aTur 18:1-19:4

Psalms 137

Mboe 137

Zin Israel lelen isaana pa mbulu ta zin Babilon tikam pa Yerusalem

Indeeŋe ta tikam yam ma amla ambot su Babilon na, ambutultul su yok kizin kezenkezen, mi amtwermiili pa kar Sion ma leleyam isaana kat mi amtaŋtaŋ.
Mi ampalweeze kombom tiam se ke namannaman ma timbombooren sorok.
Pa koyam koi bizin ta tikam yam ma amla ambot lele kizin na, tikam seŋge piam ma tiso piam be amrak mi ambo mboe bekena tileŋ len ma lelen ambai.
Tiso piam ta kembei: “Ou, kombo mboe tiom sa ki kar Sion ma amleŋ.”
Mi iŋgi ambot toono toro.
Tana ko irao ambo mboe ki Yooba be parei? Ina som.

O kar Yerusalem, sombe motoŋ mbeleelu,
na aŋsuŋ Yooba be ipasaana nomoŋ woono ma aŋwe kaamaŋoŋ.
Kokena aŋse kombom mini.
Mi sombe motoŋ imbiriizikaala Yerusalem,
mi menmeen yo pa koroŋ toro sa ma ilip pa Yerusalem,
na aŋsuŋ Yooba be ipasaana kwoŋ ma imun.
Kokena aŋbo mboe mini.

O Yooba, motom iŋgalŋgal mbulu kizin Edom kan mi pokot.
Pa indeeŋe ta koyam koi bizin tireege Yerusalem na,
zin Edom menmeen zin mi kalŋan izalla ma tizzo ta kembei:
“Yo! Kereege Yerusalem.
Kereege ma isu lene kat!”
Mi niom Babilon koyom, nako tireege kar tiom ma isaana kat!
Tomtom ta so ipokot mbulu ta kakam piam, nako leleene ambai mi kampeŋana ki Anutu imbot se kini.
Mi zin ta so tikam lutuyom bizin mi tipiliiti zin sala pat na, ta kembena. Ko lelen ambai kat mi kampeŋana ki Anutu imbot se kizin. a 
Copyright information for `MNA