aMbo 17:3, 44:21; Ibr 4:13
bMbo 94:11; Mt 9:4
cYo 21:17; Ibr 4:13
dRo 11:33
fMbo 119:73
gMbo 26:2; Tur 2:23
hMbo 17:3+

Psalms 139

Mboe 139

Anutu imbotmbot raama iti mi irre iti totomen

Mboe ki Dabit

Yooba, nu itum tiiri kat leleŋ
mi ute yo ma imap. a 
Nio, sombe keteŋ su, som aŋmaŋga mi aŋla pa uraata, na nu ute.
Pa nu motom molo. Tana ute ŋgar tio ma imap. b 
Sombe aŋpa ma aŋla lele sa, som aŋur motoŋ ri mi aŋkeene leŋ, na nu rre yo.
Tana nu ute mbulu tio ta boozomen. c 
Yooba, sua ta leleŋ iurur pa mi ipet pa kwoŋ zen i,
ina tomini, nu ute ma imap.
Nu muŋmuuŋgu pio mi kemermer pio.
Mi itum nomom, ta ikiskis yo mi ikamam peeze pio.
Nio aŋkam ŋgar pa mbulu ku tana ma aŋrao som.
Pa ŋgar ku na, ipa ndel. Ilip kat pio. d 

Nio sombe leleŋ be aŋko molo pu, nako aŋla ki parei? Som.
Pa aŋrao be aŋke pa motom na som. e 
Sombe aŋsala pa saamba, na nu mbotmbot.
Mi sombe aŋkeene sula Andewa, na nu mbotmbot su tina tomini.
Mi sombe aŋrie ma aŋla pa lele ta zoŋ ise,
som aŋla aŋbot lele pakaana ta zoŋ isula pa,
10 nako aŋdeeŋu mbotmbot.
Mi nu ko wiliŋ yo ma ituru tala.
11 Mi sombe aŋso be zugut imar ma izukkaala yo,
mibe mat itooro ma iwe mbeŋ,
ina tomini irao be ipakaala yo pa motom na som.
12 Pa zugut irao be isekaala motom na som.
Mi mbeŋ na, nu rre koroŋ ta boozomen raraate kembei ta aigule.
Tana zugut mi mat na, raraate men pa nu motom.

13 Nu ta ur leleŋ.
Mi nu ur koroŋŋoŋ ta boozomen, mi lup lela anaŋ kopoono leleene mi aŋsu. f 
14 Tana nio aŋmoto u mi aŋpakuru. Pa nu pa ndel kat.
Mi uraata ku boozomen ta kembena. Ipa ndel kat.
Nu ute yo ma imap.
15 Indeeŋe ta aŋtum riŋariŋa lela anaŋ kopoono na, nu ute.
Tiroŋ ta boozomen iŋgalakenken, mi tasa ike pa nu motom som.
16 Tana aŋbotmbot lela anaŋ kopoono, mi nu re yo kek.
Mi aigule ta munŋaana men tabe aŋbotmbot su toono i, na lelem iur pa mi tibeede se ro ku, mana anaŋ ipeebe yo ma aŋsu.

17 O Anutu, nio aŋkam kinkiini be aŋute ŋgar ku. Tamen aŋrao som.
Pa ŋgar ku ilip kat. Nu kamam ŋgar pa koroŋ munŋaana ka tieene.
18 Sombe aŋtoombo be aŋnin zin, na aŋrao som. Pa tilip pa magargaara ta tai kana i.
Mibe aŋnin ma imap, ina tomini irao ikam yo ma aŋute katu na som.

19 O Anutu, nio aŋsombe nu pun kat zin wal sananŋan ma timetmeete lup.
Mi zin wal ta titekteege siŋ pizin tomtom na, leleŋ be timbot molo pio.
20 Kom koi bizin tana tipakamkaam, mi tiwirri sua sananŋana pu,
mi tipombolmbol sorok sua kizin pa nu zom.
21 O Yooba, zin wal ta tiurur koi pu na, nio tomini aŋurur koi pizin.
Mi zin wal ta timaŋga be tizorzooru na, leleŋ pizin risa som kat.
22 Aŋurur koi pizin, mi aŋre zin kembei koŋ koi bizin ŋonoono.

23 O Anutu, tiiri leleŋ mi ŋgar tio.
Toombo yo bekena ute kat ŋgar ta imbot la leleŋ i. g 
24 Tiiri yo to re: Nio aŋtoto zaala sananŋana som.
Mi pazalzal yo bekena aŋto zaala ku ndabokŋana. Naso aŋbot ambai ma alok. h 
Copyright information for `MNA