Psalms 54

Mboe 54

Suŋŋana ki tomtom ta ipase pa Anutu zaana be iporoukaali

Mboe ki Dabit Indeeŋe ta zin tomtom ki kar Zip tila ki Saul mi tisotaari kembei Dabit ike ma imbotmbot pa lele kizin na, Dabit itooro mboe tiŋgi.

[1Sam 23:13-29]

O Anutu, kamke yo lak! Pa nio aŋpase pa nu zom tau.
Mender pio, mi swe mburom keskeezeŋana. Naso tomtom tikilaala kembei nio leŋ uunu sa isaana som.
Anutu, ŋgun talŋom pa suŋŋana tio ti, mi leŋ yo.

Pa zin wal ta tipakurkur zitun mi tikototo zin wal pakan, ta tikamam malmal pio.
Wal tana tipasansaana zin tomtom, mi timuŋai zin risa som.
Mi iŋgi tikamam be tipun yo ma aŋmeete i!
Mi Anutu tomini, tikamam ŋgar pini som.

Mi Anutu, ni ulaaŋa tio.
Ni ikiskis yo tana aŋbot ambai.
Tana Merere, zin wal ta tiŋgalŋgal sua pio na, pimiili mbulu kizin sananŋana pa zitun.
To sua ku mbukŋana, mi pasaana zin ma timap kat.

Yooba, nu ambaiŋom kat!
Tana leleŋ ambai pu,
mi aŋso aŋkam patoronŋana pu mi aŋpakur zom.
Pa nio aŋpase pa zom, tana nu tatke yo pa pataŋana tio ta boozomen.
Mi iŋgi ituŋ motoŋ aŋre u koto koŋ koi bizin ma aŋlip pizin kek.
Copyright information for `MNA