Psalms 52

Mboe 52

Wal sananŋan ta mburan bibip na, Anutu ko iur kadoono pizin

Mboe ki Dabit Indeeŋe ta Dabit imbot ki Ahimelek na, Doeg ta imar pa lele pakaana ki Edom na ila ma isotaara Saul pa Dabit. Kaimer Dabit itooro mboe tiŋgi.

[1Sam 21:1-22:23]

Nu tomtom mburomŋom, parei ta kalŋom izalla mi pakurkur itum pa mbulu ku sananŋana?
Ambai, kamam lem!
Mi Anutu mbulu kini ta itoto sua kini mbukŋana mi iurur leleene pa wal kini, ina irao imap na som.
Nu tina mbel pakaamŋana,
mi mburmbuuru pizin tomtom be pasaana zin.
Mi kwom na, kembei yar mataanaŋana.
Mbulu ambaiŋana mi sua ŋonoono na, nu lelem pa som.
Mi mbulu sananŋana mi sua pakaamŋana na, nu lelem pa.
Sua sananŋana boozomen tabe ipasaana zin tomtom i, ta nu lelem pa ilip.
Mi sua pakaamŋana men ta iwedet pa kwom.

Tana Anutu itunu ko ipasaana katu ma irao maŋga mini som.
Ko ilema murim, mi namaana ila nomom, mi ipalkeetu pera mat.
Mi itatke u pa wal matan yaryaaraŋan mazwan, mi ipiri u sula Andewa.
Mbulu tabe Anutu ikam pu i, sombe wal ndeeŋeŋan tire, nako timoto.
Mi kaimer to tisu mi tiseeŋge pu, mi tiso ta kembei:
“Kere. To taiŋgi, ni leleene be ipase pa Anutu be iwe tuunu som.
Pa ni le koroŋ boozo kat. Tanata ipase pa koroŋ kini tana be ikami ma imbot ambai.
Mi ipasansaana zin tomtom, tanata indemeere sorok ma iso ko mburaana biibi.”

Mi nio, nako aŋmender mbolŋana lela Urum Merere, mi aŋbot ambai ma molo kembei ke olib.
Mi Anutu mbulu kini ta itoto sua kini mbukŋana mi iurur leleene pa wal kini na, nio ko aŋpase pa ma alok.

Anutu, nio leleŋ ambai pa mbulu ta kam na.
Tana ko aŋpakurkuru mi aŋpase pa nu zom, mi iseeŋge iseeŋge ma ila.
Mi aŋzzoyaryaara urum ila wal ku matan,
mi aŋzzo zin ta kembei: Nu ambaiŋom kat.
Copyright information for `MNA