aŊgo 14:15; Tur 4:11, 10:6, 14:7
bMbo 9:18, 37:17, 103:6, 107:9
cMt 11:5, 11:28
dKam 22:22+; Mbo 10:18
eMbo 93:1, 99:1; Tur 11:15

Psalms 146

Mboe 146

Tapase pizin tomtom pepe. Tapase pa Anutu

Haleluya!
Leleŋ ko imap ipakur Yooba!
Mazwaana ta so aŋbot motoŋ yaryaara, nako aŋpakurkur Yooba.
Nio ko aŋbombo mboe pa Anutu tio, mi aŋpakurkuri ma irao swoŋ.

Zin wal peeze kan na, kapase pizin pepe.
Pa zin na, tomtom toono kan men. Tana tirao be tikamke yom na som.
Mi sombe timeete, nako timiili ma tisula mini toono.
To ŋgar pareiŋana ta muŋgu lelen iur pa be tikam, nako iur ŋonoono som. Pa ina, ko timetmeete ramaki.

Mi tomtom ta so ipase pa Anutu ki Yakop be iuuli, nako leleene ambai.
Pa tomtom ta so iurur mataana pa Yooba Anutu kini mi ipase pini, na kampeŋana ki Anutu ko imbotmbot se kini.
Yooba, ni ta iur saamba, toono,
mi tai, ramaki koroŋ boozomen ta timbotmbot pa. a 
Mi sua ta ni imbuk pa wal kini na, ni ko mataana iŋgalŋgal mi itoto ma alok.
Zin wal ta so tomtom tikam ŋoobo zin mi tiseseeze matan, na Yooba imendernder pizin mi iuluulu zin pa pataŋana kizin.
Mi zin wal ta so peteltel zin, na ni ikamam kan kini.
Mi wal ta so timbotmbot la kan koi bizin naman, na ni ikamkewe zin. b 
Mi zin ta matan pisŋan na, ni iurpewe zin ma matan ipeere.
Mi zin wal ta tikunkun pa pataŋana kizin na, ni iuluulu zin be tipa kat.
Yooba, ni iurur leleene pizin wal ndeeŋeŋan. c 
Mi zin wal ta so tiwe leembe pa lele sa, na ni mataana pizin.
Mi zin noroŋa mi zin moondo na, ni iuluulu zin ma timbot ambai.
Tamen zin wal sananŋan na, ni ipakokoogo zaala kizin ma tindeeŋe pataŋana boozo. d 

10 Yooba ko ikam peeze ma alok.
O niom Sion koyom, peeze ki Anutu tiom ko iseeŋge iseeŋge ma ila. e 
Haleluya!
Copyright information for `MNA