Psalms 142

Mboe 142

Suŋŋana ki tomtom ta iyamaana kembei ni itutamenŋana

Mboe ki Dabit Indeeŋe ni imbotmbot lela raŋ sumbuunu na, itooro mboe ti

Nio kalŋoŋ isala mi aŋtaŋroro Yooba.
Tiŋiizi tio ila kini be imuŋai yo. Pa ni ta biibi tio.
Pataŋana tio ta boozomen aŋzzwe la kini.
Mi koroŋ ta ikam yo ma leleŋ ipata na, aŋzzo i pa.

Nio sombe leleŋ ipata kat mi mburoŋ ikamam be imap, na nu ute zoloŋ.
Zaala ta aŋtoto na, koŋ koi bizin tiur kilis su be tikeene yo pa.
Mi motoŋ lae zilŋoŋ uunu na, tomtom sa imbot be iuulu yo na som.
Mi muriŋ sa be aŋke lela mi aŋbot ambai pa na som.
Mi tomtom sa ikam ŋgar pio som.

Yooba, nio aŋtaŋroro u be uulu yo.
Mi aŋpase pu mi aŋso ta kembei: Nu ta ko menderkaala yo mi we ur pio be aŋke lela.
Tana mazwaana ta so aŋbotmbot su toono na, sombe nu mbotmbot raama yo, na aŋru leŋ koroŋ toro mini paso?
Pa nu kampewe yo mi aŋbotmbot se ku pa koroŋ ta boozomen.
Ŋgun talŋom pa tiŋiizi tio.
Pa iŋgi pataŋana tio taiŋgi ikoto yo ma aŋbot ŋoobo kat.
Tatke yo pa koŋ koi bizin naman.
Pa zin wal ta tiketoto yo na, mburan ilip kat pio.
Iŋgi aŋyamaana kembei aŋbot lela ruumu sanaana leleene i.
Tana uulu yo be aŋyooto. Naso aŋpakur zom.
Mi zin wal ndeeŋeŋan ko tire kampeŋana ku ta swe pio na, ma timar tiliu yo mi niamŋan ampakur zom.
Copyright information for `MNA