aMbo 73:2+
cYo 10:9
dMbo 145:19; Mt 6:33
e1Pe 5:7
fEp 4:31; Kol 3:8
gMbo 73:18+; Mt 5:5
h1Pe 1:4
iMbo 112:5; Mt 5:42; 2Kor 8:7
jIbr 13:5
kMbo 34:14; 3Yo 11
lMbo 18:25

Psalms 37

Mboe 37

Anutu iurur kadoono pizin wal sananŋan mi ikampewe zin wal ndeeŋeŋan

Mboe ki Dabit

Zin wal sananŋan ta timbotmbot ambai men na, kam ŋgar boozo pizin pepe.
Mi zin wal ta tikamam ŋoobo mbulu na, motom mburmbur pizin pepe. a 
Ko timbot rimen, to timetmeete kembei ta mbutmbuutu imelle.
Ko tila len kembei manman pwon ta timetmeete ma titoptop na. b 

Mi nu na, pase pa Yooba mi kam mbulu ambaiŋana men.
Naso mbotmbot ambai su toono ta ni ikam pizin wal kini na, mi kosa sa ko ipasaanu som. c 
Mbeeze pini raama lelem ambai.
Naso ni ikam lem koroŋ ta lelem pa i. d 
Ur itum ila Yooba namaana mi pase pini.
To ni ko iuulu u mi iso u pa zaala tabe to i. e 
Mi ko iswe mbulu ku ndeeŋeŋana ma ipet kat mat, kembei ta zoŋ iyaara.
Tana tomtom ko tikilaalu kembei mbulu ku ambai men, mi lem uunu sa isaana som.

Sombe uraata kizin wal sananŋan iloondo ambai men, mi tiyo len koroŋ boozo pa zaala sananŋana,
na kam ŋgar boozo pizin pepe.
Ur nim men mi sa Yooba be iur kadoono pizin.

Tana ketem malmal pepe, kam ŋgar boozo pizin pepe.
Yaraama itum. Kokena ketem ibeleu, to kam mbulu sananŋana sa. f 

Pa wal sananŋan, Yooba ko ipambiriizi zin ma tila len.
Tamen zin wal ta so tipase pa Yooba mi tiur matan pini, nako zan be tikam matamur kini mi timbotmbot ambai su toono ta ni ikam pa wal kini na.

10 Molo som to wal sananŋan ko timbiriizi ma tila len lup.
Sombe re la pa murin ta muŋgu timbotmbot pa na, ko bilim.
11 Mi zin wal ta tikototo zitun mi tipase pa Yooba, nako tikam matamur kini mi timbot pa toono ta ni ikam pa wal kini na.
Mi ko lelen ambai kat pa mbotŋana ndabokŋana tabe ni ikam pizin i. g 

12 Wal sananŋan timburmbuuru pa zin wal ndeeŋeŋan,
mi keten malmal kat mi tikarrut zurun pizin.
13 Tamen Yooba, ni iseeŋge pizin wal sananŋan.
Paso, ni iute: Molo som to, nol kizin ipet, mi ipamender zin mi iur kadoono pizin.

14 Wal sananŋan tipas buza kizin be tikuruumu zin wal sorrokŋan mi zin wal ta len ulaaŋa sa som na.
Mi tiser peene lutuunu kizin be tipeene zin.
Pa tisombe tikas zin wal ta titoto zaala ambaiŋana na ma timetmeete ma tila len.
15 Tamen buza kizin ko timiili pa zitun.
Mi peene naana kizin ko tipolpol.

16 Sombe tomtom ndeeŋeŋana le koroŋ boozo som, na toŋgo.
Mbotŋana kini ko ambai ma ilip pa tomtom sananŋana ta le koroŋ boozo na.
17 Pa Yooba, ni ko ipunmeete wal sananŋan mburan.
Mi wal ndeeŋeŋan na, ni ko ipombol zin, mi ikiskis zin.

18 Wal ambaimbaiŋan ta len uunu sa isaana som na, Yooba mataana pizin.
Mi matamur ta ni ikam pizin, ko imbotmbot ma alok. h 
19 Sombe mazwaana ki pataŋana ipet, na zin ko timbot ambai.
Mi sombe peteele isu, na zin ko tirao kat pa kan kini.

20 Tamen wal sananŋan ko timbiriizi ma tila len.
Yooba ka koi bizin ko timetmeete kembei manman pwon ta timetmeete ma titoptop.
Ko timap kembei you ka koi ta ikam buk ma ise mi imbiriizi.

