a1Tim 2:8; Tur 5:8, 8:3
bMbo 34:13; Mt 12:36; Ep 4:29; Yems 1:26, 3:8

Psalms 141

Mboe 141

Tomtom ta isuŋ Anutu be ipiŋgis toomboŋana ma imbot molo pini

Mboe ki Dabit

O Yooba, nio aŋtaŋroro u be loŋa mar mi uulu yo!
Ŋgun talŋom mi leŋ kalŋoŋ.
Leleŋ be suŋŋana tio iwe kembei koroŋ kuziini ambaiŋana ta tirukruk su kerem uunu na.
Mi sombe aŋwit nomoŋ mi aŋsuŋ, na re suŋŋana tio kembei patoronŋana ta tikamam pa mbeŋ na. a 
O Yooba, mboro kat mioŋ mi menderkaala kwoŋ. Kokena sua sananŋana sa iyooto pa. b 
Mi zem ŋgar sananŋana sa ma izeebe yo pepe. Kokena aŋgaaba zin wal sananŋan pa mbulu kizin.
Uulu yo be aŋmender mbolŋana. Kokena tiyaaru yo ma aŋla aŋgaaba zin mi niamŋan amkan kini kizin mbuyeeneŋana.
Tomtom ndeeŋeŋana sa, sombe ibalis yo mi iyaamba yo be ipazal yo, inako leleŋ ambai men. Pa ina iswe kembei ni iur kat leleene pio.
Tamen zin wal sananŋan na, irao aŋyok be tipomoozo yo mi tiliŋ ŋgere kizin ambaiŋana sala uteŋ na som.
Pa nio aŋzuŋzuŋu totomen be koto mbulu kizin sananŋana.

Zin wal sananŋan, sombe Ni ta Tiiriŋana Katuunu i, iur kadoono pizin mi igiibi zin sula lele taraŋgatŋana, to tikilaala ta kembei:
Sua ta muŋgu aŋkamam pizin bekena aŋpazal zin na, sua ambaiŋana mi sua ŋonoono.
Wal tana tiron ko timbot leŋaleŋa su Andewa kwoono kembei toono ta bapalo itaara na.

O Yooba, Merere tio, nio aŋurur motoŋ pu be we ur pio mi menderkaala yo. Tana zem yo ma aŋmeete pepe.
Mboro yo mi motom pio. Kokena kilis ta zin wal sananŋan tiur pio na, ikeene yo,
som aŋti la pu ta zin tiraara pio.
10 Kam wal tana ma timap titi la zitun pu kizin.
Mi uulu yo ma piŋgis pai tio pa pu kizin.
Copyright information for `MNA