aMbo 46:10, 95:3; Mt 5:35
b1Pe 1:4
cMbo 68:18
dMbo 95:3; Kol 3:16
eTur 4:9

Psalms 47

Mboe 47

Anutu ikamam peeze pa koroŋ ta boozomen

Mboe kizin Kora

Niom iwal ta boozomen, menmeen yom mi kepespeeze nomoyom!
Kalŋoyom isala, mi kombo mboe mi kapakur Anutu!

Yooba, ni Anutu kor kana kat. Kozo komototo i mi keleŋleŋ la kalŋaana.
Pa ni ta king biibi ŋonoono, mi ikamam peeze pa wal boozomen ta timbotmbot toono na. a 
Ni ikoto zin karkari, mi iur zin ma timbot la niam kopoyam mbarmaana.
Mi ipun zin wal matan munŋan mburan ma imap kat, tabe kumbuyam ise ŋguren.
Niam wal ta Yakop popoŋana kini na, menmeen yam mi niyam ise pa Yooba.
Pa ni leleene piam, mi iur leyam matamur ndabokŋana kat. b 

Anutu izalla be mbuleene se muriini peeze kana.
Tana twiiri itaŋtaŋ, mi tomtom kalŋan izalla mi tiyotyooto raama menmeen zin. c 
Kombo mboe mi kapakur Anutu.
Kombo mboe mi kiwit king kiti uruunu ma isala kor!
Pa Anutu, ni king biibi ŋonoono ta ikamam peeze pa toono ta boozomen.
Tana kombo mboe mi kapakuri! d 

Anutu imbotmbot se muriini peeze kana ta potomŋana i,
mi imborro karkari ta boozomen. e 
Tana zin bibip kizin karkari ko timar ma tilup raama yam,
mi niamŋan ambesmbeeze pa Anutu ki Abaraam.
Pa ni mburaana ilip pa zin peeze kan ta boozomen ki toono. Tana timap timbot la ni kopo mbarmaana men.
Tapakur zaana isala ta kor a!
Copyright information for `MNA