ta tirao be tiuulu zitun som na, Yooba itunu imenderkalkaala zin.
Kembei ta nio i. Indeeŋe ta mburoŋ imap ma aŋsaana kat na, ni imar mi ikamke yo.
Tana ko irao aŋmoto mini som mi leleŋ ambai.
Pa Yooba ikampe yo kat, mi ikam yo ma keteŋ su.

Ŋonoono kat, ni itatke yo pa meeteŋana,
mi imus motoŋ luluunu ma ila ne.
Mi ni ta ikiskis yo. Tana aŋtop som, mi aŋmeete som,
mi iŋgi aŋbot motoŋ yaryaara, mi niamru Yooba amwwa.
10 Ŋonoono, muŋgu aŋso ta kembei: “Iŋgi pataŋana biibi isalakaala yo mi aŋbot ŋoobo kat.”
Tamen aŋzem urlaŋana tio som.
11 Pataŋana tana ikam yo ma aŋru zaala. Tana aŋpiri sorok sua ma aŋso ta kembei:
“Tomtom ta boozomen na, pakamkaamŋan men. Irao aŋdemeere tasa na som. Som kat!” a 

12 Mi ko aŋpekel kampeŋana ambaimbaiŋan boozomen ki Yooba be parei?
13 Nio ko aŋkam patoronŋana pini, mi aŋkam mbooro baen ma aŋliŋ sala.
Mi leleŋ ambai pini, mi aŋpakuri pa ulaaŋa biibi ta ni ikam pio na, mi aŋzzoyaryaara zaana biibi.
14 Tana Yooba wal kini tisombe tilup zin pa suŋŋana,
na nio ko aŋto sua ta aŋbuk la kini na, mi aŋkam ka uraata ila matan. b 

15 Zin wal ta tiurur lelen pa Yooba mi titoto mbulu kini na, ni ire zin kembei koroŋ kini ŋonoono.
Tana leleene be kizin tasa imeete sorok na som. c 

16 O Yooba, nio mbesooŋo ku. Aŋbesmbeeze pu kembei ta muŋgu naŋgoŋ ikamam na.
Mi nu ta putke wooro ta ikaukau yo na, mi tatke yo pa meeteŋana.
17 Tana leleŋ ambai pu, mi aŋso aŋkam patoronŋana pu,
mi aŋzzoyaryaara zom biibi.
18 Tana Yooba wal kini tisombe tisala Yerusalem mi tilup zin pa suŋŋana lela urum kini,
na nio ko aŋto sua ta aŋbuk la kini na, mi aŋkam ka uraata ila matan.
Haleluya!
Copyright information for `MNA