aMbo 16:10, 56:13; Yona 2:6
bMbo 103:8+; Yo 16:20+; 2Kor 4:17

Psalms 30

Mboe 30

Suŋŋana ki tomtom ta mete ikami, mi Anutu iurpe i ma niini ndabok

Mboe ki Dabit Indeeŋe ta tiurpe urum mi kataama ikaaga mini na, timbo mboe ti

O Yooba, nio aŋpakur zom. Pa nu weene yo ma aŋse mini, mi tatke yo pa pataŋana tio.
Tana koŋ koi bizin irao nin se ma tiso tilip pio na som.
Yooba Anutu tio, nio aŋboobu be uulu yo.
Mi iŋgi nu urpe yo ma niŋ ambai kek.
Rimen mi aŋsula Andewa. Mi som. Pa nu wit yo ma aŋmaŋga mini.
Tana aŋsula kizin meeteŋan som, mi iŋgi aŋbot ambai. a 

Niom wal ki Yooba ta kototo zaala kini na, kombo mboe pini mi kiwit uruunu!
Motoyom ŋgal uraata ta ni ikamam piom na, mi leleyom ambai pini mi kapakur zaana. Pa ni potomŋana! Mbulu kini ipa ndel kat.
Kete malmalŋana kini imbot rimen mi imap.
Mi kampeŋana kini na, iseeŋge iseeŋge ma ila irao swondo imap.
Tana tiŋiizi isombe ikam ti pa mbeŋ,
na kozeere to, ni ikam ti ma lelende ambai mini. b 

Yooba, indeeŋe ta mbotŋana tio ambai men na, aŋso ta kembei:
“Pataŋana sa ko irao itok yo na som.”
Pa nu kampewe yo mi pombolmbol yo,
tanata aŋpakur ituŋ mi aŋso ko aŋbol mi aŋbotmbot ta kembei ma alok, kembei ta zin abal bibip.
Mi indeeŋe ta nu piŋgis motom pio na, motoŋana biibi ikam yo mi aŋru zaala.

Tana aŋboobu mi aŋtaŋroro u be muŋai yo. Aŋso ta kembei:
“O Yooba, sombe aŋsaana kat mi aŋmeete ma aŋsula leŋ naala,
na meeteŋana tio ko iuulu u be parei?
Re. Zin meeteŋan ta tisula toono ma timbuuzu na, tipakuru,
som tisoyaara mbulu ku ta toto sua ku mbukŋana na? Som.
10 Tana Yooba, uulu yo lak!
Leŋ suŋŋana tio ti mi muŋai yo! Pa nio mbesooŋo ku tau.”

11 Mi iŋgi mus motoŋ luluunu ma tiŋiizi tio imap kek. Tana aŋse kombom ma aŋrakrak.
Mi iŋgi kinke muuŋgu tio ma isu lene, mi zeebe yo mini pa mburu ambaiŋana. Mi kam ma leleŋ ambai kat.
12 Tana irao aŋmaane na som.
Leleŋ ko imap ipakuru, mi aŋbo mboe pu.
Yooba, nu Anutu tio. Nio ko leleŋ ambai pu, mi aŋpakurkur zom ta buri, mi iseeŋge iseeŋge ma ila.
Copyright information for `MNA