aRo 11:33
bKam 34:6
cMbo 103:13+, 136:1
d1Kor 1:9; 1Tim 1:17; Ibr 10:23; Tur 11:15
eMbo 37:17
fMbo 104:28; Mt 6:26

Psalms 145

Mboe 145

Tapakur Merere pa mburaana mi kampeŋana kini

Mboe pakurŋana Mboe ki Dabit

O Anutu, nu ta king tio. Nio ko aŋwit urum isala kor,
mi aŋpakur zom pa kampeŋana ku ta buri, mi iseeŋge iseeŋge ma ila.
Aigule ta boozomen nio ko aŋpakurkuru pa kampeŋana ku,
mi aŋwidit zom isala kor ta buri, mi iseeŋge iseeŋge ma ila.
Yooba, ni ta biibi ŋonoono. Takam ŋgar pini na tarao som. Tanata tomtom tiwidit uruunu ma isala kor kat!
Pa ni biibi kat. a 

Tomtom ko tipepeebe len kelŋan, mi tiwidit urum pa uraata ku ndabokbokŋan, mi tizzo zin pa.
Ko tizzo zin pa mos ku mburanŋan ma tileŋleŋ. Naso zin tomini tipakurkur zom, mi iseeŋge iseeŋge ma ila.
Ko tizzo pa mburom, zom biibi, mi azuŋka ku ta ilip kat.
Mi nio ta kembena. Leleŋ be aŋkamam ŋgar pa uraata ku ndabokbokŋan ta ipa ndel kat.
Tomtom ko tizzoyaryaara uraata ku mburanŋan ta tomtom tire ma timoto na.
Mi nio ko aŋzzoyaryaara zom biibi.
Tomtom ko matan iŋgalŋgal kampeŋana ku biibi mi tizzoyaryaara uruunu.
Ko kalŋan izalla mi timbombo mboe pa mbulu ku ndeeŋeŋana.

Pa Yooba, ni leleene izanzaana pizin mbesooŋo kini, mi imuŋaiŋai zin mi ikampewe zin.
Ni keteene malmal karau som.
Mi itoto sua kini mbukŋana mi iurur kat leleene pa wal kini. b 
Yooba, ni ikamam mbulu ambaiŋana pa tomtom ta munŋaana men.
Mi leleene izanzaana pa koroŋ boozomen ta itunu iur zin na. c 

10 O Yooba, koroŋ boozomen ta itum ur zin, nako timap ma tipakur zom.
Mi wal ku ta tiurur lelen pu mi titoto mbulu ku, nako lelen ambai pu mi tipakuru pa kampeŋana ku.
11 Ko tizzo pa peeze ku ta mburaanaŋana mi ndabokŋana kat na.
Mi tiwidit mbol pa mburom biibi.
12 Naso tomtom ta boozomen tiute ta kembei: Nu kamam uraata mburanŋan.
Mi peeze ku ta kembena. Mburaanaŋana mi ndabokŋana kat.
13 Peeze ku ko iseeŋge iseeŋge ma ila.
Koroŋ ta boozomen ko timbotmbot la kopom mbarmaana, mi nu mborro zin ma alok.
Yooba itoto sua kini mbukŋan ta boozomen.
Uraata kini ta boozomen iswe i kembei ni itoto sua kini mbukŋana mi iurur leleene pa wal kini. d 
14 Zin wal ta so pataŋana ipun zin ma mburan imap na, ni iuluulu zin. Mi wal boozomen ta pataŋana ikototo zin na, ni isilou zin. e 

15 Koroŋ matan yaryaaraŋan ta boozomen tiurur matan pu. Pa sombe petel zin, na nu kamam kan kini.
Nu welweele nomom be pututu zin, mi zin ta boozomen tikan ma tirao. f 

17 Yooba mbulu kini ta boozomen iswe i kembei ni ndeeŋeŋana.
Mi uraata kini ta munŋaana men iswe i kembei ni itoto sua kini mbukŋana mi iurur leleene pa wal kini.
18 Zin wal ta so titaŋroro i raama lelen,
na ni imbotmbot kolouŋana pizin mi iuluulu zin.
19 Mi zin wal ta timototo i mi tileŋleŋ la kalŋaana na, sombe lelen pa koroŋ pakan mi tisuŋi pa, na ni ikamam pizin.
Ileŋleŋ tiŋiizi kizin mi iuluulu zin.
20 Tana zin wal ta tiurur lelen pini na, ni mataana pizin mi imenderkalkaala zin.
Tamen zin wal sananŋan na, ni ko ipasaana zin ma tila len lup.

21 Nio kwoŋ ko ipakurkur Yooba.
Mi koroŋ boozomen ta ni iur zin na tomini, ko timap ma tipakur zaana potomŋana.
Ta buri, mi iseeŋge iseeŋge ma ila.
Copyright information for `MNA