aMbo 113:7+; Lu 1:52, 14:11
bPil 1:6

Psalms 138

Mboe 138

Suŋŋana ki tomtom ta leleene ambai pa ulaaŋa ki Anutu

Mboe ki Dabit

O Yooba, nio leleŋ ambai pu, mi leleŋ imap ipakuru!
Nio aŋbo mboe pakurŋana pa nu itum tamen. Merere toro sa som. Tana sombe merere pakan tire yo, na tire yo lak!
Nio motoŋ ima pa urum ku mi aŋlek kumbuŋ pu.
Mi leleŋ ambai pu mi aŋpakur zom!
Pa nu toto sua ku mbukŋana, mi urur lelem pa wal ku mi muŋaiŋai zin.
Nu zom biibi kat. Tamen mbulu pakan ta mbuk sua pa be kam, inako ikam ma zom biibi ma ilip.
Indeeŋe ta aŋtaŋroro u be uulu yo na, nu leŋ suŋŋana tio,
mi pombol yo, mi kam yo ma niŋ ise.

O Yooba, king ta boozomen ki toono, sombe tileŋ sua ta ipet pa kwom,
nako lelen ambai pu mi tipakuru.
Ko timbo mboe mi tipakuru pa zom biibi, mi mburom, mi mbulu ta kamam pizin na.
Ŋonoono Yooba, nu biibi mi mbotmbot sala kor kat. Mi motom iŋgalŋgal zin wal sorrokŋan.
Tamen zin wal tau tipakurkur zitun na, nu ute zin lup. Pa nu motom molo. a 

Sombe pataŋana boozo isalakaala yo, na nu ko uulu yo ma aŋbot ambai mini.
Mi sombe koŋ koi bizin keten malmal kat pio, mi tikamam be tipasaana yo,
na nomom woono mbolŋana ko iporoukaala yo ma aŋbot ambai.
O Yooba, mbulu boozomen ta lelem iur pa be ipet pio, ina kola ipet.
Pa nu toto sua ku mbukŋana mi urur lelem pa wal ku ma alok.
Tana pizil ndemem pio pepe. Pa nio na itum nomom muriini tau. b 
Copyright information for `MNA