aMbo 1:3, 36:8; Tur 22:1
bMbo 97:5; 2Pe 3:10+
cRo 8:31

Psalms 46

Mboe 46

Merere, ni iwe siiri mbolŋana piti

Mboe kizin Kora

Anutu, ni iwe siiri mbolŋana piti mi iporoukalkaala iti. Iti takamam mburanda se kini tau.
Mi sombe pataŋana sa indeeŋe iti, na ni imbotmbot kolouŋana piti.
Tana iti ko irao tomoto kanda na som.
Sombe yeŋyeeŋge itok toono,
mi abal tiwolol ma tizulla mozo lukutuunu,
mi tai isaana ma duubu zoŋo ŋirŋir ma tila titutut zin la abal uunu,
mi tikam ma abal tomini ikam katkat, na toŋgo.
Irao teseŋeeŋe na som.

Kar potomŋana ta Anutu kor kana muriini na, ka yok ta irereere ma imbotmbot.
Yok tana ikam ma kar tana ka tomtom bizin timbot ambai mi menmeen zin. a 
Anutu imbotmbot lela kar kini tana, mi iporoukalkaala zin. Tana kosa sa ko irao be ipasaana zin na som.
Sombe pataŋana sa ipet pizin, na ni irao inaama ma zoŋ mataana ise na som. Ko iuulu zin karau men.
Karkari ta boozomen kalŋan izalla mi timaŋgaŋga be tikam malmal. Mi king boozomen mburan imap, mi lele kizin ikamam be isaana.
Mi Anutu kalŋaana isala ma biibi kembei ta lolo ipeene i, to ineene toono ta boozomen, ma ireere kembei yok. b 

Yooba ni mbura keskeezeŋana. Mi ni imbotmbot raama iti.
Anutu ki Yakop ta iwit ti mi iur ti sala kor, mi iwe seraara mbolŋana pa kanda koi bizin. Tana zin ko tirao be timbuulu iti na som. c 

Kamar kere uraata bibip tau Yooba ikam na.
Motoyom la pa uraata kini mburanŋan ta ni ikam bekena ipunmeete wal toono kan mburan na. Uraata tana, tomtom tire na, motoŋana biibi ikam zin.
Ni ta ipeteke malmal ma imap pa toono ta boozomen.
Mi ibogboogo peene mi izi, mi izanzan siŋgiao malmal kana mi igibgiibi sala you ma ikan.
10 Mi ni iso ta kembei: “Malmal irao. Kuur niyom mi kakam kat ŋgar pio. Pa Anutu ta biibi ŋonoono na, nio tau.
Karkari ta boozomen ko tipakur yo.
Mi zoŋ ko iwe biibi pa toono ta munŋaana men.”

11 Yooba, ni mbura keskeezeŋana. Mi ni imbotmbot raama iti.
Anutu ki Yakop ta iwit ti mi iur ti sala kor, mi iwe seraara mbolŋana pa kanda koi bizin. Tana zin ko tirao be timbuulu ti na som.
Copyright information for `MNA