aMbo 69:3; Mk 15:34
bYesa 53:3
cMt 27:39; Mk 15:29
dMt 27:43
eMbo 71:6; Ga 1:15
fLu 23:33; Yo 19:18
gMt 27:35; Yo 19:24
hIbr 2:12
iMbo 2:8; Tur 5:9-13, 7:9

Psalms 22

Mboe 22

Suŋŋana ki tomtom ta iyamaana kembei Anutu ipizil ndemeene pini

Mboe ki Dabit

Anutu tio, Anutu tio, parei ta pizil ndemem pio?
Nio aŋbel tiŋiizi pu. Parei ta nu uulu yo som mi mbotmbot molo pio? a 
Anutu tio, aigule ta boozomen nio aŋtaŋroro u. Tamen nu pekel kalŋoŋ som.
Mi mbeŋ ta kembena. Aŋkenne kat som. Pa tiŋiizi tio ta imama ku tau.

Mi Anutu, nu potomŋom.
Nu mbotmbot se murim peeze kana, mi zin Israel tiwidit urum mi tipakurkuru.
Muŋgu tumbuyam bizin tipase pu tau.
Tiurla ku mi nu kamke zin.

Mi indeeŋe ta titaŋroro u na, nu tatke zin pa pataŋana kizin.
Tana tiur matan pu sorok na som. Pa tipase pu mi nu uulu zin.

Mi nio na, iŋgi tomtom tire yo kembei tomtom som.
Matan pasom yo mi tirepiili yo kembei motmooto toono leleene kana. b 
Wal boozomen ta tire yo na, uten mbiŋbiŋ pio,
mi tirepilpiili yo, mi tikamam seŋge pio. c 
Tizzo ta kembei: “Nu so nu pase pa Yooba tau. Ambai. Mbot mi re ten. Ko itatke u pa pataŋana taiŋgi, som som?
Kozobe ni leleene pu, so ikamke u kek!” d 

Yooba, nu itum ta pazal zaala pio, mi anaŋ ikam yo ma aŋsu.
Mi indeeŋe ta nio pikin siŋsiŋŋoŋ mi imar na, nu mborro yo ma aŋbot ambai. e 
10 Pa indeeŋe ta anaŋ ikam yo ma aŋsu na, nu kam yo ma aŋwe lem.
Tana ta muŋgu mi imar na, nu Anutu tio.

11 Tana mbot molo pio pepe.
Pa iŋgi aŋbot la pataŋana leleene.
Mi leŋ tomtom sa be iuulu yo som.

12 Iŋgi koŋ koi bizin timar ma tiliukaala yo,
kembei makau saŋsaŋŋan ki toono pakaana ki Basan ta mburanŋan na.
13 Mi kwon ikakaaga mi zoŋon izirzir mar pio.
Kalŋan izalla pio kembei laion ta petel zin mi tirru kan buzur.
14 Tana kuliŋ imetmeete,
mi tiroŋ imukurkur lup.
Mi aŋmoto ma ŋgelbuk ileege yo.
15 Mburoŋ ta imap kat.
Mi ŋgureŋ na, ikerekere lup. Kauziŋ imamaaza, mi mioŋ isekap sala koŋ galablaaba.
Pa nu zem yo ma iŋgi be aŋsula leŋ naala i.

16 Iŋgi wal sananŋan timar ma tiliu yo kek.
Zin kembei me saŋsaŋŋan ta dudut ma timar, mi tiŋaŋa mare pa kumbuŋ mi nomoŋ. f 
17 Wal tina tire yo na, lelen ambai.
Pa nio tiroŋ men ma ruŋguŋ isaana kat.
18 Mi tiparrai mburu tio
ma len len. g 

19 Yooba, nio aŋkamam mburoŋ se ku tau.
Tana mbot molo pio pepe.
Loŋa mar mi uulu yo!
20 Pa nio aŋbot la zaaba kwoono kek.
Tana kamke yo lak. Kokena me saŋsaŋŋan taiŋgi tipasaana yo pa mburan.
21 Re. Laion taiŋgi tikamam be tikan yo.
Mi makau saŋsaŋŋan taiŋgi tikamam be tikuruumu yo pa kan kandaara. Loŋa mi tatke yo pizin!
A buri. Nu leŋ yo kek!

22 Nio ko aŋsoyaara urum pizin toŋmatiziŋ tio.
Sombe wal ku tila tilup zin pa suŋŋana, nako aŋgaaba zin mi aŋwit urum. h 
23 Niom wal ta so komototo Yooba mi keleŋleŋ la kalŋaana na, kapakuri.
Niom ta Yakop popoŋana kini na, kiwit uruunu.
Niom Israel ta boozomen, komoto i.
24 Pa wal ta so timbotmbot raama pataŋana, na ni irepiili zin som, mi ipizil ndemeene pizin som.
Indeeŋe nio aŋtaŋroro i na, ni ipiŋgis mataana pio som. Ileŋ tiŋiizi tio mi iuulu yo.

25 Yooba, sombe zin iwal biibi tilup zin pa suŋŋana, na nio ko aŋwe kwom mi aŋpakuru pa mbulu ta kam pio na.
Nio ko aŋto sua tio mbukŋana, mi aŋkam patoronŋana pu ila zin wal ta timototo u na matan.
26 Zin wal tau timbot ŋoobo, nako tikan kat kan kini ma kopon isaana.
Mi zin wal tau tikam kinkiini be tiute Yooba mi timbot kolouŋana pini, nako tiwit uruunu.
Pa ni ko ikampe zin ma timbot ambai, mi iseeŋge iseeŋge ma ila.

27 Toono ta boozomen ka tomtom bizin ko timap ma matan iŋgal Yooba.
Karkari ta boozomen ko titooro zin mi timar kini.
Zin tau kulin pareiŋan, mi timar pa so kar i, nako timap mi tilek kumbun pini. i 
28 Pa Yooba, ni ta biibi ŋonoono.
Ikamam peeze pa tomtom ta munŋaana men ki toono ti.

29 Tana zin wal ta tiwe mbio uunu su toono, nako timap mi tilek kumbun pini.
Mi wal tau timbot naala kezeene i, na zin tomini ko tilek kumbun pini.
30 Mi zin wal ta so timeete, na popoŋana kizin ko timbeeze pa Merere,
mi tisoyaara uruunu pizin wal tabe tipet pa kaimer i.
31 Wal tana tiso tipet, nako tiso zin pa mbulu kini ndeeŋeŋana.
Ko tiso zin pa uraata ta Merere ikamam na.”
Copyright information for `MNA