aMbo 10:4, 53:1+; Ro 3:10+
bUn 18:21
cUn 6:5
eMbo 53:6, 126:1

Psalms 14

Mboe 14

Wal kankaanaŋan ta tizorzooro Anutu

Mboe ki Dabit

Wal kankaanaŋan ta tizorzooro Anutu na, tizzo pa zitun ta kembei: “Anutu sa som.”
Wal ta kembei, ŋgar kizin isaana kek. Mi tiyo naman pa mbulu sananŋan boozomen.
Tana Anutu leleene pizin risa som kat. Pa kizin tasa ikam mbulu ambaiŋana sa som. a 

Yooba imbotmbot saamba, mi irre su pizin tomtom mi itirtiiri zin.
Ko kizin tasa le ŋgar ambaiŋana,
mi ikam kinkiini be iute Anutu mi ito mbulu kini? b 
Mi som. Timap ma tizem zaala kini kek. Tisaana lup.
Kizin tasa ikam mbulu ambaiŋana sa som.
Som kat. c 

Tana Yooba iso: “Wal tau tikamam mbulu sananŋana i, ŋiizi na ŋgar kizin ipet?
Gorgori tipasansaana zin wal tio, mi tipakamkaam zin, mi timbotmbot se kizin.
Mi matan iŋgalŋgal yo mi tizuŋzuŋ pio na som.” d 

Wal ta kembena na, kozo tire zin. Pa kaimer motoŋana biibi kola ikam zin ma tisaana kat.
Tamen wal ndeeŋeŋan na, zin ko timbot ambai. Pa Anutu ko ilae kizin mi igabgaaba zin pa lupŋana kizin.
Zin wal sorrokŋan ta len mburan biibi som na, niom wal sananŋoyom kapakalkaala zaala pizin. Tanata ŋgar kizin iurur ŋonoono som.
Tamen Yooba itunu ko iwe ur pizin mi imenderkaala zin.

O yalei, ulaaŋa ta imbot abal Sion a, imar ma ikamke zin Israel, so ndabok!
Mi sombe Yooba iuulu wal kini pa pataŋana kizin ma timbot ambai mini,
tona Yakop popoŋana kini ko lelen ambai ma menmeen zin biibi. e 
Copyright information for `MNA