aMt 5:35

Psalms 48

Mboe 48

Anutu kar kini, ina ndabokŋana kat

Mboe kizin Kora

Yooba, ni zaana biibi kat.
Tana tomtom tiwidit uruunu ma isala kor!
Anutu kiti, kar kini imbotmbot sala abal kini potomŋana Sion.
Abal tana na, ŋgeezeŋana kat mi isala ta kor a.
Tomtom ta boozomen ki toono lelen ambai pa abal Sion.
Pa kar ki king biibi ŋonoono, ta imbotmbot sala.
Anutu kar kini na, ka siiri mbolŋana.
Pa ni itunu ta imbotmbot lela mi iporoukalkaala kar tana.
Tanata kar tana ka tomtom bizin timbot ambai. a 

King pakan tilup zin mi tiso tikam malmal pa Anutu kar kini.
Beso timar ma tire na,
timorsop pa mi timoto ma tiko ma tila len.
Motoŋana biibi ikam zin
ma tiseŋeeŋe kembei moori tabe ikam tomtom i.
Mi nu pasaana zin kembei ta re ipol ma ipei duubu
mi ipasaana zin wooŋgo ki kar Tarsis ma tisaana lup.

Uraata bibip ki Anutu, muŋgu amleŋ urun men.
Mi koozi na, amre kat uraata biibi ta Anutu tiam ikam pa kar kini na.
Yooba, ni mbura keskeezeŋana. Tana kar kini ko imbotmbot ambai ma alok.
Pa ni itunu ta ipamender kar tana mi mataana pa.

Anutu, iŋgi ambotmbot lela urum ku leleene,
mi amkamam ŋgar pa mbulu ku. Nu toto sua ku mbukŋana mi urur lelem pa wal ku.
10 Anutu, urum irak ma irao toono.
Tana zin karkari ta boozomen tipakurkuru.
Pa nu kampewe zin tomtom mi kamam mbulu ndeeŋeŋana men pizin.
11 Tana wal ta boozomen ki kar Sion lelen ambai kat.
Pa nu tirtiiri zin tomtom pa mbulu kizin mi urur kadoono ndeeŋeŋana men pizin.
Tana kar ta boozomen ki Yudea menmeen zin.

12 O niom, kamaŋga mi kapapiliu kar biibi Sion.
Kapa mi kere siiri mbolŋana ki kar tana.
13 Kinin zin ruumu ta uten isala kor kat, mi kitiiri kat ruumu mbolŋan ta tipo be tomtom timbot lela mi tikam malmal.
Naso karao be kipit kan mbol pa popoŋana tiom tabe tipet pa kaimer i.
14 Ko koso pizin ta kembei: “Anutu kiti, ni mbolŋana kembei ta abal Sion.
Ko imbotmbot ma alok.
Mi ni ko imuŋmuuŋgu piti mi izzo iti pa zaala kini, mi iseeŋge iseeŋge ma ila.”
Copyright information for `MNA