aMbo 40:3; Tur 5:9
bMbo 19:8, 119:142; Tur 19:11
cMbo 11:7
dUn 1:14+; Ibr 11:3
eMbo 144:15
fMbo 11:4, 53:2
gMbo 119:73; Ibr 4:13
hMbo 20:7
iKam 3:16; 1Pe 3:12
jMbo 56:13; Ŋgo 12:11

Psalms 33

Mboe 33

Tombo mboe popoŋana pa Merere. Pa ni koroŋ imap katuunu

O niom wal ndeeŋeŋoyom, leleyom ambai pa Yooba, mi kalŋoyom isala ma kapakuri.
Niom wal ta mbulu tiom iŋgeeze men na, kiwit uruunu. Pa kakam ta kembei to indeeŋe.
Kapakur Yooba pa kombom!
Kupun koroŋ matakiŋa mi kombo mboe be kapakuri!
Kombo mboe popoŋana pini.
Mi kese kat kombom. Naso kepeŋgeeze mboe.
Mi kalŋoyom isala ma kapakuri raama menmeen yom! a 

Pa sua ki Yooba, ina ŋonoono mi indeeŋe men.
Mi uraata kini ta boozomen izzwe kembei ni itoto sua kini. b 
Ni leleene ilip pa mbulu ta ndeeŋeŋana mi ambaiŋana.
Mi mbulu kini ta itoto sua kini mi iurur leleene pa wal kini, ina ni izzwe ma irao toono ta boozomen. c 

Muŋgu, Yooba iur sua men mi saamba ipet.
Kwoono iso sua men, mi koroŋ ta boozomen ki saamba tipet. d 
Tai ta biibi i, ni ilup ma imbot la mbata, kembei ta tomtom tikut tai ila tai putuunu na.
Mi tai ta imbot la mozo lukutuunu na, ni ikes la tai putuunu kini, mi iur lae ma imbotmbot.

Niom tomtom ta karao pa toono na, komoto Yooba mi keleŋ la kalŋaana.
Niom iwal karkari kapakuri mi kopou i!
Pa ni iso sua men, mi saamba ma toono tipet.
Iur sua mi koroŋ ta boozomen tipet ma timbot la murinmurin.

10 Zin karkari lelen iurur pa mbulu boozo tabe tikam.
Tamen Yooba ikamam ma ŋgar kizin tana iurur ŋonoono som.
Tana ŋgar kizin ko iwe koroŋ sorok.
11 Mi Yooba, ni mbolŋana. Tana tomtom sa irao izooro ŋgar kini na som.
Sombe leleene iur pa ŋgar sa, na ŋgar tana ko imbol mi imbotmbot ma alok.
Mi ŋgar ta so leleene iur pa, inako ipiyooto ŋonoono tabe imbotmbot ma alok.
12 Zin wal ta timbesmbeeze pa Yooba na, ni itunu ta ipeikat zin, mi ikam zin ma tiwe lene.
Tana lelen ambai pa kampeŋana kini ta ise kizin na. e 

13 Yooba, ni imbotmbot saamba, mi mataana isu
ma irre zin tomtom ta timbotmbot toono na. f 
14 Ni imbotmbot sala muriini peeze kana,
mi mataana ikamam zin karkari ta boozomen.
15 Ni itunu ta iur tomtom ta boozomen lelen.
Mi mbulu boozomen ta tikamam na, ni iute lup. g 

16 King sa sombe imbol se wal kini malmal kan men, nako irao som.
Mi tomtom malmal kana ta mburaanaŋana i ta kembena. Sombe ipase pa itunu men, nako irao som.
17 Mi hos malmal kan tomini, sombe tomtom tiur matan pizin be tiuulu zin ma tilip pa malmal, nako tiur matan sorok.
Pa hos mburan irao be ikamke zin na som. h 
18 Tamen zin wal ta timototo Yooba mi tileŋleŋ la kalŋaana,
mi tipase pa muŋaiŋana kini ta imapmap som na,
ni mataana pizin. i 
19 Mi ni itatkewe zin pa pataŋana kizin. Kokena timetmeete.
Mi sombe peteele biibi isu, nako ipun zin som.
Pa ni ko iuulu zin ma timbot matan yaryaara. j 

20 Tana iti tapase pa Yooba mi tuur matanda pini.
Pa ni ulaaŋa kiti mi iwe siŋgiao piti.
21 Iti lelende ambai kat mi menmeen ti pini.
Mi tapase pa zaana potomŋana.
22 Yooba, niam amur motoyam pu be uulu yam.
Muŋaiŋana ku ko imbotmbot se tiam totomen.
Copyright information for `MNA