aMbo 112:5,9; Mt 5:7; Yems 2:13+
bMbo 55:12+; Lu 22:21; Yo 13:18

Psalms 41

Mboe 41

Tomtom ta mete ikami na, isuŋ Anutu be iuuli

Mboe ki Dabit

Tomtom ta so mataana iŋgalŋgal zin sorrokŋan na, kampeŋana ki Anutu ko imbotmbot se kini.
Mi sombe pataŋana sa indeeŋi na, Yooba ko iuuli. a 
Yooba ko mataana pini mi iporoukaali.
Tana ni ko imbotmbot ambai su toono ta Yooba ikam pa wal kini na, mi kampeŋana ki Yooba imbotmbot se kini.
Yooba ko irao izemi la ka koi bizin naman na som.
Mi sombe mete ikami, na Yooba ko imborro i mi ipomboli,
mi iwiti ma imaŋga mini pa mbalia kini.

Nio aŋso ta kembei: “Yooba, nio aŋkam sanaana pu.
Mi muŋai yo mi urpe yo ma niŋ ambai mini. Pa nio mbesooŋo ku tau.”

Iŋgi koŋ koi bizin tikamam sua sananŋana pio. Tizzo ta kembei:
“To tana, ŋiizi na imeete ma ila ne? Naso matanda mbeleele kati.”
Mi sombe tomtom timar ma tilou yo na,
timar raama lelen som. Tipakaam.
Pa timar be tireut mete tio men tau.
Mi kaimer, sombe tiyooto ma tila, to tipasaana uruŋ.
Koŋ koi bizin ta boozomen tikamam ŋgar sananŋana pio,
mi tiparmburumrum zin ma tizzo ta kembei:
“Aa, to tiŋga, mete sananŋana kat ikami.
Ko irao imaŋga mini na som. Iŋga be imeete a.”
Mi toroŋ ŋonoono ta aŋdemeere kati mi aŋpase pini,
mi niamru ambot mbata mi aŋkamam ka kini na,
ni tomini itoori mi isu iwe koŋ koi. b 

10 Yooba, lelem isaana pio,
mi wit yo ma burup ma aŋmaŋga mini.
Naso aŋrao be aŋpokot koŋ koi bizin mbulu kizin.

11 Tana koto koŋ koi bizin. Naso aŋute: Nu lelem pio.
Kokena zin nin se, mi kalŋan isala ma tiso tilip pio.
12 Pa nio leŋ uunu sa isaana som. Tanata nu pombolmbol yo,
mi kam yo ma aŋbotmbot kolouŋana pu totomen.

13 Tapakur Yooba! Ni Anutu kizin Israel.
Tapakur zaana ta buri, mi iseeŋge iseeŋge ma ila.
Ŋonoono kat!
Copyright information for `MNA