aKam 19:16,18
bKam 24:7
cMbo 19:1+; Ro 1:20
dKam 20:2
eMbo 40:6
fMbo 104:24
gMt 6:26
hKam 19:5; Mbo 24:1; 1Kor 10:26
iMbo 66:13+; Ibr 13:15
jMt 7:7; Yems 5:13
kRo 1:32
lMbo 91:16; Lu 2:30

Psalms 50

Mboe 50

Suŋŋana pareiŋana ta Anutu leleene pa?

Mboe ki Asap

Yooba, ni Anutu mbura keskeezeŋana.
Iur sua pizin tomtom ta boozomen ki toono, mi iboobo zin be timar tilup zin su kereene uunu.
Zin ta timbot pa lele pakaana ta zoŋ izze pa i, mi ila tuŋ la lele ta zoŋ izulla pa i, na bela timap ma timar tipet kini.

Anutu imbot Sion ta kar ndabokŋana mi ŋgeezeŋana kat,
mi iswe itunu raama mburaana mi azuŋka kini biibi.
Anutu kiti ta imar i. Irao imaane mini na som.
You bilbilŋana ta imuuŋgu pini.
Mi miiri ma yaŋ biibi iliu i. a 
Ni iboobo saamba mi toono be tire i,
mi itiiri zin wal kini mi iur kadoono pizin.
Mi iso ta kembei: “Niom wal tio tau itiŋan tumbuk sua be kewe leŋ na,
kamar kulup yom su kereŋ uunu be kakam patoronŋana mi kopombol sua tiom mbukŋana mini.” b 

Zin koroŋ ta timbot sala saamba na, tizzwe kembei Anutu mbulu kini indeŋdeeŋe men.
Mi ni ta tiiriŋana katuunu. c 

“O niom wal tio Israel, keleŋ sua tabe aŋso i.
Pa Anutu tiom ta nio i.
Mi iŋgi be aŋswe mbulu tiom ta kakamam ŋoobo i. d 
Patoronŋana ta kakamam pio na, nio aŋyaamba yom pa som.
Mi mbili ta gorgori kenenne zin su kereŋ uunu na, ta kembena. Aŋyaamba yom pa som. e 
Pa nio aŋkam kinkiini pa makau,
som mekmek tiom ta timbot siiri tiom leleene na som.
10 Buzur boozomen ta tiwwa su leleene na, nio tio men.
Mi mbili ta timbot irao abal ta munŋaana men lwonlwon, ina tomini nio tio men. f 
11 Mi man boozomen ta tirie pa maŋaanaŋana na, nio ta aŋboro zin.
Mi koroŋ boozomen ta tiwwa pa rie lene na, nio tio men. g 

12 Nio sombe petel yo, na irao aŋwi yom pa koŋ kini sa na som.
Pa toono ramaki ka koroŋ boozomen ta timbotmbot pa, ina koroŋ tio men. h 
13 Parei, niom koso nio aŋkanan makau mazaana,
som aŋwinin mekmek siŋiini? Som kat.
14 Mi patoronŋana ta nio leleŋ be kakam pio, ina ta kembei: Leleyom ambai pio, kapakur yo pa kampeŋana tio,
mi koto kat sua ta kumbuk pa Anutu tiom mbura keskeezeŋana na. i 
15 Mi sombe pataŋana sa indeeŋe yom, na koboobo yo be aŋuulu yom.
Naso aŋkamke yom, mi niom ko kapakur nio zoŋ. j 

16 Mi zin wal sananŋan na, Anutu iso pizin ta kembei:
“Tutu tio ta tibeede pataaŋa kek na, niom kawatwaata sorok paso?
Mi parei ta kwoyom lala pa sua ta aŋbuk pa wal tio na?”
17 Pa sua ta aŋso bekena aŋpazal yom pa na, kozorzooro.
Mi kipizil ndemeyom pa tutu tio.
18 Niom sombe kere tomtom kuumbuŋana sa, na leleyom ambai pini mi kagaabi.
Mi zin wal ta tipasaana mbulu ki ula na, kagabgaaba zin ma niomŋan kawwa. k 
19 Sua sananŋana mi sua pakaamŋana men ta iwedet pa kwoyom.
20 Mi kaŋgalŋgal sorok sua pizin wal tiom,
mi kapasansaana toŋmatiziŋ tiom urun.
21 Parei, iŋgi kakamam ta kembei mi kere nio aŋmanne men piom, tana koso nio aŋyok pa mbulu tiom tana?
Niom koso nio raraate kembei ta niom? Som kat!
Iŋgi be aŋyaamba yom mi aŋgal kat motoyom.

22 Tana niom ta kipizil ndemeyom pio na, kozo kakam kat ŋgar pa sua tio ti.
Kere yom: Kokena aŋmaŋga mi aŋpasaana kat yom, mi leyom ulaaŋa sa som.
23 Tana leleyom ambai pio mi kapakur yo pa kampeŋana tio.
Naso kakam patoronŋana ŋonoono tabe iwit nio zoŋ ma iwe biibi.
Mi tomtom ta so ito zaala tio ndeeŋeŋana,
nako aŋswe ulaaŋa tio pini, mi aŋkamke i ma imbot ambai. l 
Copyright information for `MNA