21 Wal sananŋan tikamam mbun mi tikodot som.
Mi wal ndeeŋeŋan na, timuŋaiŋai zin tomtom mi tikamam koroŋ pizin sorok. i 
22 Zin wal ta kampeŋana ki Yooba imbotmbot se kizin na, zan be tikam matamur kini, mi timbotmbot ambai su toono ta ni ikam pa wal kini na.
Mi zin wal ta Yooba kete malmalŋana kini imbotmbot se kizin na, ni ko ipambiriizi zin ma tila len.

23 Yooba izzo iti tomtom pa zaala kini, mi ipombolmbol ti be toto.
Mi tomtom ta so itoto zaala kini, na Yooba ko leleene ambai pini.
24 Tomtom ta kembei, sombe itutkat kumbuunu, nako irao imel na som.
Pa Yooba itunu ta ikiskisi.

25 Indeeŋe ta nio naŋgaŋŋoŋ mi imar ma iŋgi aŋwe kolman i, na aŋre Yooba ipizil ndemeene pizin wal ndeeŋeŋan pasa zen.
Mi aŋre wal ndeeŋeŋan lutun bizin tinono ruumu ma tizuŋzuŋ kan kini pasa zen. j 
26 Aigule ta boozomen wal ndeeŋeŋan tikampewe zin tomtom mi tikamam koroŋ pizin sorok. Mi tomtom pakan na tikamam mbun la kizin tomini.
Mi lutun bizin tomini tikampewe zin tomtom.

27 Pizil ndemem pa mbulu sananŋana, mi kam mbulu ambaiŋana men.
Naso mbotmbot ambai su toono ta Yooba ikam pa wal kini na, mi iseeŋge iseeŋge ma ila. k 
28 Pa Yooba, ni leleene pa mbulu ndeeŋeŋana ilip.
Tana zin wal ta titoto zaala kini na, ni irao ipizil ndemeene pizin na som.
Ko iporoukalkaala zin totomen. l 
Tamen wal sananŋan lutun bizin na, ni ko ipambiriizi zin ma zan imap kat pa toono.
29 Mi wal ndeeŋeŋan na, zin ko timbotmbot ambai su toono ta Yooba ikam pa wal kini na,
mi iseeŋge iseeŋge ma ila.

30 Sua ta iwedet pa tomtom ndeeŋeŋana kwoono na, izzwe i kembei ni tomtom ŋgarŋana.
Pa ni izzo pa mbulu ndeeŋeŋana men.
31 Mi tutu ki Anutu imbotmbot la leleene mi ikamam peeze pini. Tana ni ko irao itop na som.

32 Wal ndeeŋeŋan na, zin wal sananŋan tizaŋzaaŋa zin
be tipun zin ma timetmeete.
33 Tamen Yooba itunu ko iporoukaala zin. Irao izem wal kini ila kan koi bizin naman na som.
Mi sombe tomtom tipamender zin pa sua na, Yooba ko ilae kizin mi iswe zin kembei len uunu sa isaana som.

34 Tana ur nim, zza Yooba, mi to zaala kini.
Ni ko ipakuru mi iuru be mbotmbot su toono ta ni ikam pa wal kini na.
Mi nu ko re i ipasaana zin wal sananŋan ma tila len.

35 Muŋgu nio aŋute tomtom sananŋana ta, ni mburaana biibi kat.
Ni kembei ta ke mala.
Mi ipamototo tomtom ta boozomen, mi ikototo zin ma tisaana kat.
Tamen kaimer aŋpa pa lele tana mini na, aŋre tomtom tana imbot mini som.
Aŋru i na aŋdeeŋi som. Ko ila ki parei?

37 Re la pa wal ndeeŋeŋan ta len uunu sa isaana som na, mi kam ŋgar pa mbulu ta iwedet pizin.
Pa tomtom ta so iluplup zin tomtom ma lelen iwe tamen, na ziŋan popoŋana kini ko timbotmbot ambai, mi iseeŋge iseeŋge ma ila.
38 Tamen wal zorzooroŋan na, Yooba ko ipambiriizi zin ma timap kat.
Mi popoŋana kizin tomini, ni ko ikas zin lup.

39 Yooba, ni ulaaŋa kizin wal ndeeŋeŋan.
Sombe pataŋana sa ipet pizin, na ni ko iwe siiri mbolŋana pizin mi iporoukaala zin.
40 Pa zin tipase pini ma iwe ur pizin mi imenderkaala zin.
Tana ni iuluulu zin, mi itatkewe zin pa pataŋana kizin.
Ikamkewe zin, mi itatkewe zin pa wal sananŋan naman ma timbotmbot ambai.
Copyright information for `MNA