aMbo 34:18; 2Kor 1:3+, 7:6
bRo 11:33
cLu 1:52
dMt 6:26; Lu 12:24

Psalms 147

Mboe 147

Tapakur Merere pa muŋaiŋana kini mi mburaana biibi

Haleluya!
Ŋonoono kat. Sombe tombo mboe pa Anutu kiti mi tapakuri, ina ambai.
Pa mbulu ta kembei, ina indeeŋe men. Mi ikamam ti ma lelende ambai.

Iŋgi Yooba ikamam uraata be iurpe Yerusalem mi ipamender mini.
Mi iyyo zin Israel ta kan koi bizin tikoki zin ma tila timbot leŋaleŋa na, mi ikamam zin ma timilmiili mini.
Mi zin wal ta so lelen ipata ma tisaana kat na,
ni ipotortor lelen mi iurpewe pataŋana kizin. a 
Ni ta iur zin pitik, mi inin zin lup.
Mi itunu iwatwaata zanzan ma ikot zin.
Merere kiti, ni biibi ŋonoono mi mburaana ilip kat.
Mi ŋgar kini ta kembena, biibi kat. Koroŋ boozomen ta ni ikamam ŋgar pa na, tomtom sa irao iute kat na som. b 
Zin wal ta so timbotmbot raama pataŋana na, Yooba iuluulu zin ma timbot ambai mini.
Tamen zin wal sananŋan na, ni ikototo zin mi iparamraama ŋguren isula toono. c 

Leleyom ambai pa Yooba mi kombo mboe pini.
Kese kombom mi kapakur Anutu kiti.
Ni ikamam ma miiri tieene irao pa saamba.
Mi iŋgoŋgo yaŋ ma izzu bekena ipembesmbeeze toono.
Mi ikamam ma mbutmbuutu izze pa abal lwonlwon.
Ni ikamam zin buzur kan kini.
Mi sombe man aŋkor lutun bizin titaŋ pa kan kini, na ni ipututu zin tomini. d 

10 Tomtom lelen pa hos mburanŋan mi zin malmal kan ta kumbun imbol pa malmal na, mi nin se pizin.
Tamen Anutu, ni leleene pa koroŋ ta kembei som, mi niini se pizin som.
11 Ni leleene pizin wal ta timototo i mi tileŋleŋ la kalŋaana,
mi zin wal ta tipase pa mbulu kini ta itoto sua kini mbukŋana mi iurur leleene pa wal kini na.

12 O niom Yerusalem koyom, kapakur Yooba!
Niom Sion koyom, kiwit Anutu tiom uruunu ma isala kor!
13 Pa kar tiom ka siiri kwonkwon na, ni ipombolmbol ma tuŋ.
Mi kampeŋana kini imbotmbot se tiom.
14 Ni mataana pa lele tiom mi iporoukalkaala yom ma kombotmbot ambai men.
Mi ikamam koyom kini ta ndabokŋana kat.

15 Sombe ni leleene be mbulu sa ipet su toono, na iur sua men mi mbulu tana ipet.
Pa sua kini ikamam uraata karau men.
16 Ni ikamam ŋauŋau ma izzu mi ilol toono.
Mi iswirri tolou ma izzu ma irao toono.
17 Ni iwirri yaŋpat mi imiyaryaara kembei patpat,
mi ikamam ma lele ilomo kat. Tabe yok itooro ma iwe ais.
18 To izzo sua mini mi ais itooro ma iwe yok.
Pa ipei miiri kini bayouŋana ma iloondo, tabe ais itooro ma iwe yok mini mi ireere.

19 Muŋgu ni ikam sua kini ila ki Yakop.
Iso zin Israel pa tutu kini ta iur pataaŋa kek na, mi isope zin pa tutu kini ndeeŋeŋan.
20 Mbulu tana, ni ikam pa toono toro sa ka tomtom bizin som.
Tanata zin tiute tutu kini ndeeŋeŋan som.
Haleluya!
Copyright information for `MNA