aRo 3:13; Yems 3:8
bMt 3:10; Tur 20:15
cMbo 9:18, 34:6
dMt 5:8

Psalms 140

Mboe 140

Tatke yo pa koŋ koi bizin naman

Mboe ki Dabit

O Yooba, tatke yo pizin wal sananŋan.
Poroukaala yo pizin wal ta tikamam zaaba pizin tomtom na. Kokena tipasaana yo.
Zin lelen iurur pa ŋgar sananŋan bozboozo,
mi tipesese zin tomtom pa malmal.
Kwon na, kembei mooto sananŋan. Pa sua ta tiwirri na, mataanaŋana,
mi ipasansaana zin tomtom kembei mooto kananŋana na. a 

O Yooba, menderkaala yo: Kokena zin wal sananŋan tikam yo.
We seraara pa zin wal ta tikamam zaaba pizin tomtom na.
Pa iŋgi tirru zaala be tikam yo ma aŋtop.
Zin wal ta tipakurkur zitun mi matan pasomu, ta iŋgi tiur napitpit kizin be tipasaana yo.
Mi tiraara pu kizin be tikam yo.
Mi tiur kilis su zaala ta aŋwwa pa, bekena tikeene yo.

Mi nio aŋso pa Yooba ta kembei: “Nu ta Anutu tio!
Ŋgun talŋom pa tiŋiizi tio ti mi muŋai yo.
O Yooba, Merere tio, nu ulaaŋa tio mburomŋom.
Indeeŋe mazwaana ki malmal na, nu poroukalkaala yo.

Yooba, iŋgi zin wal sananŋan lelen iur be tipasaana yo, mi timburmbuuru pio.
Tana aŋsuŋu be koto zin.
Kokena ŋgar kizin sananŋana tana iur ŋonoono.
Zin nin se mi tiliu yo be tipasaana yo.
Mi nio aŋsuŋu be pimiili sua sananŋana ta iwedet pa kwon na, ma imiili pizin mi ipasaana zitun.
10 Kam ma you keseene itoptop sala ŋwan.
Mi piri zin sula kat naala ta usomŋana i. Kokena tise mini. b 
11 Zin wal ta tiŋgalŋgal sua pakaamŋana pizin tomtom na, ziiri zin pa toono ku ma tila len.
Mi zin wal ta tikamam zaaba pizin tomtom na, mbulu sananŋana ko iketo zin mi ipasaana zin ma timap.

12 Yooba, nio aŋute: Nu uluulu zin wal ta tomtom tikamam pataŋana pizin na, mi urur kadoono pa kan koi bizin.
Mi zin wal ta timbot ŋoobo na, nu mendernder pizin mi uluulu zin pa pataŋana kizin. c 
13 Ŋonoono kat, zin wal ndeeŋeŋan ko lelen ambai pu mi tipakur zom.
Mi zin wal ta lelen ŋgeezeŋan ko timbotmbot su kerem uunu totomen. d 
Copyright information for `MNA