aLu 4:22
bMbo 149:6; Tur 1:16
cMbo 65:5; Tur 6:2, 19:11+
dIbr 1:8
eMbo 11:5, 33:5
fEp 5:22+
gTur 19:7+

Psalms 45

Mboe 45

Ula ki king ka mboe

Mboe kizin Kora

Ŋgar ambaiŋana kat ta imaŋgaŋga pio,
tabe aŋtooro mboe ti pa king.
Nio iŋgi kembei tomtom ta namaana mbeezeŋana pa bude na.
Pa mioŋ imarra pa mboe tooroŋana.

O king, nu tomtom kaibiim komboono tau lip pa tomtom ta boozomen.
Mi sua ambaiŋana ta iwedet pa kwom, ina ikampewe zin tomtom.
Tana kampeŋana ki Anutu imbotmbot raamu totomen. a 

Kam buza ku mi urpe u be kam malmal. Pa nu mburom keskeezeŋom, mi nu ta king biibi.
Nu ndabokŋom kat mi zom biibi. b 
O king, nu zomŋom. Maŋga, sala hos ku, mi la pa malmal.
Koto kom koi bizin ma mburan imap kat.
Poroukaala zin wal sorrokŋan.
Mi porou pa sua ŋonoono mi mbulu ndeeŋeŋana.
Nomom woono na, alalalŋana. Tana porou mbolŋana. Naso kom koi bizin tire mi timoto. c 
Peene ku lutuunu na, matan iwilwil kat.
Tabe iŋgal kat kom koi bizin ma tisu.
Tana wal tau munŋaana men ta irao toono ma ila, ko timar ma baram baram su kerem uunu.

Anutu, nu ko mbotmbot se murim peeze kana ma alok.
Mi peeze ta kamam, ina indeŋdeeŋe men. d 
Pa nu lelem pa mbulu ndeeŋeŋana, mi urur koi pa mbulu sananŋana.
Tanata Anutu ku ipakuru ma lip pa waem bizin pakan, mi iuru ma we king.
Mi ina ikam ma lelem ambai kat. e 
Mburu ku mololo ta urur na, tisuulu koroŋ kuzinŋan kembei ta konimban ma kaikereŋ ise.
Mi ruumu ku na, tipakaibiim pa aigau matakiŋa ma ambai kat. Mi zin naroogo kan timbot lela mi tirak pu, tabe ikam ma lelem ndabok kat.
King pakan lutun moori bizin, ta timbesmbeeze pu mi tipakaibiim ruumu ku.
Mi galiki tabe wooli na, imender su zilŋom uunu mi iur aigau kini ta ambaiŋana kat. Aigau tana, tiurpe pa pat gol ta imar pa lele pakaana ki Opir na.

10 Nu moori kaibiim ta sombe woolo king na, ŋgun talŋom mi leŋ sua tio ti.
Kozo motom mbeleele wal ku mi zin toŋmatiziŋ ku.
11 Pa kaibiim ku tana ko ikam ma king leleene pu.
Mi ni tabe imboro u i. Tana kozo leŋ la king kalŋaana. f 
12 Moori zaanaŋana ta ki kar Tiro ko ikam lem mburu.
Mi zin mbio uunu ko tiyogeege lem koroŋ tomini bekena lelem ambai pizin.

13 Galiki ta, tau imbotmbot lela ruumu kini a. Ni kaibiim komboono kat.
Mburu kini tau irru pa i, ina tiurpe pa wooro milmilŋana.
14 Tana ni irupa mburu kini ta ka mos boozo na, mi tikami ma tiuri la ki king.
Mi tamuriŋ kini pakan ta tigabgaabi mi ziŋan tila. g 
15 Iwal biibi timbombo raama menmeen zin,
mi tiyaaru zin ma tilela ruumu ki king.

16 O king, nu ko peebe lem pikin tomooto be tikel tumbun bizin.
Mi nu ko ur zin be tikam peeze pa toono ta boozomen.

17 Mboe tio taiŋgi, tomtom ko timbombo, mi matan ilala pu mi iseeŋge iseeŋge ma ila.
Tana zin karkari ko timap ma tiwe kwom, mi tipakurkur zom totomen.
Copyright information for `MNA