aMbo 27:1, 118:6; Ro 8:31; Ibr 13:6
bMk 3:6
cRo 2:3; Ibr 12:25
dRo 8:31

Psalms 56

Mboe 56

Suŋŋana ki tomtom ta ipase pa Anutu

Mboe ki Dabit Indeeŋe ta zin Pilistia kan tikis Dabit su kar Gat na, ni itooro mboe tiŋgi. Mboe ti ka ŋger: ‘Mbalmbal ta imbot lele molo mi itaŋ som’

[1Sam 21:10-15]

O Anutu, muŋai yo lak! Pa nio mbesooŋo ku tau. Mi iŋgi koŋ koi bizin tiketoto yo i.
Mbeŋ ma aigule tomtom timaŋgaŋga pio mi tikamam pataŋana pio.
Aigule ta boozomen tizaŋzaaŋa yo mi tiketoto yo.
Re. Zin wal ta tisombe tikam malmal pio na, sorok som.

Anutu kor kana kat, sombe motoŋana ikam yo, na nio ko aŋurla ku mi aŋpase pu.

Nio aŋpakur Anutu pa sua kini mbukŋana, mi aŋpase pini.
Irao aŋmoto na som.
Pa tomtom toono kan len mburan iŋgoi be tipasaana yo? Som. a 

Mbeŋ ma aigule koŋ koi bizin tipiŋgisŋgis sua tio,
mi tirru zaala be tipasaana yo.
Tilup zin mi tikewe be tireut yo,
mi tizaŋzaaŋa yo be tipun yo ma aŋmeete. b 

Anutu, wal sananŋan ta kembei, ko zem zin ma timbot? Som!
Koto zin raama ketem malmalŋana, mi pun zin ma mburan imap kat. c 

Pataŋana tio ta boozomen na, nu beede se ro ku kek.
Kes motoŋ luluunu la yok putuunu ku,
mi ur lae ma imbotmbot, bekena motom iŋgalŋgal.
Tana nio sombe aŋboobu be uulu yo,
nako kam ma koŋ koi bizin tiko mi timiili ma tila len.
Naso aŋute kat ta kembei: Nu lelem pio mi lae tio. d 

10 Tana nio aŋpakur Anutu pa sua kini mbukŋana.
Nio aŋpase pa sua ki Yooba.
Irao aŋmoto na som.
Pa tomtom toono kan len mburan iŋgoi be tipasaana yo? Som.

12 Anutu, patoronŋana ta aŋbuk sua pa be aŋkam pu na, nio ko aŋkam.
Nio ko aŋkam patoronŋana pu raama leleŋ ambai kat mi aŋpakuru.
13 Pa nu tatke yo pa meeteŋana, mi uulu yo pa koŋ koi bizin.
Tabe tikam yo ma aŋtop som.
Tana nu ko motom pio pa pai tio mi ur mat pio,
mi mboro yo ma aŋbotmbot ambai men.
Copyright information for `MNA