aMbo 103:3; Lu 7:36+; Ro 4:6+; Ep 2:4+
bYo 1:47; 2Kor 5:19; Tur 14:5
cMbo 51:1+, 103:9+; 1Yo 1:9
dRo 2:9+

Psalms 32

Mboe 32

Sombe Anutu ireege sanaana kiti, ina ikampe iti kat

Mboe ki Dabit

Tomtom ta so izooro Anutu mi ipa ŋoobo pa zaala kini na,
sombe Anutu imuŋai i mi ireege sanaana kini,
na ni ko leleene ambai kat pa kampeŋana biibi ta Anutu ikam pini na. a 
Pa tomtom ta so pakaamŋana sa imbot la leleene som,
mi Yooba mataana ila pa sosor kini mini som,
na ni ko leleene ambai kat pa kampeŋana biibi tana. b 

Yooba, indeeŋe ta aŋwatkaala sanaana tio na,
aŋkaraŋesŋeeze ikot mbeŋ ma aigule,
mi tiroŋ imukurkur lup.
Pa nu seseeze motoŋ pa mbeŋ ma aigule.
Tabe ikam ma mburoŋ imap kat, mi malaiŋana ikam yo.

Aŋbot ma som to aŋswe sanaana tio ima ku.
Mbulu tio ta aŋzorzooru mi aŋpaŋobŋoobo pa zaala ku na, aŋwatkaala mini som.
Mazwaana tana aŋso ta kembei: “Nio ko aŋswe zooroŋana tio pa Yooba.”
Mi nu reege sanaana tio ta boozomen ma ilane, tana iŋgi leŋ uunu sa isaana mini som. c 

Tana zin wal ku ta titoto zaala ku na,
sombe pataŋana biibi kat ilol zin kembei ta nonor i,
na bela tisuŋu. Pa nu ko uulu zin.
Tana pataŋana tana ko irao be ipasaana zin na som.
Anutu, nio aŋpase pu be we ur pio.
Nu ko poroukaala yo pa pataŋana ta boozomen.
Tana nio ko aŋbo mboe ma kalŋoŋ isala ta kor a.
Pa nu tatkewe yo pa pataŋana tio.

Mi Yooba, ni iso ta kembei: “Nio ko aŋpaute u, mi aŋpazalu pa zaala tabe to i.
Mi ko motoŋ pu mi aŋso u pa ŋgar tio.”

Tana niom katalli kembei ta hos ma doŋki pepe.
Pa zin na, len ŋgar somŋan.
Tana tomtom tiurur ain tuunu raama wooro ila kwon,
bekena tiyaraama zin mi tipazalzal zin pa pai.

10 Zin wal sananŋan ko tindeeŋe pataŋana boozo.
Mi zin wal tau tipase pa Yooba na, kampeŋana kini ko imbotmbot se kizin. d 

11 Niom tomtom ndeeŋeŋoyom, leleyom ambai mi menmeen yom pa mbulu ta Yooba ikamam piom na.
Niom wal boozomen ta leleyom ŋgeezeŋoyom na, leleyom ambai pini. Kalŋoyom isala ma biibi mi kapakuri!
Copyright information for `MNA