Psalms 122

Mboe 122

Suŋŋana pa Yerusalem

Mboe kizin wal ta tizalla pa Yerusalem Mboe ki Dabit

Indeeŋe tomtom tiso pio ma tiso: “Tamaŋga mi tasala pa urum ki Yooba,”
na ikam yo ma leleŋ ambai kat.

Mi iŋgi tamar ma telela siiri kwoono ki Yerusalem,
mi temendernder lela kar biibi kek.

Yerusalem, ina kar ndabokŋana. Tipo ma ambai kat.
Mi ka siiri ta iliu na, mbolŋana.
Niam wal ki Yooba amzze mi amluplup yam su kar ta ti.
Zin Israel un bizin ta boozomen tiwwa ma timarmar kar Yerusalem taiŋgi be tipakur Yooba zaana.
Tito tutu ta ni iur pizin tau.
Pa zin king tiam ta Dabit popoŋana kini na, murin peeze kana imbotmbot kar ta ti.
Tana timbotmbot ti mi tiurpewe pataŋana kizin tomtom.

Kusuŋ pa kar Yerusalem bekena imbot ambai! Kusuŋ ta kembei:
“Zin wal ta so tiur lelen pa Yerusalem, nako timoto som mi timbotmbot ndabok men.
Mi zin wal ta timbotmbot lela siiri mbolŋana ki Yerusalem leleene, nako timbot ambai.
Mi king ziŋan zin peeze kan kini ta timbotmbot lela ruumu mbolŋan ki Yerusalem na, ta kembena. Ko timoto som, mi timbot ndabok men.”

Nio motoŋ iŋgal zin toŋmatiziŋ tio mi zin gaabaŋoŋ, tana aŋso pa Yerusalem ta kembei:
“Niom Yerusalem koyom, Anutu ko imboro yom ma kombot ambai.”
Mi aŋkam ŋgar pa urum ki Yooba ta Anutu kiti na,
tana aŋsuŋi be imboro yom Yerusalem koyom ma kombot ambai pa koroŋ ta boozomen.
Copyright information for `MNA