aMbo 37:9,11; Mt 5:5

Psalms 25

Mboe 25

Tomtom ta isuŋ Merere be ipazali mi ireege sanaana kini

Mboe ki Dabit

O Yooba, iŋgi suŋŋana tio ima ku raama leleŋ.
Anutu tio, nio aŋpase pu be uulu yo.
Kokena koŋ koi bizin tilip pio,
to menmeen zin mi nio koŋ miaŋ.
Zin wal ta so tipase pu mi tiur matan pu,
nako kan miaŋ som. Pa nu ko uulu zin.
Mi zin wal ta tirekreege sua kizin mbukŋana na, zin ta ko kan miaŋ.

Yooba, so yo pa zaala ku.
Pei ŋgar tio pa bekena aŋto kat.
Kam peeze pio bekena aŋpa pai tio ma indeeŋe men pa sua ku ŋonoono. Mi paute yo pa ŋgar ku.
Pa nu ta Anutu tio mi ulaaŋa tio.
Tanata aŋurur motoŋ pu totomen.

Yooba, ta muŋgu mi imar na, nu muŋaiŋana katuunu.
Mi nu toto sua ku mbukŋana mi urur lelem pa wal ku.
Motom iŋgalŋgal mbulu ku tana.
Sanaana ta nio naŋgaŋŋoŋ mi aŋkamam na, motom mbiriizikaala.
Mi zooroŋana tio ta boozomen na, motom la pa mini pepe.
Yooba, nu toto sua ku mbukŋana mi urur lelem pa wal ku. Tana motom ŋgal yo lak!
Pa kampeŋana katuunu ta nu na.

Yooba, ni ambaiŋana mi ndeeŋeŋana.
Tana zin wal ta mbulu kizin irao pa mataana som na, ni ipazalzal zin.
Mi zin wal ta tipase pa zitun som mi matan se kini na,
ni ipatoŋtooŋo zin be tito mbulu ndeeŋeŋana,
mi izzo zin pa zaala kini.
10 Tana zin wal tau matan iŋgalŋgal sua ta ziŋan Yooba timbuk, mi titoto ka tutu na,
ni iurur leleene pizin, mi imuŋaiŋai zin.
Mi sua kini boozomen ta imbuk la kizin na, ni itoto.

11 O Yooba, nio aŋpaŋoobo kat pa zaala ku.
Tamen nu zom biibi pa muŋaiŋana ku.
Tana reege sanaana tio.
12 Wal ta so timototo Yooba mi tileŋleŋ la kalŋaana,
na ni ko iso zin pa zaala tabe tito.
13 Mi ko mataana pizin ma timbot ambai.
Mi lutun bizin tomini ko timbot ambai su toono ta Yooba ikam pa wal kini na. a 
14 Wal ta so timototo Yooba mi tileŋleŋ la kalŋaana, na tiwe le gaabaŋana, mi ni izzwe leleene mi ŋgar kini pizin.
Mi ni ko ipaute zin pa zaala tabe ni ziŋan tiparlup zin ma tiwe tamen pa i.
15 Nio aŋurur motoŋ pa Yooba be iuulu yo.
Pa ni ta itatkewe kumbuŋ pa kilis ki koŋ koi bizin.

16 Yooba, nio mbesooŋo ku tau. Tana lae tio mi muŋai yo.
Pa iŋgi ituŋ tamen kat. Leŋ ulaaŋa sa tabe iuulu yo pa pataŋana tio taiŋgi na som.
17 Nio leleŋ ipata kat.
Tana tatke yo pa pataŋana tio taiŋgi.
18 Re pataŋana biibi ta ikam yo i, mi uulu yo. Pa iŋgi aŋbot ambai som kat.
Mi mbulu tio boozomen ta irao pa nu motom som na, reege ma ila ne.

19 Re, koŋ koi bizin na, boozo kat!
Mi keten malmal kat pio mi tisombe titeege zaaba pio.
20 Tamen nio aŋpase pu be we ur pio mi menderkaala yo.
Tana motom pio mi we seraara pa koŋ koi bizin.
Kamke yo la naman. Kokena tilip pio, to koŋ miaŋ.
21 Yooba, leleŋ be aŋkam mbulu ndeeŋeŋana men raama leleŋ.
Tana aŋur motoŋ pu mi aŋpase pu be poroukaala yo.

22 O Anutu, tatke wal ku Israel pa pataŋana kizin ta boozomen.
Copyright information for `MNA