aMbo 34:13; Yems 1:26, 3:2
bMbo 78:39, 90:12
cMbo 90:4, 144:4
dLu 12:20; Yems 4:14
eIbr 12:5+
fUn 23:4, 47:9; Ibr 11:13; 1Pe 2:11

Psalms 39

Mboe 39

Mboti kiti isu toono na, molo som

Mboe ki Dabit Timbo pa Yedutun. Ni iwe mataana pizin mboe kan

Nio aŋso ta kembei: “Nio ko motoŋ iŋgal ituŋ:
Kokena sua sananŋana sa ipet pa kwoŋ.
Mi sombe wal sananŋan timbot kolouŋana pio,
nako aŋboro kat kwoŋ mi aŋmaane men.” a 
Tana kwoŋ imun mi aŋso sua sa pizin som.
Aŋyaraama ituŋ mi aŋmaane men.
Tamen leleŋ ipata mi ila ila ma iwe biibi kat.
Leleŋ ibayou ma tau aŋsaana kat.
Pa aŋkam ŋgar boozo pa zin wal sananŋan ta mboti kizin ambai men.
Tana aŋyamaana kembei ta you ikanan la leleŋ ma aŋrao aŋgabiizi ituŋ mini som.
To aŋwi Anutu mi aŋso ta kembei:

“Yooba, paute yo kat.
Ndaama tio piizi ta imbotmbot men i?
Ko aŋmeete mi aŋmap pa toono ŋiizi?
Uulu yo be aŋkilaala kat ta kembei: Mbotŋana tio ta ki toono ti na molo som. b 
Nu kam leŋ mazwaana rimen ŋonoono be aŋbotmbot su toono.
Tana mboti tio na, kembei ta koroŋ sorok pa nu motom.
Ŋonoono kat, tomtom ta boozomen mbotŋana kizin na, koroŋ sorok.
Timbot rimen mi timap, kembei miiri ta iwedet pa kwon na. c 
Zin kembei koroŋ kunuunu. Sombe zoŋ imap na imap.
Tata ikam zin ma tizzu mi tizze pa uraata bekena tindoundou len koroŋ boozo.
Mi ina tipun sorok mburan.
Pa tiute som. Asiŋ ko ikam koroŋ kizin tana?” d 

Yooba, sokorei toro tabe aŋur motoŋ pa?
Som. Nio aŋur motoŋ pu tau.
Uulu yo mi tatke yo pa sanaana tio ta boozomen.
Kokena wal kankaanaŋan tikam sua repiiliŋana pio.
Nio iŋgi aŋmaane men. Irao aŋso sua sa som.
Pa nu itum ta ur pataŋana tiŋgi pio.
10 Mi nu seeze motoŋ irao kek. Kam mini pepe.
Pa mbel balisŋoŋ ma iŋgi be aŋmeete i.
11 Sombe tomtom tikam sanaana, na nu yamyaamba zin mi ballis zin bekena pazal zin.
Mi koroŋ kizin ambaimbaiŋan ta lelen pa ilip na, nu pasansaana kembei ta kiibi ipasansaana kawaala na.
Ina kembei ta aŋso na. Niam tomtom, koroŋ sorok. Ambot rimen mi amap, kembei miiri ta iwedet pa kwoyam na. e 

12 O Yooba, pumun talŋom pa tiŋiizi tio pepe.
Ŋgun talŋom pio, leŋ suŋŋana tio ti, mi uulu yo.
Pa iŋgi aŋwe leembe ku isu toono ti, kembei ta tumbuŋ bizin ta boozomen tiwe leembe na. f 
13 Tana ŋgal motoŋ irao. Muŋai yo.
Naso menmeen yo pa mazwaana ri ti,
mana aŋmeete mi aŋmap pa toono.
Copyright information for `MNA