aKam 19:5; Tit 2:14
bKam 12:29
cMbo 115:4; Tur 9:20

Psalms 135

Mboe 135

Anutu ki Israel imborro koroŋ ta boozomen mi ikamam uraata bibip

Haleluya!
Niom mbesooŋo ki Yooba ta kembesmbeeze pini lela urum kini leleene,
som kombotmbot urum zilŋaana na,
kapakur Yooba zaana!
Kapakuri paso, ni ambaiŋana kat.
Kombo mboe pini mi kapakur zaana ndabokŋana.
Pa Yooba itunu ta ipeikat Yakop, mi ikami ma iwe lene.
Tana ni ire iti Israel kembei koroŋ kini ŋonoono, mi leleene piti ilip. a 

Nio aŋute kat ta kembei: Yooba, ni ta biibi ŋonoono.
Merere kiti ilip kat pa merere ta boozomen.
Sombe Yooba leleene iur be ikam mbulu sa isu saamba, som toono, som tai,
som mozo lukutuunu, na ikam men.
Pa koroŋ sa irao be ipakaali na som.
Ni ta ikamam ma miiri tieene indoundou ma izze pa lele uunu.
Mi iŋgoŋgo yaŋ, mi ikamam ma lolo iwenweene zin koroŋ.
Mi ikakaaga kataama pa ruumu kini ta miiri imbotmbot lela na, be iyooto mi iloondo ma irao toono.

Muŋgu, ni ikasgeege zin pikin muŋgamuŋga mi mbili muŋgamuŋga kizin Aikuptu ma timap lup. b 
Mi ikam mos mi uraata bibip isu Aikuptu,
bekena iseeze king kizin ziŋan mbesooŋo kini ta boozomen matan.
10 Ni ta ikasgeege zin karkari boozomen,
mi ipun zin king mburanŋan ma timetmeete.
11 Ipun Sihon ta king kizin Amor na,
Og ta king ki Basan na,
mi king ta boozomen ki toono Kanaan.
12 Mi ikam toono kizin pa wal kini Israel ma iwe len
be timbotmbot pa, mi iseeŋge iseeŋge ma ila.

13 O Yooba, zom biibi ko imbotmbot ma alok!
Tomtom ko tipepeebe len kelŋan, mi matan iŋgalŋgal uraata ku mi tizzoyaryaara urum, mi iseeŋge iseeŋge ma ila.
14 Pa Yooba imendernder pa wal kini mi iurur kadoono pa kan koi bizin.
Mi leleene izanzaana pa zin mbesooŋo kini.

15 Zin merere kizin karkari na, tomtom tiurpewe zin pa silba mi gol.
Merere ta kembei na, tomtom naman muriini men. c 
16 Zin kwon mi matan.
Tamen tirao be tiso sua som, mi tire lele som.
17 Zin talŋan. Mi tirao be tileŋ sua som.
Mi miiri sa iwedet pa kwon som. Paso zin matan yaryaaraŋan som.
18 Tana zin wal ta so tiurpe merere pakaamŋan mi tipase pizin,
nako len mburan sa som, mi tiwe koroŋ sorok kembei ta merere kizin.

19 O niom iwal biibi ki Israel, kapakur Yooba pa kampeŋana kini!
Mi niom patoronŋana koyom ta popoŋana ki Aron na tomini, kapakur Yooba pa kampeŋana kini!
20 Mi niom popoŋana ki Lebi ta ku'uluulu uraata ki urum na, ta kembena. Kapakur Yooba pa kampeŋana kini!
Tana niom wal ta komototo Yooba mi keleŋleŋ la kalŋaana na, niom ta boozomen kapakuri pa kampeŋana kini.

21 Yooba muriini imbotmbot ta Yerusalem.
Tana niom wal ta kombot su Sion na, kapakuri pa kampeŋana kini!
Haleluya!
Copyright information for `MNA