a1Yo 3:12

Psalms 38

Mboe 38

Suŋŋana ki tomtom ta mete biibi ikami

Mboe ki Dabit

O Yooba, yaamba yo raama ketem malmal pepe.
Mi sombe pazal yo, na kam raama ketem bayouŋana pepe.

Pa iŋgi peene ku lutuunu iŋgal yo,
mi nomom ipun kat yo ma aŋsu.
Nu ketem malmal pio biibi, tana kuliŋ ta boozomen ire yoyouŋana.
Sanaana tio, ta ikam ma mete ipasaana kat yo.
Pataŋana ta aŋbaada pa sanaana tio, ina ilol yo.
Aŋrao be aŋbaada mini na som.

Nio aŋkam mbulu kankaanaŋana mi aŋzooru,
tanata mbetmbeete surunsurunŋan ta kuzin sananŋan i ikam yo ma aŋsaana kat.
Yoyouŋana ikam yo ma tau, aŋkaraŋeeze pa mi aŋtuntuundu men. Motoŋ se kor som.
Aigule ta boozomen, aŋtaŋtaŋ pa berek ma ila mbeŋ.
Kuliŋ ta boozomen ibayou kat kembei ta you i.
Sa imbot ambai som.
Mete ti ipun yo ma mburoŋ imap kat.
Tana leleŋ ipata kat mi aŋyakyak men.

Yooba, koroŋ ta nio leleŋ pa ilip na, nu ute kek.
Pa tiŋiizi tio ike pu som.
10 Iŋgi keteŋ ikamam uraata biibi kat ma mburoŋ imap.
Tabe ikam ma motoŋ zugutgut.

11 Zin gaabaŋoŋ mi toŋmatiziŋ tio tire mete tio ti na, timbotmbot molo pio.
Mi wal ta ruumu kizin igarau yo na, zin tomini tiloulou yo som.
12 Mi koŋ koi bizin na, timbuuru koŋ mi tiurur kilis kizin be tikam yo.
Mazwaana ta boozomen timburmbuuru pio,
mi tikamam sua pakaamŋana pio.

13 Tamen nio aŋkam ŋgar pa sua kizin som, mi aŋpekel som.
Nio iŋgi kembei tomtom ta talŋaana imun ma irao ileŋ sua som.
Nio kembei tomtom kwo munŋana ta irao iso sua som.
14 Ŋonoono kat, nio kembei tomtom talŋaana munŋana ta ileŋ sua som,
mi irao ipekel sua sa som.

15 Yooba, nio aŋur motoŋ pu mi aŋpase pu.
Yooba Anutu tio, nu ko leŋ suŋŋana tio mi uulu yo.
16 Pa nio aŋsuŋu be uulu yo.
Kokena aŋtop, to koŋ koi bizin tire,
mi nin ise ma menmeen zin,
mi tiso tilip pio.

17 Re. Yoyouŋana izem yo risa som.
Mete ti ipun kat yo. Kaimer ko irao aŋmaŋga mini na som.
18 Mi iŋgi aŋswe sosor tio. Nio aŋute: Aŋkam ŋoobo kek.
Mi leleŋ ipata kat pa sanaana tio.

19 Wal ta keten malmal pio mi tiurur koi pio na, sorok som.
Mi nin ambaiŋan mi mburan biibi kat.
20 Muŋgu nio aŋkam mbulu ambaiŋana pizin. Mi iŋgi tipokot pa mbulu sananŋana.
Tiurur koi pio paso, nio aŋkam kinkiini be aŋto mbulu ambaiŋana men. a 

21 O Yooba, pizil ndemem pio pepe.
Anutu tio, mbot molo pio pepe.
22 Yooba, nu ulaaŋa tio.
Loŋa mar mi uulu yo!
Copyright information for `MNA