aEp 6:17; Ibr 4:12; Tur 1:16

Psalms 149

Mboe 149

Anutu ko ikam wal kini ma tilip, tana zin tipakuri

Haleluya!
Kombo mboe popoŋana pa Yooba.
Niom wal kini ta kuurur leleyom pini mi kototo mbulu kini na, kulup yom mi kombo mboe pini ma kapakuri!
Niom Israel, leleyom ambai pini. Pa ni ta iur yom.
Niom Sion koyom, menmeen yom pini. Pa ni ta king tiom.
Karak mi kapakur Yooba zaana.
Kitir kakaaba mi kese kombom be kapakuri.

Pa Yooba, ni leleene ambai kat pa wal kini.
Zin wal ta timbotmbot raama pataŋana mi tipase pini men na, ni ko ikamke zin, mi ikam zin ma nin se.
Tana zin wal tau tiurur lelen pa Yooba mi titoto mbulu kini, nako lelen ambai mi nin se. Pa ni ko ipakur zin, mi ikam zin ma tilip.
Mi sombe tilek kumbun pini be tisuŋ, nako kalŋan isala mi tipakuri raama menmeen zin.
Mboe pakurŋana ko imbot la kwon,
mi buza mata mbaaru imbot la naman keteene, a 
bekena tipokot mbulu sananŋana kizin karkari
mi tiur kadoono pa kan koi bizin.
Ko tipo zin king kizin pa re mbolŋan,
mi tipo zin peeze kan kizin pa sen ta tiurpe pa ain na.
Naso tikam ma wal tana tire kadoono kizin. Kadoono tana, tibeede ka sua pataaŋa kek.
Mbulu tana iso ipet, tona zin wal ta tiurur lelen pa Yooba mi titoto mbulu kini na zan ko iwe biibi.
Haleluya!
Copyright information for `MNA